L'Uffizi da construcziun bassa dal Grischun fa lavurs da segirada en il tunnel Las Ruinas. Per quest intent sto la via dal Lucmagn tranter Mustér e Curaglia, vegnir serrada da glindesdi, ils 2 da mars, fin venderdi, ils 27 da mars 2026, mintgamai da las 22.00 fin las 06.00 per tut il traffic.
En il rom da la correcziun da la via dal Lucmagn tranter Las Ruinas e la punt dal Rain da Medel vegn tranter auter il tunnel Las Ruinas reconstruì sin ina lunghezza da var 500 meters. Decisiv per la reconstrucziun è particularmain il nausch stadi architectonic dal tunnel existent sco er da duas gallarias sin quest traject. Plinavant na correspunda il profil interiur betg pli a las pretensiuns dad oz. Il tunnel existent resta en funcziun durant l'entir temp da construcziun che dura dal 2026 fin il 2029, uschia ch'il traffic po anc adina passar.
Lavurs da segirada en il tunnel existent
Perquai che tscherts trajects dal nov tunnel vegnan ad esser situads en la proxima vischinanza dal tunnel existent, dovri ulteriuras lavurs da segirada. Cun questas lavurs preparatoricas garantescha l'Uffizi da construcziun bassa la stabilitad da l'ovra existenta sco er la segirezza per il traffic ordinari durant il temp da construcziun.
Serrada durant la notg cun dus passadis pussaivels
Per minimar uschè fitg sco pussaivel las restricziuns per las participantas ed ils participants dal traffic, vegnan las lavurs fatgas durant la notg. La via dal Lucmagn è perquai serrada sin il traject tranter Mustér e Curaglia da glindesdi, ils 2 da mars, fin venderdi, ils 27 da mars, mintgamai da glindesdi saira fin sonda en damaun da las 22.00 fin las 06.00. Da las 00.00 fin las 00.15 sco er da las 04.00 fin las 04.15 vegn il traject dà liber durant mintgamai 15 minutas per las participantas ed ils participants dal traffic. Ciclistas e ciclists sco er pedunas e peduns na pon betg passar il plazzal. Durant il di sco er durant las notgs da sonda sin dumengia e da dumengia sin glindesdi resta la via charrabla sco usità.
Fotografia agiuntada:
Il tunnel existent Las Ruinas vegn segirà pervia da las lavurs da construcziun vegnintas.
Infurmaziuns:
René Simeon, schef Construcziun da vias, Uffizi da construcziun bassa, tel. +41 81 257 37 85 (cuntanschibel da las 13.00 fin las 14.30), e‑mail Rene.Simeon@tba.gr.ch
Responsabladad: Uffizi da construcziun bassa