Niculin Mosca surpiglia il 1. da favrer 2026 la direcziun da l'Uffizi da migraziun e da dretg civil dal Grischun (UMDC). El daventa successur da Markus Haltiner che va anticipadamain en pensiun, quai suenter 25 onns en la direcziun dal UMDC sco vicemanader ed ultimamain sco manader da l'uffizi.
Niculin Mosca posseda in CAS da l'Universitad da Berna en dretg da migraziun ed ha rimnà blers onns experientscha en il sectur da migraziun. Actualmain maina el interimisticamain la regiun Duana Ost tar l'Uffizi federal da la duana e da la segirezza dals cunfins (UDSC). Avant ha el represchentà il UDSC tar l'Agentura europeica da la guardia da cunfin e da costa Frontex a Varsovia. Cura ch'el è vegnì detaschà, manava el il servetsch «Mesiras dal dretg da persunas estras» tar la Polizia chantunala da Turitg. En questas funcziuns cumplexas e politicamain pretensiusas ha Niculin Mosca rimnà durant plirs onns experientschas directivas tant en il sectur strategic sco er operativ. En l'Uffizi da migraziun e da dretg civil vegn el a manar in team da circa 220 collavuraturas e collavuraturs ch'èn activs en pli che 39 differents lieus.
Dapi il december 2024 ed er anc fin a l'entrada en uffizi da Niculin Mosca vegn il UMDC manà interimisticamain da Philipp Sigron. La Regenza engrazia gia oz a Philipp Sigron per ses grond engaschament. Suenter che Niculin Mosca ha cumenzà ses uffizi, vegn Sigron puspè a surpigliar sias activitads oriundas e sia funcziun sco substitut dal manader da l'Uffizi da migraziun e da dretg civil. Er a Markus Haltiner engrazia la Regenza per ses grond engaschament durant blers onns per il chantun Grischun ed er per l'uffizi sco tal. Tranter auter ha el gidà essenzialmain a realisar cun success la politica d'asil, da migraziun e d'integraziun.
Il UMDC presta numerus servetschs cunzunt en connex cun nossa populaziun estra. El è responsabel per realisar las prescripziuns giuridicas e politicas da la politica da migraziun e d'asil. In ulteriur champ tematic impurtant da l'uffizi è l'integraziun da la populaziun estra. L'uffizi è responsabel per sviluppar e per realisar ils programs d'integraziun respectivs. Ulteriuras incumbensas èn l'emissiun da documents d'identitad per burgaisas e burgais svizzers, la concessiun da permissiuns polizialas, la bullaziun e la metrologia chantunala sco er l'execuziun da la legislaziun davart il dretg da burgais e davart il stadi civil.
Fotografia agiuntada:
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 16.00 fin las 17.00), e‑mail medienstelle@djsg.gr.ch
Responsabladad: Regenza