Dals 16 fin ils 22 da mars 2026 ha lieu la segunda Emna d'acziun chantunala cunter il rassissem en il Grischun. Ensemen cun differentas organisaziuns, instituziuns e gruppas engaschadas metta il chantun uschia in signal cunter la discriminaziun e per ina societad averta ed inclusiva.
Suenter che la premiera da l'Emna d'acziun cunter il rassissem ha gì grond success l'onn passà, ha lieu dals 16 fin ils 22 da mars 2026 la segunda emna d'acziun. Danovamain mettan las numerusas persunas che coopereschan, in segn visibel cunter la discriminaziun e per ina societad averta. En l'entir chantun vegnan organisadas durant in'emna occurrenzas che envidan da tadlar, reflectar e d'entrar en in discurs in cun l'auter. Prelecziuns, discussiuns, exposiziuns, acziuns da scolas, formats da film, workshops ed occurrenzas d'inscunter avran differentas perspectivas sin in tema che n'ha er il 2026 betg pers sia actualitad.
Il rassissem n'è betg adina dad aut ed evident. Savens sa mussa el en moda subtila en il mintgadi, en la lingua, en maletgs u tras schanzas inegualas. Gist perquai resti impurtant d'esser attent, premurus ed alert. L'emna d'acziun creescha spazis per in dialog, rinforza la savida e fa curaschi da surpigliar responsabladad.
L'emna d'acziun vegn averta uffizialmain glindesdi, ils 16 da mars 2026 a las 18.00, en il restaurant Marsöl tras il cusseglier guvernativ Peter Peyer, schef dal Departament da giustia, segirezza e sanadad. A chaschun da la saira d'avertura ch'è publica, prelegia l'autura e schurnalista Angélique Beldner or da ses cudesch actual «Rassismus im Rückspiegel». Ses texts rendan palpablas dimensiuns persunalas e socialas d'exclusiun ed envidan da reflectar e discutar cuminaivlamain. Cun la prelecziun dad Angélique Beldner, ch'è enconuschenta sco schurnalista da novitads da la Tagesschau svizra, survegn la saira d'avertura ina vusch prominenta ed a medem temp persunala.
In vast engaschi en il chantun
Il program da l'Emna d'acziun cunter il rassissem mussa, quant different che l'engaschi cunter il rassissem po esser: Scolaras e scolars mettan segns en il spazi public, museums ed instituziuns culturalas tractan il tema ord vista istorica e litterara, creaturas e creaturs culturals envidan a discurs, musica e teater, uniuns procuran per inscunters, e rundas da discussiun sa deditgeschan a dumondas actualas da la societad e dal mund da lavur.
Bleras purschidas sa drizzan explicitamain a persunas giuvnas. Perquai che sensibilisaziun, savida e curaschi civil sa sviluppan cunzunt là en moda spezialmain persistenta, nua ch'i vegnan stgaffids gia baud spazis per sa barattar e sa participar.
Star ensemen e mussar tenuta
L'emna d'acziun na vul betg mo infurmar, mabain muventar. Ella rinforza la coesiun sociala e renda visibel che respect, dignitad e participaziun na sa chapeschan betg da sez, mabain ston adina puspè vegnir exercitads e defendids da nov. Tut las occurrenzas èn gratuitas.
Avertura da l'emna d'acziun: Glindesdi, ils 16 da mars 2026, a las 18.00 en il Marsöl a Cuira en preschientscha dal cusseglier guvernativ Peter Peyer, schef dal Departament da giustia, segirezza e sanadad. Input tematic dad Angélique Beldner cun ina prelecziun or da ses nov cudesch «Rassismus im Rückspiegel».
Il program detaglià chattais Vus sut www.rassismusberatung.gr.ch
Infurmaziuns:
Felix Birchler, manader dal Post spezialisà per l'integraziun / incumbensà chantunal d'integraziun, Uffizi da migraziun e da dretg civil, tel. +41 81 257 36 84 (cuntanschibel da las 10.00 fin las 12.00), e‑mail Felix.Birchler@afm.gr.ch
Responsabladad: Uffizi da migraziun e da dretg civil