Trais vischnancas ed ina regiun èn s'annunziadas per organisar la sessiun extra muros 2027 dal Cussegl grond. La Conferenza da las presidentas e dals presidents ha decidì d'examinar pli detagliadamain la candidatura da la vischnanca da Val S. Pieder.

Per organisar la sessiun extra muros 2027 dal Cussegl grond han candidà las vischnancas da Scuol, San Murezzan e Val S. Pieder sco er la regiun Moesa. A chaschun da sia ultima sesida ha la Conferenza da las presidentas e dals presidents dal Cussegl grond (CP) examinà las candidaturas. Perquai che la CP ha l'incumbensa da suttametter in rapport ed ina proposta al Cussegl grond, ha ella preexaminà, tgenina da las quatter candidaturas ch'ella vuless persequitar vinavant.

Cunquai che tut las candidaturas eran fitg bunas, n‘èsi betg stà simpel da prender ina decisiun. La finala è vegnida tschernida la vischnanca da Val S. Pieder. Ses concept per la sessiun extra muros 2027 ha persvadì il meglier. La val laterala da la Surselva porscha in ambient optimal per realisar inscunters da la politica cun la populaziun indigena. Il presidi ed il Secretariat dal Cussegl grond vegnan ussa ad examinar pli detagliadamain la candidatura da la vischnanca da Val S. Pieder.

Previsiblamain vegn il Cussegl grond a decider durant la sessiun d'avrigl 2026 davart la surdada da l'organisaziun da la sessiun extra muros 2027.

Infurmaziuns:

Presidenta dal Cussegl grond Valérie Favre Accola, tel. +41 79 658 20 10, e‑mail valerie.favre@davos.gr.ch

Responsabladad: Cussegl grond