L'administraziun chantunala duai far sias acquisiziuns da nov tenor ils basegns sco er en moda persistenta e faira. Per quest intent ha la Regenza concludì novas directivas che han l'intent da schanegiar las resursas e da promover l'innovaziun e che duain prestar ina contribuziun impurtanta a la finamira climatica da netto nulla emissiuns fin l'onn 2040.
Cun ils novs princips d'acquisiziun fixescha la Regenza ina cultura da surdada cuminaivla per l'administraziun chantunala. Qua tras duain ils meds finanzials publics vegnir impundids cun responsabladad e las differentas resursas duain vegnir schanegiadas. «Tar las acquisiziuns chantunalas vegn il focus mess en l'avegnir pli fitg sin ils custs dal ciclus vital, sin criteris qualitativs ed ecologics e sin standards socials», di la cussegliera guvernativa Carmelia Maissen, scheffa dal Departament d'infrastructura, energia e mobilitad. Ina impurtanza speziala survegn l'economia circulara: Ils materials ed ils products duain vegnir duvrads uschè ditg sco pussaivel, la quantitad da rument duai vegnir reducida e las emissiuns da CO₂ duain vegnir sminuidas. Uschia realisescha il Grischun las pretensiuns dal nov dretg d'acquisiziun sco er da la nova Lescha grischuna davart il clima e l'innovaziun (LGCI).
Trais princips directivs per las acquisiziuns chantunalas
L'administraziun chantunala fa sias acquisiziuns tenor ils suandants trais princips:
- Tenor ils basegns: Examinar en moda critica il basegn effectiv e nizzegiar meglier las resursas existentas – per exempel cun reparar, reciclar, prender en locaziun u utilisar cuminaivlamain ina chaussa.
- Persistent: Giuditgar acquisiziuns cun resguardar lur entir ciclus da vita, favurisar soluziuns da circulaziun e pretender ch'ils dretgs umans ed ils standards da lavur vegnian observads.
- Fair: Promover proceduras transparentas e chapaivlas sco er ina collavuraziun colleghiala cun ils offerents.
L'administraziun sco exempel per la protecziun dal clima
Sco gronda incumbensadra publica impunda l'administraziun chantunala mintg'onn plirs tschients milliuns francs daners da taglia per prestaziuns da construcziun, per rauba e per servetschs – in factur impurtant per l'innovaziun, per ils standards dal martgà e per schanegiar las resursas. La Regenza spetga che tut ils posts da servetsch applitgeschian ils novs princips; els duain er vegnir resguardads per projects che vegnan cofinanziads dal chantun. E la cussegliera guvernativa Carmelia Maissen cumplettescha: «Acquisiziuns ch'èn orientadas a l'economia circulara rinforzan er l'economia regiunala, stgaffeschan novs models da fatschenta ed augmentan la resilienza envers chadainas da furniziun globalas.» La Regenza envida las vischnancas, ulteriurs incumbensaders publics sco er persunas privatas da medemamain surpigliar ils princips d'acquisiziun.
Scolaziun e monitoring per segirar la realisaziun
En connex cun la realisaziun sustegna il Center da cumpetenza per las acquisiziuns publicas ils departaments ed ils posts da servetsch cun scolaziuns, cun l'accumpagnament da projects da pilot, cun mussavias e cun recumandaziuns concretas, per exempel davart apparats dad IT, mobigliar, textilias, projects da construcziun u cun purschidas en il sectur d'alimentaziun. In monitoring cun in barat d'experientschas regular mussa ils svilups e permetta da far adattaziuns. Uschia vegn la nova cultura d'acquisiziuns francada duraivlamain entaifer l'administraziun.
Agiunta:
Princips d'acquisiziun per l'administraziun chantunala
Infurmaziuns:
Cussegliera guvernativa dr. Carmelia Maissen, scheffa dal Departament d'infrastructura, tel. +41 81 257 36 05 (cuntanschibla da las 13.30 fin las 14.00), e‑mail Carmelia.Maissen@diem.gr.ch
Responsabladad: Regenza