A partir da glindesdi, ils 26 da schaner 2026, cumenza l'exposiziun publica dal project «Access Rosenhügel» sin la Via dal Güglia. La finamira dal project è da reglar da nov il traffic en ed ord la citad da Cuira sco er da distgargiar en moda persistenta la Kasernenstrasse.

Sur ils dus access Cuira Nord e Cuira Sid è la citad da Cuira colliada cun l'autostrada. Durant las uras da grond traffic èn la Kasernenstrasse e la Via da Masans sco er la zona Welschdörfli chargiadas e per part surchargiadas cun in traffic immens. En il rom da la «Strategia da mobilitad Cuira 2030» duai il «Access Rosenhügel» distgargiar en spezial la Kasernenstrasse.
L'idea da dar access al center da la citad da Cuira pli fitg sur la guntgida sid, existiva gia durant ils onns 1990. Cun integrar il project en il Program d'aglomeraziun federal è questa idea vegnida lantschada da nov e sviluppada vinavant da l'Uffizi da construcziun bassa dal Grischun en collavuraziun cun la citad da Cuira.

Nova ampla da traffic al Rosenhügel sco element central dal project
L'access existent al Rosenhügel vegn transfurmà ad ina cruschada cun ampla da traffic. Il traffic che arriva nà da l'access Cuira Sid da l'autostrada, po en il futur vegnir dirigì sur la guntgida sid, Via da Malix ed Obertor directamain en direcziun dal center da la citad.
A tuttas trais vias vers il nov access èn previsas zonas da spetga separadas mintgamai per las direcziuns respectivas. Uschia survegn la guntgida sid per exempel in vial per sviar a sanestra, che ha ina lunghezza da var 150 meters. Per realisar ils vials supplementars ston la Via da Malix sco er in traject parzial da la Via dal Güglia vegnir schlargiads da la vart da la val. Il schlargiament da la Via da Malix permetta ultra da quai da realisar – vers la muntogna – in vial da velo nuninterrut e gida uschia a meglierar la purschida per ciclistas e ciclists.

Rundella da l'Obertor: Adattaziun dal dretg da precedenza
Il nov reschim da traffic pretenda d'adattar las reglas da precedenza en la zona Obertor/Welschdörfli: Da nov ha la Via da Malix la precedenza envers la Kasernenstrasse. Il traffic che sorta dal Welschdörfli en direcziun dal center da la citad n'ha là en il futur nagina precedenza pli. «Il traffic public n'è betg tangà da quai», declera René Simeon, manader da la partiziun Construcziun da vias tar l'Uffizi da construcziun bassa dal Grischun. «Per dar la prioritad al traffic public tar la cruschada Welschdörfli/Via da Malix, èsi previs da reglar la precedenza dal bus cun in'ampla da traffic.»

Cruschada Sommerau: Orientaziun pli ferma a la guntgida sid
Cunquai che l'Access Rosenhügel vegn optimà, sto vegnir adattada er la cruschada Sommerau: Davent da l'access a l'autostrada mainan actualmain dus vials en direcziun dal center da la citad ed in vial a la guntgida sid. Per diriger il traffic vers l'access Rosenhügel, èn previs en il futur dus vials sin la guntgida sid en direcziun dal Rosenhügel ed in vial per l'access al center da la citad da Cuira.

Mesiras da protecziun cunter canera
Sche la Kasernenstrasse vegn distgargiada, vegn il traffic sin la guntgida sid a s'augmentar. Per quest motiv è vegnida elavurada in'expertisa da canera. Questa expertisa prevesa da construir ina paraid da protecziun cunter canera tranter la cruschada Sommerau e l'access Rosenhügel, quai per meglierar la situaziun da las abitantas e dals abitants.

La citad da Cuira examinescha mesiras accumpagnantas
Parallelamain al project «Access Rosenhügel» examinescha la citad da Cuira ulteriuras mesiras per regular il traffic. Ina da quellas è da manar il traffic mo sin in vial tras il Welschdörfli or da la citad. «Cun questa mesira vulessan nus impedir, ch'il vial per sviar a sanestra sin il Rosenhügel engrondeschia mo la capacitad dal traffic d'autos ed obtegnair il spustament giavischà», declera il cusseglier da la citad Simon Gredig. «Per quest intent analisain nus differentas opziuns en in model da traffic. L'opziun che ha il pli grond effect vegnin nus lura a realisar». Las mesiras da la tecnica da traffic na fan betg part dal project d'exposiziun, vegnan dentant concretisadas e communitgadas ils proxims mais.

Program da construcziun e custs
L'exposiziun publica dal «Access Rosenhügel» cumenza a partir dals 26 da schaner 2026. Suenter la scadenza dal termin legal da recurs e suenter la rectificaziun d'eventualas protestas vegn l'Uffizi da construcziun bassa ensemen cun la citad da Cuira ad elavurar il project d'execuziun. Il cumenzament da las lavurs da construcziun è previs per l'onn 2028, la realisaziun dura trais fin quatter onns. Tut en tut custa il project circa 18,7 milliuns francs. La Confederaziun sa participescha a quests custs cun totalmain circa 3,7 milliuns francs, quai sur il Program d'aglomeraziun. Ils custs restants vegnan dividids tranter il chantun Grischun e la citad da Cuira.

Fotografias agiuntadas:

Infurmaziuns:

• René Simeon, schef Construcziun da vias, Uffizi da construcziun bassa, tel. +41 81 257 37 85 (cuntanschibel da las 10.00 fin las 11.30), e‑mail Rene.Simeon@tba.gr.ch
• Simon Gredig, cusseglier da la citad da Cuira, tel. +41 81 254 47 00, e‑mail simon.gredig@chur.ch

Responsabladad: Uffizi da construcziun bassa dal Grischun / citad da Cuira