La Regenza ha approvà in project per prolungar e renovar la gallaria da lavinas Val Urezza. Sin ina lunghezza da 138 meters protegia la gallaria la via dal Bernina cunter lavinas dals laviners da la Val d'Urezza e da la Val da Costa. Tut en tut custa il project circa 6,2 milliuns francs.

La gallaria da lavinas, che sa chatta circa trais kilometers en il nord da Poschiavo sin var 1200 meters sur mar, n'ademplescha betg pli cumplainamain las pretensiuns actualas da la segirezza da manaschi. Cun il project da construcziun vegnan stgaffidas cundiziuns da la tecnica da traffic e da segirezza che correspundan al standard actual per las vias da colliaziun en il chantun Grischun. Pervia da differentas distatgas da lavinas en il nord da la gallaria Val Urezza, prevesa il project da renovar la gallaria existenta e da la prolungar per circa 30 meters en direcziun nord vers il Pass dal Bernina. A medem temp vegn la via schlargiada ad ina ladezza dal vial d'almain 6,5 meters ed i vegn construì in vial da velo da la vart da la muntogna (1,5 m). Cun la renovaziun da quest traject vegn augmentada la segirezza dal traffic.

La Regenza ha approvà la cunvegna da prestaziun adattada cun il Salvament alpin svizzer (SAS). Il SAS duai garantir il salvament en las muntognas dal chantun Grischun e sustegnair il provediment da basa preclinic da la medischina d'urgenza en il chantun Grischun. En l'entir chantun duai dar da nov 600 first responders plus. Dapi il 1. da schaner 2026 fin ils 31 da december 2030 importa la contribuziun chantunala a favur dal SAS totalmain 899 640 francs per onn. Resalvada resta l'approvaziun dal credit annual tenor il preventiv tras il Cussegl grond.

Il SAS è il post da coordinaziun central per il salvament da muntogna en Svizra. En acziun vegnan qua er ils first responders plus. Ils first responders plus porschan l'emprim agid a pazientas e pazients d'urgenza, a persunas ch'èn daventadas grevamain malsaunas u che han gì in grev accident en territoris dal chantun senza ina basa d'ambulanza, nua ch'ils servetschs da salvament professiunals arrivassan cun grond retard al lieu d'acziun. En quests territoris, nua ch'i capitan mo paucs cas, instradeschan ils first responders plus las mesiras adequatas d'emprim agid, pia mesiras extendidas che salvan la vita e che mantegnan la sanadad, fin ch'ils servetschs d'acziun professiunals arrivan al lieu. Perquai ch'il dumber d'acziuns s'augmenta, sto il Salvament alpin grischun (SAG) metter a disposiziun dapli first responders plus. Actualmain metta il SAG a disposiziun 450 first responders plus. Cun la cunvegna da prestaziun adattada duai il SAG recrutar supplementarmain 150 first responders plus.

 © Alpine Rettung Schweiz ARS

Infurmaziuns: Departament da giustia, segirezza e sanadad