Co pon ins motivar dunnas giuvnas da s'engaschar en la politica? L'occurrenza «Politicras giuvnas, entrai per plaschair!» dals 4 da favrer en la Biblioteca da la citad da Cuira dat a mattas ed a dunnas giuvnas che s'interessan per la politica, l'occasiun da survegnir ina invista da las differentas pussaivladads da sa participar a la politica. Suenter il bainvegni tras la cussegliera guvernativa Carmelia Maissen rapportan politicras giuvnas sin il podium davart lur experientschas.

Las dunnas èn anc adina sutrepreschentadas en la politica grischuna, en gremis politics ed en funcziuns directivas. Ils motivs èn multifars. Tranter auter impedeschan las rollas tradiziunalas istoricas che las dunnas entran en la politica. La participaziun e la represchentanza adequata da tut la populaziun en gremis politics è dentant ina premissa per che la democrazia funcziunia e per che las decisiuns politicas sajan legitimadas.

L'occurrenza «Politicras giuvnas, entrai per plaschair!», che ha lieu ils 4 da favrer, da las 17.00 fin las 19.30, en la Biblioteca da la citad da Cuira, mussa a dunnas giuvnas ed a mattas da 13 fin 30 onns, che s'interessan per la politica, pussaivladads, co ch'ellas pon s'engaschar politicamain. Tematisada na vegn betg mo la lavur politica «formala» sco da sa metter a disposiziun per in'elecziun, mabain er las pussaivladads da cooperar politicamain davos las culissas u en in'autra moda e maniera. L'occurrenza serva pia sco impuls da motivaziun, sco agid d'access e sco punct d'orientaziun.

Politicras sco exempels
Suenter il bainvegni tras la cussegliera guvernativa Carmelia Maissen rapportan politicras giuvnas davart las experientschas persunalas ch'ellas han fatg en il Cussegl grond, en la partida ed en activitads politicas. Sin il podium discutan Alessia Wehrli, presidenta dals Giuvens liberals dal Grischun e commembra da la suprastanza communala da Flem, Lydia Tobler, mainagestiun da la Verda Grischun, Nora Kaiser, deputada da la PS e presidenta da la Magistraglia Grischun, Sarina Caduff, presidenta dal Giuven Center Grischun e vicepresidenta da NextGen Surselva, sco er Mila Luzi, vicepresidenta da la Giuvna PPS dal Grischun.

Suenter ha lieu ina plazza da fiera cun purschidas politicas, nua che las partidas chantunalas giuvnas, parlaments da giuvenils, moviments politics ed iniziativas sa preschentan. Represchentads sin la plazza da fiera èn la Giuvna Verda, ils Giuvens liberals, la GS, il Giuven Center, la Giuvna PPS, la Sessiun dals giuvenils dal Grischun, la Sessiun federala dals giuvenils, il Collectiv feministic e NextGen Surselva. Las participantas pon sa far in maletg da la cuntrada politica dal Grischun, sa barattar e crear raits. L'occurrenza vegn cumplettada cun in aperitiv.

La participaziun è gratuita. Per facilitar la planisaziun vegni supplitgà da s'annunziar fin ils 28 da schaner sin la pagina d'internet www.stagl.gr.ch.

Fotografia agiuntada:

La politica dovra dunnas giuvnas engaschadas – qua al 5. Parlament grischun da mattas.
©Yanik Bürkli

Infurmaziuns:

Barbara Wülser, manadra dal Post da stab per l'egualitad da las schanzas per dunnas ed umens, tel. +41 81 257 35 71 (cuntanschibla da las 08.30 fin las 12.00), e‑mail Barbara.Wuelser@stagl.gr.ch

Responsabladad: Post da stab per l'egualitad da las schanzas per dunnas ed umens