La Regenza ha concludì da metter en vigur per il 1. da schaner 2026 la revisiun parziala da la Lescha da taglia per il chantun Grischun (LT), ch'il Cussegl grond aveva concludì ils 28 d'avust 2025. Entaifer il termin da referendum, ch'è scadì ils 9 da december 2025, n'èn vegnids inoltrads nagins referendums. Tras la revisiun parziala vegnan auzadas las deducziuns dals custs per la tgira d'uffants tras terzas persunas, las deducziuns per conjugals cun duas pajas sco er las deducziuns per uffants. A famiglias ed a pèrs maridads cun duas pajas duai quai purtar ina distgargia fiscala.

Infurmaziuns: Departament da finanzas e vischnancas

La Regenza sustegna l'intenziun da la Fundaziun Scola interchantunala da selviculturs Maiavilla (Fundaziun SISM) d'accelerar la planisaziun da la sanaziun totala da las immobiglias dal Center da furmaziun per il guaud Maiavilla (CFGM) e d'exequir lavurs da sanaziun urgentas. Per quest intent ha ella garantì a la Fundaziun SISM, per ils onns 2026 fin 2032, contribuziuns d'investiziun da circa 218 900 francs per onn resp. da tut en tut maximalmain circa 1,53 milliuns francs. Il CFGM procura che la furmaziun forestala tegnia quint da las pretensiuns e dal svilup en la branscha forestala, ma er ch'ils chantuns da fundaziun ed il Principadi da Liechtenstein hajan a disposiziun in center da cumpetenza per la scolaziun, per il perfecziunament e per la furmaziun supplementara da lur persunal forestal.

La Fundaziun SISM ha construì ils onns 1970 a Maiavilla la scola da selviculturs, che vegn duvrada anc oz. Ussa dovran quests edifizis dentant ina sanaziun considerabla. Sin basa d'ina diagnosa cumplessiva ha l'Uffizi da construcziun auta dal Grischun elavurà ina planisaziun per sanar ils edifizis a lunga vista, cun investiziuns da tut en tut circa 6,8 milliuns francs fin l'onn 2040. En in'emprima etappa dal 2026 fin il 2032 vegnan exequidas las lavurs las pli urgentas, sco la chanalisaziun, ils tetgs, la tecnica da chasa ed ils locals sanitars. Ulteriuras renovaziuns vegnan fatgas a partir da l'onn 2033 per mantegnair duraivlamain ils edifizis.

La Regenza ha renovà pliras incaricas da prestaziun dal chantun Grischun cun organisaziuns dal sectur social per ils onns 2026 fin 2029:

L'incarica da prestaziun cun l'uniun Caritas Grischun cumpiglia la tschertga e l'intermediaziun da spazi d'abitar per fugitivas e fugitivs sco er per fugitivas e fugitivs admess provisoricamain. Per incumbensa dals servetschs socials chantunals tschertga ed intermediescha la Caritas abitaziuns per las persunas autorisadas e liquidescha la surpigliada e la restituziun da l'abitaziun.

L'incarica da prestaziun cun la Crusch cotschna svizra dal Grischun cumpiglia la cussegliaziun e la promoziun da persunas sustegnidas dal maun public en il rom dal return en il mund da lavur. En quest connex sclerescha il «Post spezialisà per l'integraziun en il mund da lavur – Rait sociala» per exempel las abilitads e las pussaivladads da las clientas e dals clients. Sin basa da quai vegnan fixadas finamiras da promoziun e d'integraziun ch'èn accordadas cun la persuna respectiva.

L'uniun Crusch blaua dal Grischun furnescha dapi onns servetschs per il chantun Grischun a favur da persunas cun problems d'alcohol sco er a lur confamigliars ed a terzas persunas. Questa collavuraziun è vegnida reglada per l'emprima giada l'onn 2010 en ina incarica da prestaziun. Tenor l'incarica da prestaziun cusseglia la Crusch blaua dal Grischun persunas creschidas e famiglias pertutgadas da dependenza e presta lavur da publicitad.

Er l'incarica da prestaziun cun la fundaziun Chasa da dunnas dal Grischun vegn prolungada. La fundaziun ha l'intent da manar ina chasa da dunnas e da promover tut las stentas per proteger dunnas ed uffants ch'èn exponids a smanatschas psichicas e fisicas. Uschia metta la Chasa da dunnas dal Grischun a disposiziun ina purschida staziunara d'intervenziuns en cas da crisa, e quai a dunnas, a giuvenilas ed ad uffants ch'èn pertutgads da violenza fisica, psichica e/u sexualisada. Questa purschida nunbirocratica è cuntanschibla mintga di durant 24 uras.

Infurmaziuns: Departament d'economia publica e fatgs socials

Cun in pèr resalvas ha la Regenza approvà la revisiun totala da la planisaziun locala, che la vischnanca da Tschappina aveva concludì ils 19 da zercladur 2023. Uschia vegnan stgaffidas las premissas per ademplir las prescripziuns surordinadas dal dretg da la planisaziun dal territori.

Sin basa da la Lescha federala davart la planisaziun dal territori e dal Plan directiv chantunal en il sectur da l'abitadi ha la vischnanca da Tschappina examinà ed adattà las zonas da construcziun areguard la grondezza, la dimensiun e l'utilisaziun. Tut en tut ha ella reducì sias zonas d'abitar, maschadada e dal center (ZAMC) per circa 15 694 meters quadrat. La finala è l'entir project da planisaziun vegnì accordà cun ils pli novs plans da la mesiraziun funsila e cun las prescripziuns da la digitalisaziun.

Infurmaziuns: Departament d'economia publica e fatgs socials