La Regenza ha suttamess al Cussegl grond il sboz per ina revisiun parziala da la Constituziun chantunala e da la Lescha davart ils dretgs politics en il chantun Grischun. Cun il project duai vegnir introducida la vegliadetgna da votar 16.

Vegnida incitada è la revisiun parziala da la Constituziun chantunala tras l'incumbensa Derungs concernent l'introducziun dal dretg da votar a la vegliadetgna da 16 onns (dretg d'eleger e da votar activ), ch'è vegnida acceptada dal Cussegl grond ils 16 da zercladur 2022. L'incumbensa vul che la Constituziun chantunala vegnia midada en quel senn, che persunas ch'èn domiciliadas en il Grischun, che han il dretg da burgais svizzer e che han cumplenì 16 onns, hajan il dretg da votar en chaussas chantunalas e communalas. La basa giuridica respectiva duai vegnir stgaffida tras la revisiun parziala da la Constituziun chantunala.

Adattaziuns er per giuvnas Svizras e giuvens Svizzers a l'exteriur
Per mantegnair l'egualitad giuridica e per avair ina regulaziun generala coerenta propona la Regenza a medem temp ina midada da la Lescha davart ils dretgs politics. Qua tras duai il dretg d'eleger activ ed il dretg da votar en chaussas chantunalas vegnir francà er per Svizras e Svizzers a l'exteriur che han cumplenì 16 onns. Sche las Svizras ed ils Svizzers a l'exteriur duain dastgar votar er en chaussas communalas, decidan las vischnancas vinavant sezzas.

En il Cussegl grond è la debatta davart il project previsa per la sessiun d'avrigl 2026. Sch'il Cussegl grond accepta la revisiun parziala, vegn il project suttamess ils 27 da settember 2026 a la votaziun dal pievel. En cas d'in «gea» duain las disposiziuns revedidas da la Constituziun e da la lescha vegnir messas en vigur l'onn 2027.

Agiunta:

Missiva

Infurmaziuns:

President da la Regenza Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 10.00 fin las 11.00), e‑mail Martin.Buehler@dfg.gr.ch

Responsabladad: Regenza