La Regenza renovescha il mandat per il management da la marca sco er per la gestiun dal secretariat da la marca «graubünden». A partir dal 2027 surpiglia la firma communicaziun.ch il mandat.
Avant 2 onns ha il Departament d'economia publica e fatgs socials (DES) fatg in'evaluaziun dal «Secretariat da la marca graubünden». L'evaluaziun mussa in maletg positiv da la gestiun d'enfin ussa da la marca. Per motivs dal dretg d'acquisiziun ha il DES decidì da puspè publitgar uffizialmain la gestiun dal secretariat suenter l'onn 2016.
Surdada dal mandat suenter la publicaziun uffiziala
En il rom da la publicaziun uffiziala tras l'Uffizi per economia e turissem, han quatter interpresas inoltrà in'offerta. Tut las offertas èn vegnidas giuditgadas tenor ils criteris d'agiudicaziun. Quests criteris èn la qualitad da la proposta per proceder ed organisar il mandat, l'experientscha cun mandats sumegliants, la cumpetenza da l'offerent e da las persunas decisivas sco er ils pretschs.
Suenter la procedura d'acquisiziun ha la Regenza surdà il mandat «management da la marca graubünden inclusiv gestiun dal secretariat» a la firma communicaziun.ch a Glion. Per il mandat da 5 onns (2027–2031) vala ina limita da custs da 596 000 francs per onn. Tenor il giudicament general ha la firma communicaziun.ch inoltrà in'offerta persvadenta areguard la strategia ed il process. Il mandat cumenza il schaner 2027 sut la direcziun dad Armin Spescha.
graubünden – dapi 23 onns ina marca dal lieu
L'onn 2003 è la marca «graubünden» vegnida lantschada sco marca dal lieu per il Grischun. Dapi lura è la marca cun il capricorn stilisà s'etablida cun success sin il martgà ed ha furnì ina contribuziun impurtanta per rinforzar duraivlamain il Grischun sco lieu da lavur, d'abitar e da temp liber.
L'onn 2013 han ins cumenzà ad orientar la marca a l'idea d'ina «metropola natirala» ed a la reorganisar ordaifer Grischun Vacanzas. Sin basa da quai è vegnì examinà il management da la marca. Il mandat per la gestiun dal secretariat è vegnì surdà l'onn 2017 a la firma Clerezza ScRL respectivamain Quant SA a Flem, sut la direcziun da Gieri Spescha. Il mandat è vegnì prolungà per ils onns 2020 fin 2022 sco er per 2023 fin 2025 respectivamain 2026.
Durant ils ultims 10 onns ha il mandatari vertent manà la marca «graubünden» en moda premurusa e cun success sco er influenzà decisivamain la strategia respectiva. Midar il mandatari extern è in grond pass. A medem temp vegn quest pass dentant er vesì sco schanza per sviluppar vinavant la marca «graubünden».
Infurmaziuns:
Cusseglier guvernativ Marcus Caduff, Departament d'economia publica e fatgs socials, tel. +41 81 257 44 60 (cuntanschibel da las 14.30 fin las 15.00), e‑mail Marcus.Caduff@dvs.gr.ch
Responsabladad: Regenza