Dapi la votaziun dal pievel dals 28 da settember 2025 èsi cler, che l'imposiziun da taglia sin la valur da l'atgna locaziun vegn abolida e ch'ils chantuns dastgan introducir sco cumpensaziun ina taglia immobigliara speziala sin immobiglias secundaras. Cura che questas midadas entran en vigur, decida il Cussegl federal. Gia ussa ha la Regenza però prendì decisiuns da princip. Uschia vul ella sa posiziunar a temp e sclerir l'ulteriur proceder.

Tar las immobiglias secundaras procura l'aboliziun da l'imposiziun da taglia sin la valur da l'atgna locaziun – tenor stimaziuns – per perditas d'entradas da circa 40 milliuns francs per onn. Tenor l'avis da la Regenza duai vegnir introducida ina taglia immobigliara speziala dal chantun sin immobiglias secundaras che servan per gronda part a l'agen diever.

Soluziun concisa per vischnancas e Baselgias
Tras l'aboliziun da l'imposiziun da taglia sin la valur da l'atgna locaziun d'immobiglias secundaras vegni stimà, che las vischnancas perdian mintg'onn var 30 milliuns francs. Perquai vul la Regenza stgaffir ina basa legala che permetta a las vischnancas d'incassar ina taglia immobigliara speziala sco cumpensaziun per l'aboliziun da l'imposiziun da taglia sin la valur da l'atgna locaziun.

Per minimar la lavur administrativa da las vischnancas, ha la Regenza en mira ina regulaziun concisa: Ils princips da la taglia immobigliara speziala duain vegnir fixads sin plaun chantunal. Las vischnancas decidan, sch'ellas vulan introducir ina tala taglia u betg. En cas ch'ellas introduceschan questa taglia, ston ellas mo anc fixar l'autezza da la taglia en lur lescha da taglia.

Tras l'aboliziun da l'imposiziun da taglia sin la valur da l'atgna locaziun sin immobiglias secundaras vegni stimà, che la Baselgia evangelica refurmada dal Grischun perdia 500 000 francs, las plaivs evangelicas 1,7 milliuns francs e las plaivs catolicas 1,8 milliuns francs. La Regenza vul stgaffir ina regulaziun legala, per er pussibilitar a las Baselgias d'incassar ina taglia immobigliara speziala. Er questa regulaziun duai esser concisa, per che las Baselgias stoppian mo anc fixar l'autezza da la taglia.

Examinar las deducziuns da fin ussa
La Confederaziun surlascha als chantuns da decider, sche las investiziuns en mesiras per spargnar energia e per proteger l'ambient duain vinavant pudair vegnir deducidas da las entradas suttamessas a la taglia. Il medem vala per la deducziun per lavurs da la tgira da monuments e per la deducziun dals custs per spazzar in edifizi, sche l'edifizi duai vegnir remplazzà tras in edifizi nov. Questas trais deducziuns datti gia oz. La Regenza vul examinar, sche questas deducziuns duain vegnir mantegnidas suenter la midada da sistem, quai vul dir suenter l'aboliziun da l'imposiziun da taglia sin la valur da l'atgna locaziun.

Co vinavant?
L'Administraziun chantunala da taglia vegn ad elavurar las disposiziuns legalas necessarias. Pli tard vegn il Departament da finanzas e vischnancas a dar en consultaziun il project. Silsuenter vegn la Regenza a deliberar sia missiva per mauns dal Cussegl grond. Cura che la taglia immobigliara speziala sin immobiglias secundaras vegn introducida e cura che l'imposiziun da taglia sin la valur da l'atgna locaziun vegn abolida, dependa da la decisiun dal Cussegl federal. La nova regulaziun vegn messa en vigur il pli baud per il 1. da schaner 2028. Sin quest termin duain er las disposiziuns legalas dal chantun vegnir messas en vigur.

Infurmaziuns:

• Cusseglier guvernativ Martin Bühler, schef dal Departament da finanzas e vischnancas
  Las dumondas vegnan coordinadas da Seraina Hostettler, responsabla per la communicaziun dal Departament da finanzas e vischnancas, tel. +41 81 257 32 05, e‑mail Seraina.Hostettler@dfg.gr.ch
• Dr. iur. Toni Hess, manader dal Servetsch giuridic da l'Administraziun da taglia, tel. + 41 81 257 33 26, e‑mail Toni.Hess@stv.gr.ch

Responsabladad: Regenza