La Regenza grischuna gratulescha cordialmain al cusseglier dals chantuns Stefan Engler. El è vegnì elegì oz sco president dal Cussegl dals chantuns per la perioda d'uffizi 2025/2026. Dapi l'onn 1848 stat uschia per la 9avla giada in parlamentari dal chantun Grischun a la testa da la Chombra pitschna.
Cun Christoffel Brändli era avant 18 onns vegnì elegì l'ultima giada in Grischun en l'uffizi dal president dal Cussegl dals chantuns. Al cumenzament da la sessiun d'enviern ha Stefan Engler survegnì oz 44 da 44 vuschs valaivlas. Cun quest resultat è l'um da 65 onns vegnì elegì sco president dal Cussegl dals chantuns per la perioda d'uffizi 2025/2026. La Regenza grischuna è stada preschenta oz en la sala dal Cussegl dals chantuns ed ha dastgà persequitar l'act electoral ensemen cun la presidenta dal Cussegl grond Valérie Favre Accola ed ulteriuras represchentantas e represchentants politics dal chantun Grischun.
En l'istorgia dal Stadi federal è Stefan Engler pir il 9avel Grischun ch'è vegnì elegì sco president dal Cussegl dals chantuns. Ses antecessurs èn Florian Gengel (1878/79), Luzius Raschein (1897/98), Felix L. Calonder (1911/12), Friedrich Brügger (1918/19), Andreas Laely (1932/33), Arno Theus (1970/71), Luregn Mathias Cavelty (1989/90) e Christoffel Brändli (2007/2008) ch'è vegnì menziunà al cumenzament.
Grond engaschament per il Grischun e per l'entir pajais
Stefan Engler che deriva da la Val d'Alvra, ha cumenzà l'onn 1987 sia carriera politica sco deputà en il Cussegl grond (fin 1999) ed a partir dal 1990 sco president communal da Surava (fin 1998). Grazia a ses grond engaschament politic è el vegnì elegì l'onn 1999 en la Regenza grischuna e suenter l'onn 2011 en il Cussegl dals chantuns. Là s'engascha Engler spezialmain per ils interess dals chantuns da muntogna, il federalissem e la coesiun en Svizra. Cun sia elecziun sco president dal Cussegl dals chantuns undrescha la Chombra pitschna sia carriera politica ch'è caracterisada da cumpetenza, equiliber e dialog.
Nagina festa uffiziala da bainvegni
Sin giavisch dal president dal Cussegl dals chantuns Stefan Engler na datti quest'emna betg in bainvegni uffizial cun festa d'elecziun en il Grischun. L'elecziun sco president duai vegnir festivada mo en in rom pli pitschen. Persuenter vegn Stefan Engler ad envidar las cusseglieras ed ils cussegliers dals chantuns l'onn 2026 a l'excursiun d'atun en il Grischun. Plinavant prevesa Engler da visitar durant ses onn presidial differentas occurrenzas en il chantun. Quellas porschan l'occasiun da s'inscuntrar cun la populaziun e las autoritads.
Fotografias agiuntadas:
Fotografias per chargiar giu
Fotografias en la mediateca da la Confederaziun
Infurmaziuns:
President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch
Responsabladad: Chanzlia chantunala