Per persunas cun impediments è la ristga pli gronda da daventar victimas da violenza a chasa. Per quest motiv sa deditgeschan ils Dis d'acziun cunter violenza a chasa en il chantun Grischun quest onn al tema «violenza cunter persunas cun impediments». Adattà al tema han lieu dals 25 da november fin ils 10 da december 2025 bleras occurrenzas en l'entir chantun.

Violenza a chasa n'enconuscha nagins cunfins geografics, culturals u socials. Ella vegn avant en differentas furmas – corporala, sexuala, psichica ed economica – e pertutga persunas entaifer la famiglia u exista tranter partenaris (anteriurs). Er la violenza en furmas d'abitar assistidas sco instituziuns da tgira u gruppas d'abitar fa part da la violenza a chasa, cun quai che las persunas pertutgadas vivan en in ambient social dependent e savens stretg. Violenza a chasa n'è betg ina chaussa privata – ella è chastiabla e na vegn betg tolerada en nossa societad.

Ristga pli gronda per persunas cun impediments
Quest onn metta il Grischun in focus spezial sin la violenza cunter persunas cun impediments. Perquai ch'ellas han ina ristga pli gronda da daventar victimas da violenza. Quai è cunzunt lura il cas, sch'ellas dovran sustegn en il mintgadi u sche lur abilitads da communitgar e da proteger sasezzas èn reducidas. Periclitadas èn spezialmain dunnas e mattas cun impediments.

Differentas occurrenzas en l'entir chantun
En l'entir chantun han lieu occurrenzas ed acziuns durant ils Dis d'acziun cunter violenza a chasa. Il 1. da december 2025 ha lieu la party da saut «Ella sauta» che unescha dunnas cun e senza impediments e che porscha lavuratoris sco er stans d'infurmaziun. Al martgà da Nadal da la Societad Movimento a Samedan, ils 29 ed ils 30 da november 2025, datti ultra dals products fatgs a maun, er in stan d'infurmaziun davart il tema «violenza cunter persunas cun impediments». En il kino Raetia a Tusaun vegn mussà ils 3 da december in film commovent. Avant la projecziun dal film datti ina discussiun al podium. L'exposiziun publica «Bainvegni a chasa» a la Scola auta da pedagogia dal Grischun a Cuira è da vesair dals 4 fin ils 26 da november 2025.

En differentas pasternarias en tut il chantun vegn paun vendì en stgarnuzs spezials cun l'inscripziun «Violenza a chasa na vegn betg en noss stgarnuz». En il rom dals dis d'acziun han lieu cumplementarmain projecziuns da films, prelecziuns, occurrenzas da musica, exposiziuns d'art, stans d'infurmaziun ed occurrenzas da benefizi. Sco segn cunter violenza ch'è visibel dalunsch vegnan differents lieus ed edifizis en il chantun illuminads en oransch. Plinavant ha lieu ina campagna chantunala da sensibilisaziun cun slogans sco «La violenza n'è betg privata.» e «Intervegnir curaschusamain. Midar ina vita».

Agid e sustegn disponibel
Bleras victimas taschan per tema u per vargugna. Er ils confamigliars e l'ambient social na san savens betg, co ch'els duain reagir. En il chantun Grischun datti bleras purschidas d'agid per persunas pertutgadas e per confamigliars. Questas purschidas duain vegnir rendidas enconuschentas durant ils dis d'acziun. Ina survista chattais Vus sut: www.gr.ch/haeusliche-gewalt.

Agiunta:

Tut las acziuns ed occurrenzas en il program dals Dis d'acziun 2025

Fotografia:

    

Tschintg motivs da la campagna grischuna cunter violenza a chasa.

Ina survista davart las purschidas d'agid datti en 16 linguas sin la pagina d'internet dal Post da coordinaziun Violenza a chasa.

Infurmaziuns:

Madlaina Baselgia, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11 (cuntanschibla da las 10.00 fin las 12.00), e‑mail Madlaina.Baselgia@soa.gr.ch

Responsabladad: Uffizi dal servetsch social

Resumà en lingua facila

Violenza a chasa envers persunas cun impediments

Violenza a chasa è violenza en l'agen dachasa.
Quai po capitar en mintga dachasa.
Envers persunas cun impediments datti pli savens violenza a chasa, che envers autras persunas.

Tge è violenza?

• sch'insatgi fa mal a Voss corp
• sch'insatgi di pleds nauschs a Vus
• sch'insatgi sforza Vus da far acts sexuals
  

Nossa societad na tolerescha nagina violenza.
Ins po clamar la polizia.
Violenza po vegnir chastiada.
Qua chattais Vus agid (cliccar).

Dis d'acziun il november ed il december

Violenza a chasa envers persunas cun impediments è adina in tema.
I dat dis d'acziun davart quest tema.
Dals 25 da november fin ils 10 da december 2025 en l'entir Grischun.

Organisaziuns e persunas fan in'acziun cunter violenza.
In'acziun è in'occurrenza.
In'acziun duai dar en egl.

Bleras occurrenzas èn planisadas:

• Martgà da Nadal
• Sautar
• Film da kino
• Discussiun davart la violenza en chasas da dimora

Autras acziuns:

• chasas glischan en colur oranscha
  
• sin il stgarnuz da paun stat insatge cunter violenza

I dat anc dapli acziuns.
Vulais Vus guardar tuttas?
Alura cliccai qua.

Avais Vus dumondas?

As annunziai per e-mail u per telefon.
Il e-mail è: madlaina.baselgia@soa.gr.ch
DIl numer da telefon è: 081 257 26 11.

Dis d'acziun sin l'entir mund

Dals 25 da november, il Di internaziunal cunter la violenza envers dunnas, fin ils 10 da december, il Di dals dretgs umans, mettan differentas organisaziuns sin l'entir mund in signal per ina societad senza violenza. L'illuminaziun oranscha d'edifizis, ch'è visibla durant quests dis sin l'entir mund, è in signal simbolic cunter violenza.

Ils «Dis d'acziun cunter violenza a chasa en il Grischun» èn inspirads da las iniziativas dals dus moviments internaziunals «Orange Days» e «16 dis cunter violenza envers dunnas». Il chantun coordinescha e sustegna occurrenzas ed acziuns en las regiuns.