La Regenza ha approvà in project per reducir la canera en la vischnanca da Luzein. Quel cumpiglia la via da St. Antönien davent dal sutpassadi da la viafier a Dalvazza sur Luzein fin a Pany sco er ils emprims 120 meters da la Raggaliastrasse a Pany.

Pervia dal surpassament da la limita d'immissiuns en il stadi da giudicament decisiv 2035 ston las duas vias vegnir sanadas. Il chantun sco proprietari da las vias è obligà da realisar la reducziun da la canera. En il rom dal project da sanaziun cunter la canera ha la Regenza approvà da reducir la sveltezza maximala generala sin in traject da la via da St. Antönien en la vischnanca da Luzein. La sveltezza vegn reducida dad 80 km/h a 60 km/h sin in traject da circa 995 meters.

Infurmaziuns: Departament d'infrastructura, energia e mobilitad

La Regenza ha approvà la revisiun parziala da la planisaziun locala che la vischnanca da Medel (Lucmagn) aveva concludì ils 2 da matg 2024. Il motiv decisiv per la nova planisaziun è stà particularmain quel da resguardar las prescripziuns dal dretg da planisaziun surordinà. L'emprima etappa da la revisiun dal dretg davart la planisaziun dal territori (LPT1) ha principalmain la finamira da franar l'extensiun da las zonas da construcziun sin il terren cultivà e da diriger il svilup dals abitadis vers anen.

Tut en tut ha la vischnanca da Medel (Lucmagn) reducì sia zona d'abitar, maschadada e dal center (ZAMC) per var 41 256 meters quadrat. Gist a Curaglia èn plinavant vegnidas segiradas las structuras verdas e las vias natiralas ch'èn fitg impurtantas per la qualitad d'abitar dal vitg, quai cun attribuir talas a la zona verda. La revisiun da la Lescha communala da construcziun cumpiglia en spezial l'adattaziun e consequentamain l'augment da las cifras d'utilisaziun e da las dimensiuns dals edifizis en tut las zonas da construcziun. Quai permetta da densifitgar la surfatscha d'abitadi confurm al maletg istoric dal lieu. La finala è l'entir project da planisaziun vegnì accordà cun ils pli novs plans da la mesiraziun funsila e cun las prescripziuns da la digitalisaziun.

© Comet Photoshopping ScRL / Dieter Enz

Infurmaziuns: Departament d'economia publica e fatgs socials