Per distgargiar Susch dal traffic è vegnì instradà il proxim pass da la procedura. Ils 24 da november 2025 ha cumenzà l'exposiziun publica da cooperaziun. Per l'adattaziun dal plan directiv vegnan persequitadas vinavant duas variantas. Quellas sa differenzieschan mo areguard la lunghezza dal tunnel.

Il vitg da Susch che sa chatta en l'Engiadina Bassa al pe dal Pass dal Flüela è dapi decennis expost ad in grond volumen da traffic. Cunzunt ils dis da grond traffic durant la stad e durant l'enviern èsi fitg difficil da passar cun l'auto tras il center istoric dal vitg ed i dat savens impediments da traffic e colonnas. Qua tras è il center dal vitg engrevgià fermamain e betg attractiv per sa trategnair. Perquai ch'i dat en il center dal vitg mo passapes stretgs u insumma nagins, èn cunzunt er las pedunas ed ils peduns exposts ad in privel pli grond. Dapi decennis han ins perquai l'intent da distgargiar Susch dal traffic da transit, per uschia meglierar la segirezza dal traffic sco er la qualitad da sa trategnair e d'abitar en il vitg.

Sviament vest – necessari d'adattar il plan directiv
Projects da vias pli gronds valan tenor la Lescha federala davart la planisaziun dal territori sco projects cun consequenzas considerablas per il territori e per l'ambient e ston perquai vegnir determinads en il Plan directiv chantunal. Sco basa per quai han ins fatg dapi l'onn 2022 – integrond expertas ed experts da differents secturs spezials – in'evaluaziun cumplessiva da variantas per distgargiar Susch dal traffic. Il concept ch'è resultà da quai (variantas 30 e 31) prevesa da construir in sviament per lung da l'ur vest da l'abitadi e da realisar mesiras accumpagnantas per diminuir il traffic en il center dal vitg.

Arrivond da Zernez sa sparta il sviament previs dal trassé actual da la H27 vers vest, sutpassa il trassé da la Viafier retica e munta silsuenter en direcziun d'ina nova rundella d'access a la via dal Flüela. Vers nord maina la via davent da la rundella sur ina punt che traversa la via dal Flüela e la Susasca e sbucca lura directamain en in tunnel.

Davent dal portal dal tunnel n'è il trassé exact vers nord anc betg fixà definitivamain. El vegn a sa chattar en il sectur da las variantas 30 e 31.

• En la varianta 30 ha il tunnel ina lunghezza da 420 meters. Il sviament sorta al nord da la staziun da la Viafier retica or dal tunnel e maina suenter sur terra per lung da l'ur da l'areal d'orticultura fin a l'access nord e là puspè sin il trassé actual da la H27 (illustraziun 2).
• En la varianta 31 maina la via tras in tunnel in pau pli lung che ha ina lunghezza totala da 660 meters, e finescha pir sut il curt tunnel da la Viafier retica Val Ota (illustraziun 3).

La lunghezza totala dal sviament importa tar tut las duas variantas circa 1500 meters.

Exposiziun publica durant 30 dis
Dapi ils 24 da november 2025 è l'adattaziun dal Plan directiv exponida publicamain, e quai durant 30 dis. Durant quest temp han tut las persunas interessadas la pussaivladad d'inoltrar en scrit objecziuns e propostas.

Il project sa chatta gia en l'examinaziun preliminara tar la Confederaziun. Sin basa dals resultats da l'exposiziun publica e da l'examinaziun preliminara da la Confederaziun vegn il Plan directiv alura elavurà vinavant. Il Plan directiv vegn concludì da la Regenza grischuna ed approvà dal Cussegl federal.

Agiunta:

• Illustraziun 1: Survista da tut las duas variantas per distgargiar Susch dal traffic (30 e 31)
• Illustraziun 2: Distgargiar Susch dal traffic, varianta 30 (cun tunnel pli curt)
• Illustraziun 3: Distgargiar Susch dal traffic, varianta 31 (cun tunnel pli lung)

Infurmaziuns:

Rino Camenisch, planisader regiunal, Uffizi per il svilup dal territori, tel. +41 81 257 29 04 (cuntanschibel da las 11.00 fin las 12.00), e‑mail Rino.Camenisch@are.gr.ch

Responsabladad: Uffizi per il svilup dal territori