La mazlaria dal Stabiliment giudizial Realta a Cazas vegn reaverta il cumenzament da mars. Cun in nov mazler, in concept da manaschi reelavurà sco er in nov sistem per administrar la rauba vegnan fixadas novas normas per garantir la qualitad e per persequitar enavos la charn.
Avant circa in onn e mez aveva ina denunzia penala procurà per ina controlla tras l'Inspecturat chantunal da victualias e suenter per la serrada da la mazlaria. Sin quai aveva l'Uffizi per l'execuziun giudiziala ordinà immediatamain da controllar la decleraziun e da persequitar enavos la provegnientscha da la charn en la mazlaria dal stabiliment giudizial. «Nus avain emprendì da quest incap che nus deplorain anc adina fitg», di Padruot Salzgeber. «Entant avain nus analisà ils process interns e reelavurà il concept da manaschi sco er l'administraziun da la rauba. Ussa essan nus pronts da puspè vender noss products sut novas premissas e cun ademplir tut las prescripziuns», uschia Salzgeber.
Ils products appreziads pon puspè vegnir cumprads
Per la clientella signifitga la reavertura da la mazlaria a Realta, ch'ella po a partir da mez mars puspè cumprar charn dal manaschi agricul dal Stabiliment giudizial Realta en l'atgna butia dal bain. Latiers tutga ina purschida selecziunada da charn-bov e da charn-portg frestga e pli tard er da charn setga sco er da liongias setgas. Er l'alimentaziun da las persunas collocadas dals dus stabiliments giudizials Realta e Cazas Tignez sco er da las collavuraturas e dals collavuraturs en las cantinas da persunal dals dus stabiliments giudizials vegn puspè cumplettada cun charn da l'agen bain puril.
«Nus essan conscients da la responsabladad»
«Nus avain fatg noss pensums e tschentà nossa mazlaria cun in nov collavuratur e cun andaments reelavurads sin in nov fundament. Ussa ans legrain nus da bainbaud puspè dastgar servir nossas clientas e noss clients cun atgna charn», constatescha Salzgeber cun cuntentientscha davart la reavertura da la mazlaria dal Stabiliment giudizial Realta.
Infurmaziuns:
Padruot Salzgeber, directur dal Stabiliment giudizial Realta, tel. +41 81 257 46 00 (cuntanschibel da las 14.00 fin las 15.00), e‑mail Padruot.Salzgeber@ajv.gr.ch
Responsabladad: Uffizi per l'execuziun giudiziala