L'Uffizi federal d'ambient (UFAM) ha approvà la dumonda da l'Uffizi da chatscha e pestga (UCP) per laschar liber dus lufs-tscherver la fin da november. Quai èn in luf-tscherver creschì da la populaziun dal Giura ed in da las Carpatas. En emprima lingia duai questa mesira servir per remplazzar ils trais lufs-tscherver ch'eran vegnids sajettads per sbagl l'onn passà ed a medem temp per rinforzar la diversitad genetica.
Il favrer 2026 cumenzan l'Institut per medischina da peschs e selvaschina (FIWI) e la fundaziun KORA, en collavuraziun cun las autoritads chantunalas da chatscha pertutgadas, cun l'acziun da pigliar in luf-tscherver en il territori dal Giura. In segund luf-tscherver duai vegnir importà da la populaziun d'origin da las Carpatas en la Slovachia u en la Rumenia. Cunquai ch'ils lufs-tscherver selvadis da la Rumenia e da la Slovachia èn fitg dumandads, vegn questa acziun previsiblamain a sa retardar fin l'onn 2028. La permissiun dal UFAM è valaivla fin la fin dal 2030.
La colonisaziun dals dus animals creschids serva en emprima lingia sco remplazzament per ils trais lufs-tscherver (in animal creschì e dus animals giuvens), ch'èn vegnids sajettads per sbagl il november 2024 en il rom da la regulaziun dals lufs (guardar la communicaziun a las medias dals 26 da november 2024). «Tras la domiciliaziun da dus animals creschids duai vegnir eliminà il donn chaschunà en la populaziun regiunala da lufs-tscherver», di Adrian Arquint, co-manader da l'Uffizi da chatscha e pestga. «Cun la tscherna dal lieu d'origin pudain nus a medem temp er realisar ina meglieraziun genetica da la populaziun da lufs-tscherver en las Alps.» Sco regiun per la domiciliaziun è previs il cumpartiment da lufs-tscherver «Surselva», nua che las perditas èn resultadas.
Resultats dal monitoring cun agid da traplas fotograficas en Surselva
La fin da l'enviern da quest onn han ins fatg en Surselva per la segunda giada suenter il 2021 in monitoring sistematic cun agid da traplas fotograficas. En quest connex han ins stimà, che la populaziun da lufs-tscherver cumpiglia actualmain 17 animals independents. En cumparegliaziun cun l'ultim monitoring da l'onn 2021, che aveva mussà 15 lufs-tscherver independents, n'è la populaziun en Surselva betg sa midada signifitgantamain. Il rapport cumplet stat a disposiziun sin las paginas d'internet da la fundaziun KORA e dal UCP.
Infurmaziuns:
Adrian Arquint, co-manader da l'Uffizi da chatscha e pestga dal Grischun, tel +41 81 257 38 91 (cuntanschibel da las 10.30 fin las 11.30), e‑mail Adrian.Arquint@ajf.gr.ch
Responsabladad: Uffizi da chatscha e pestga