Cun il project «Ammonit und Diorama» ha la cuminanza d'architects Studio Esch Rickenbacher e Noun da Turitg gudagnà la concurrenza d'architectura per la renovaziun e l'engrondiment dal Museum da la natira dal Grischun. Las lavurs da construcziun duain cumenzar l'atun 2028.

Cun ina concurrenza d'architectura da dus stgalims ha il chantun tschertgà in project per renovar ed engrondir il Museum da la natira dal Grischun (MNG) a Cuira. Otg teams da planisaziun selecziunads han inoltrà en la segunda fasa lur skizzas. Ils projects èn s'occupads pli detagliadamain cun ils temas urbanistica, tgira da monuments, basegns da las utilisadras e dals utilisaders, planisaziun da las parts purtantas, persistenza sco er biodiversitad.

Ponderaziuns conscienziusas han persvadì
La giuria ha examinà conscienziusamain ils projects inoltrads. Sin basa da sia proposta ha la Regenza surdà l'incumbensa da planisaziun generala a la cuminanza d'architects Studio Esch Rickenbacher Architektur SA e Noun ScRL da Turitg cun il project «Ammonit und Diorama». Lur project prevesa da sanar il museum ch'era vegnì planisà ils onns 1970 da Bruno Giacometti, e cumplettescha l'edifizi cun in plaun supplementar. Quest plaun si sut il tetg vegn ad esser in local fitg aut, senza pitgas e cun glisch natirala, che porscha al Museum da la natira dal Grischun pussaivladads d'exposiziun dal tuttafatg novas. Plinavant propona il project da spustar l'entrada. Al manaschi dal museum permetta quai d'utilisar il plaunterren da nov sco «foyer public», e la valur dal spazi exteriur vegn augmentada. «Il project ‹Ammonit und Diorama› persvada tut en tut tras numerusas ponderaziuns conscienziusas e tras quai, che l'edifizi existent vegn sviluppà vinavant consequentamain», di la presidenta da la giuria, cussegliera guvernativa Carmelia Maissen, scheffa dal Departament d'infrastructura, energia e mobilitad. «I resulta in museum da la natira modern, cun novas structuras che porschan pussaivladads d'exposiziun tut autras. Uschia po il museum ademplir er en l'avegnir sias incumbensas multifaras en ina cuntrada da museums ch'è en transfurmaziun.»

Sanaziun totala suenter passa 44 onns
Suenter passa quatter decennis dovri ina sanaziun cumplessiva, quai ord vista dal manaschi, da la segirezza tecnica sco er da la persistenza. L'edifizi dal museum, ch'è vegnì avert l'onn 1981, porscha bain anc adina ina basa adattada, ma las localitads n'adempleschan betg pli cumplainamain las pretensiuns dal manaschi. Per part mancan surfatschas da lavur e da deposit. E las cundiziuns climaticas durant la stad e l'enviern sco er la protecziun cunter radis ultraviolets en ils locals d'exposiziun èn insuffizientas. Plinavant ha l'edifizi deblezzas staticas areguard la segirezza cunter terratrembels, l'effizienza energetica è insuffizienta e la tecnica d'edifizis è antiquada.

Ils proxims pass
En in proxim pass vegn il project victur repassà e perfecziunà ad in project da missiva. Suenter ch'ils conclus politics necessaris èn sut tetg, duain las lavurs da construcziun cumenzar l'atun 2028. E sche tut va sco planisà, pudess ins retrair il nov Museum da la natira dal Grischun, sanà ed engrondì, mez da l'onn 2031.

Durant la fasa da sanaziun e da transfurmaziun vegn il Museum da la natira dal Grischun dischlocà en in provisori. Cun fin 40 000 visitadras e visitaders per onn è il Museum da la natira dal Grischun in dals museums ils pli frequentads en il Grischun. Sias exposiziuns dattan invistas fascinantas dals minerals, da la flora e da la fauna dal chantun e mussan la diversitad dals sistems ecologics alpins.

Visualisaziuns:

  

© ARGE GP NOUN SERA

Agiunta:

Rapport da la giuria

Infurmaziuns:

Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 11.00 fin las 12.00), e‑mail Carmelia.Maissen@diem.gr.ch

Responsabladad: Regenza

Exposiziun da la concurrenza en il Museum da la natira

Venderdi, ils 12 da december 2025, a las 17.15, avra la cussegliera guvernativa Carmelia Maissen l'exposiziun da la concurrenza en il Museum da la natira dal Grischun. Mussads vegnan ils projects rangads ch'èn vegnids inoltrads per la concurrenza d'architectura.
L'exposiziun dura fin ils 18 da schaner 2026 e po vegnir visitada mintgamai durant las uras d'avertura dal Museum da la natira dal Grischun.