Suenter il 2004 èsi la segunda giada ch'il Grischun dastga sa preschentar sco chantun ospitant a la festa da primavaira en la citad da Turitg. Avant 1 onn ha la Regenza grischuna acceptà ina invitaziun correspundenta dal Comité central da las zunfts da Turitg (Zentralkomitee der Zünfte Zürichs, ZZZ) e deliberà ina summa da 500 000 francs per quest intent.

«Il Grischun sa preschenta en moda tradiziunala, ma er moderna – lucca e confurm al temp. Oramai propi patgific», declera il president da la Regenza Marcus Caduff, che presidiescha il comité d'organisaziun. Il motto «propi patgific» reflectescha il sentiment da vita grischun – ina maschaida da calma e giudiment.

En moda tradiziunala tras las vias da Turitg
Glindesdi, ils 20 d'avrigl 2026, passan 3500 commembers da las zunfts en il cortegi tradiziunal tras la citad fin a la plazza dal Sechseläuten, nua ch'il «Böögg» vegn ars. Sco chantun ospitant participescha il Grischun cun in'atgna delegaziun da 240 persunas. Flancads da bandieras da vischnancas passan dunnas en costums e guids da muntogna en vestgadira istorica e moderna tras las vias da Turitg. Er il retg da la lutga, Armon Orlik, ed il lutgader da cranz federal, Christian Biäsch, accumpognan ina gruppa da giuvens lutgaders al cortegi.

Gia la dumengia, ils 19 d'avrigl 2026, ha lieu il cortegi dals uffants. La delegaziun grischuna cumpiglia uffants da tschintg chors d'uffants che chantan chanzuns da tut las trais regiuns linguisticas. Ils circa 150 uffants portan vestgids cun motivs d'istorgias d'uffants enconuschentas dal Grischun, per exempel Heidi u Uorsin.

Lieu d'inscunter Lindenhof – sentir il Grischun «propi patgific»
Sentir tut las fassettas dal Grischun – quai pon ins durant quatter dis sin il Lindenhof. Differentas oasas envidan da far ina pausa e permettan da viver la cultura grischuna e las muntognas amez la citad. Sin in martgà da giudiment vegnan purschidas spezialitads grischunas e products d'artisanadi da tut las regiuns dal chantun. Per divertiment procuran musicistas e musicists da differents geners en rumantsch, tudestg e talian. E la sonda durant la party da schlaghers «Schnulz im Sulz» pon ils fans da l'après-ski dar adia a l'enviern.

Las «emnas grischunas» sveglian in plaschair anticipà
Cun las «emnas grischunas» en il Schweizer Heimatwerk a Turitg preannunzia il Grischun il Sechseläuten 2026: Durant circa 3 emnas porta in program cumpact cumponì da lingua, cultura ed artisanadi – adina cundì cun ina buccada culinarica grischuna – regiunalitads autenticas en la citad a la Limmat e fa gust sin il Grischun.

Dapli detagls da la preschentaziun ospitanta vegnan publitgads cuntinuadamain sin www.gastkanton-graubuenden.ch.

Logo da la preschentaziun ospitanta:

Infurmaziuns:

• President da la Regenza Marcus Caduff, schef dal Departament d'economia publica e fatgs socials e president dal comité d'organisaziun, e‑mail Marcus.Caduff@dvs.gr.ch
• Marcus Hassler, secretari general dal Departament d'economia publica e fatgs socials e schef dal comité d'organisaziun, tel. +41 81 257 23 12 (cuntanschibel da las 13.30 fin las 14.00), e‑mail Marcus.Hassler@dvs.gr.ch

Responsabladad: Departament d'economia publica e fatgs socials