La Regenza ha deliberà la missiva tar la Lescha davart la furmaziun professiunala superiura (LFPS) per mauns dal Cussegl grond. Cun questa lescha autonoma duai la furmaziun professiunala superiura vegnir rinforzada sistematicamain ed adattada als svilups da la politica dal martgà da lavur. Il Cussegl grond vegn a tractar questa fatschenta durant la sessiun d'avrigl 2026.
La Regenza suttametta al Cussegl grond ina Lescha autonoma davart la furmaziun professiunala superiura (LFPS), per rinforzar sistematicamain quest sectur da furmaziun ch'è impurtant per il Grischun e per augmentar sia evidenza. En vista a la mancanza da persunas spezialisadas ed a la gronda impurtanza economica da la furmaziun professiunala superiura per l'economia da las interpresas pitschnas e mesaunas e per l'urbarisaziun dal chantun, duai la furmaziun professiunala superiura vegnir reglada en l'avegnir en in'atgna lescha. Uschia vegn il sistem da furmaziun dual sin il stgalim terziar represchentà cun duas leschas cumplementaras – cun la LFPS per la furmaziun professiunala superiura orientada a la pratica e cun la Lescha existenta davart las scolas autas e la perscrutaziun (LSAP).
La nova lescha procura per cundiziuns generalas modernas, quai cun pussibilitar – ultra da la finanziaziun da deficit – da nov er la finanziaziun pauschala da las scolas spezialisadas superiuras purtadas da privats. Previs èsi ch'il Cussegl grond tractia la Lescha en la sessiun d'avrigl 2026, e che las leschas e las ordinaziuns respectivas entrian en vigur il 1. da schaner 2027.
Agiunta:
Missiva
Infurmaziuns:
Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 14.00 fin las 14.30), e‑mail Jondomenic.Parolini@ekud.gr.ch
Responsabladad: Regenza