En il rom d'ina emprova da pilot publitgescha la Polizia chantunala dal Grischun ina schelta da lieus, nua che indrizs da mesiraziun da la sveltezza semistaziunars èn plazzads. La finamira è da cumparegliar surpassaments da la sveltezza cun e senza inditgar ils lieus.
L'emprova da pilot cumenza il 1. da mars 2026 e dura 5 mais. Sin la pagina d'internet da la Polizia chantunala dal Grischun vegnan publitgads ils lieus e las vias, nua ch'ils indrizs da mesiraziun da la sveltezza semistaziunars èn plazzads. Exceptads èn lieus en la vischinanza d'ospitals, da chasas da persunas attempadas e da tgira, da scolas e da scolinas.
Cumparegliaziun: cun e senza indicaziun dal lieu
Per pudair cumparegliar ils surpassaments da la sveltezza cun e senza inditgar il lieu, ston singulas mesiraziuns da l'emprova da pilot vegnir fatgas en ils medems lieus sco l'onn avant. En l'evaluaziun vegnan las cuntravenziuns gruppadas tenor la derivanza dals vehichels (chantun Grischun, rest da la Svizra ed exteriur). Uschia po il traffic da vacanzas e d'excursiun vegnir differenzià dal traffic entaifer il chantun. Relevants per l'evaluaziun èn er facturs betg influenzabels, sco l'aura, la temperatura u il temp da vacanzas. Tuttina dastgan ins quintar cun tscherts resultats signifitgants.
Augment da la segirezza stradala?
Sin fundament d'ina dumonda dal Cussegl grond en la sessiun da favrer 2025 ha la Regenza acceptà da publitgar ils lieus d'indrizs da mesiraziun da la sveltezza en il rom d'ina emprova da pilot. Quai, cumbain ch'ella na spetga strusch, ch'ina tala publicaziun pudess augmentar la segirezza stradala. En il rom da l'emprova da pilot duain vegnir rimnadas experientschas, ed a medem temp duain vegnir analisadas las experientschas d'auters chantuns. In rapport d'evaluaziun vegn ad esser la basa per l'ulteriur proceder.
Infurmaziuns:
Lukas Christen, schef Polizia da traffic da la Polizia chantunala dal Grischun (cuntanschibel da las 10.00 fin las 12.00)
Dumondas e fixaziuns da termins vegnan coordinadas dal Post da medias da la Polizia chantunala dal Grischun, tel. +41 81 257 79 50, e‑mail info@kapo.gr.ch
Responsabladad: Departament da giustia, segirezza e sanadad