La Regenza ha concedì al consorzi «Turissem Val Surses Savognin Beiva SA, Associaziun Organisaziun per la destinaziun Tavau, Uniun Viamala turissem, Lai marketing & support SA» ina contribuziun chantunala da maximalmain 284 000 francs per il project digital «Applied Tourism Intelligence 2.0: Installaziun da models da fatschenta digitals per destinaziuns intelligentas en il Grischun». Questa contribuziun ha ella deliberà en il rom da la Lescha davart la promoziun da la transfurmaziun digitala en il Grischun. Per quest project fan ins quint cun custs da var 668 000 francs.

Cun il project, curt «ATI 2.0», sviluppan quatter organisaziuns turisticas grischunas ensemen cun partenaris novas soluziuns digitalas per uschenumnadas «destinaziuns intelligentas». En il focus stat la dumonda, co che datas – per exempel davart circulaziuns da visitaders u da traffic – pon vegnir duvradas per pudair diriger meglier il turissem e per trair a niz novas funtaunas d'entradas. Las enconuschientschas fatgas duain vegnir transferidas en models ch'èn adattads per la pratica, che pon vegnir utilisads er en autras destinaziuns e che resguardan basegns regiunals. La finamira è quella da rinforzar a lunga vista las destinaziuns grischunas sco posts da contact cumpetents per dumondas dal sectur turistic che pertutgan la digitalisaziun e che sa basan sin datas.

Ulteriuras infurmaziuns: https://grdigital.digital/

Infurmaziuns: Departament d'economia publica e fatgs socials

Las revisiuns parzialas da la Lescha davart la protecziun da la populaziun e da la Lescha davart la protecziun civila, ch'il Cussegl grond aveva concludì ils 12 da zercladur 2025, entran en vigur il 1. da schaner 2026. Il termins da referendum èn scadids ils 23 da settember 2025. Entaifer quest termin n'èn vegnids inoltrads nagins referendums. A medem temp cun las entradas en vigur ha la Regenza approvà las revisiuns parzialas da l'Ordinaziun tar la Lescha davart la protecziun da la populaziun e da l'Ordinaziun tar la Lescha da protecziun civila.

En las revisiuns parzialas da la Lescha davart la protecziun da la populaziun e da la Lescha davart la protecziun civila (cf. communicaziun da la Regenza dals 13 da mars 2025) èn perquai vegnidas integradas las enconuschientschas da crisas e da situaziuns d'urgenza dals ultims onns. Las adattaziuns proponidas da la Lescha davart la protecziun da la populaziun prevesan, che las vischnancas pon engaschar da nov explicitamain er stabs directivs regiunals per dumagnar eveniments, sch'ellas vulan quai. La revisiun parziala actuala da la Lescha da protecziun civila vul oravant tut mantegnair il dumber da squadras e da persunas da cader. Cun in sistem d'impuls duai vegnir garantì, ch'i possian vegnir recrutadas er en l'avegnir avunda persunas da cader per la protecziun civila.

Infurmaziuns: Departament da giustia, segirezza e sanadad

La Regenza ha approvà la revisiun parziala da l'Ordinaziun tar la Lescha davart l'assicuranza da malsauns e la reducziun da las premias e l'ha mess en vigur sin il 1. da schaner 2026.

Cun la revisiun parziala vegn midada la pratica per calcular las reducziuns da las premias per las persunas suttamessas a la taglia a la funtauna. Resguardond la procedura per persunas suttamessas a la taglia ordinaria duai il dretg vegnir calculà da nov er per las persunas suttamessas a la taglia a la funtauna sin basa da las entradas da l'onn precedent.

Infurmaziuns: Departament da giustia, segirezza e sanadad

La Regenza ha garantì a la plaiv catolic-romana da Breil ina contribuziun chantunala da maximalmain 223 610 francs per la sanaziun totala da la baselgia S. Gialetta. Ils custs totals dal project èn budgetads cun 1,8 milliuns francs, da quels èn totalmain var 1,49 milliuns francs imputabels per la garanzia da contribuziun. En il rom da la concessiun da las contribuziuns da la tgira da monuments vegnan la baselgia e ses conturns mess sut protecziun da monuments.

La baselgia barocca è plazzada en in lieu caracteristic per il maletg dal lieu a Curnengia. L'edifizi cun il clutger da la vart dal nordost, ch'è probablamain vegnì construì il 11 avel tschientaner, è structurà cun lisenas. La baselgia è vegnida renovada l'onn 1939 e prolungada vers sidvest. Ella dispona da fanestras cun pictura grisaglia ed a l'intern d'ina scantschala cun intarsias ch'èn datadas cun l'onn 1656. L'altar dal chor deriva da l'anteriura baselgia parochiala da Boswil en l'Argovia ed è datà cun 1669 fin 1670. La proprietaria actuala è interessada da mantegnair l'entir bain immobigliar ed ha l'intenziun da sanar cumplettamain la baselgia. Per garantir il mantegniment da l'edifizi a lunga vista, èsi indispensabel da prender las mesiras previsas.

En il rom da la cussegliaziun da budget ha il Cussegl grond acceptà ils 9 da december 2025 las propostas da la Regenza e da las dretgiras pertutgant ils meds finanzials necessaris per la cumpensaziun da la chareschia en la dimensiun da la chareschia annuala effectiva betg gulivada tenor il stadi da l'index dal november 2025. La chareschia annuala betg gulivada per il november 2025 importa 0,0 pertschient. Ils salaris fundamentals da las collavuraturas e dals collavuraturs da l'administraziun chantunala, dals instituts chantunals autonoms da dretg public sco er da las dretgiras e da las autoritads da mediaziun chantunalas, e las tariffas da la salarisaziun minimalas per las persunas d'instrucziun da las scolas popularas publicas na vegnan pia betg midads per l'onn 2026.

Infurmaziuns: Departament da finanzas e vischnancas

La Regenza ha prendì enconuschientscha dal fatg, ch'ils suandants projects federals vegnan suttamess a la votaziun dal pievel la dumengia dals 8 da mars 2026:

• Iniziativa dal pievel «Gea ad ina valuta svizra libra ed independenta cun munaida u bancnotas (Il daner contant è libertad)» e cuntraproposta directa Conclus federal davart la valuta svizra ed il provediment cun daner contant (FF 2025 2885 2886);

• Iniziativa dal pievel «200 francs bastan! (Iniziativa SSR)» (FF 2025 2887);

• Iniziativa dal pievel «Per ina politica energetica e climatica gista: investir per la prosperitad, la lavur e l'ambient (Iniziativa per in fond per il clima)» (FF 2025 2888);

• Lescha federala dals 20 da zercladur 2025 davart l'imposiziun da taglia individuala (FF 2025 2033).

Sin plaun chantunal n'èn previs nagins projects da votaziun ils 8 da mars 2026.

Infurmaziuns: Chanzlia chantunala