Sa basond sin la Lescha per promover il svilup economic en il chantun Grischun ha la Regenza concedì ina contribuziun chantunala da maximalmain 3,9 milliuns francs a la Innhub La Punt SA per realisar il center d'innovaziun InnHub La Punt. La contribuziun chantunala è vegnida concedida sut il titel Infrastructuras relevantas per il sistem.

Il center d'innovaziun InnHub La Punt en la vischnanca da La Punt Chamues-ch è in project da construcziun extraordinari en quai che concerna la grondezza e la realisaziun architectonica. El duai colliar persunas e porscher ad organisaziuns, ad interpresas, a persunas che lavuran independentamain dal lieu sco er a giasts che cumbineschan la lavur cun lur vacanzas spazi sco er temp per co-creaziuns, innovaziun e transfurmaziun. Il project cumpiglia chombras d'hotel, abitaziuns secundaras explotadas, in restaurant, localitads per sesidas, in sectur da sport e da wellness sco er ina butia da sport. L'avertura dal center è previsa durant l'ultim quartal dal 2028. Il project è budgetà cun custs d'investiziun da 117,5 milliuns francs.

Foto 2 / Foto 3

© Innhub La Punt

Infurmaziuns: Departament d'economia publica e fatgs socials

La Regenza ha concedì ina contribuziun chantunala da maximalmain 8,01milliuns francs per proveder la regiun Surselva cun bindel ultralad (BUL).

Cun agid da la contribuziun chantunala duai la regiun survegnir in provediment cun infrastructuras persistentas da BUL che permettan sveltezzas da passa 100 Mbit/s. Quai è la premissa per far avanzar sistematicamain la transfurmaziun digitala en la regiun Surselva. Pervia da las tecnologias ed applicaziuns cun ina gronda intensitad da datas è il basegn da colliaziuns sveltas da bindel lad creschì ils ultims onns cuntinuadamain tant tar las interpresas sco er tar persunas privatas. In provediment commensurà da las regiuns en il chantun Grischun cun bindel ultralad da fitg gronda prestaziun è perquai da gronda impurtanza per realisar cun success la transfurmaziun digitala per mantegnair l'attractivitad dal chantun sco plazza economica e sco lieu da lavur e d'abitar. Per promover il provediment da las regiuns cun infrastructuras digitalas effizientas, sustegna il chantun la cumplettaziun da las infrastructuras a bindel ultralad cun meds finanzials or dal credit d'impegn per infrastructuras relevantas per il sistem.

Infurmaziuns: Departament d'economia publica e fatgs socials

La Regenza sustegna la renovaziun da las fermadas da bus a la staziun da Cuira tenor ils basegns da las persunas cun impediments. La mesira cun custs totals da circa 1,38 milliuns francs vegn renconuschida sco project subvenziunabel per promover il traffic public. Perquai ha la Regenza garantì a la citad da Cuira ina contribuziun chantunala da maximalmain 828 248 francs.

Tras la renovaziun da las fermadas da bus a la staziun da Cuira vegni garantì, che er passagieras e passagiers cun impediments possian entrar e sortir dals bus. Per quest intent vegn construì in perrun cun in ur da 22 cm (uschenumnà Kasseler Sonderbord). Il servetsch da transport vegn meglierà considerablamain cun questa mesira.

© BuS SA

Infurmaziuns: Departament d'infrastructura, energia e mobilitad

La Regenza ha approvà la revisiun totala da la planisaziun locala che la vischnanca da Trin ha concludì ils 21 da zercladur 2024. Il motiv decisiv per la nova planisaziun è stà quel da resguardar las prescripziuns dal dretg da planisaziun surordinà. L'emprima etappa da la revisiun dal dretg davart la planisaziun dal territori (LPT1) ha principalmain la finamira da franar l'extensiun da las zonas da construcziun en il terren cultivà e da diriger il svilup dals abitadis vers anen.

Tut en tut ha la vischnanca da Trin engrondì sia zona d'abitar, maschadada e dal center (ZAMC) per var 4311 meters quadrat. En il plan general da furmaziun ha ella plinavant segirà surfatschas libras e determinà areals da protecziun dal maletg dal lieu. La revisiun da la Lescha communala da construcziun cumpiglia particularmain l'exauriziun minimala da las cifras d'utilisaziun e da las dimensiuns dals edifizis admissiblas en tut las zonas da construcziun, uschia ch'i vegn pussibilitada in'utilisaziun pli spessa da la surfatscha d'abitadi. Plinavant è vegnida introducida in'obligaziun da surbajegiar las zonas da construcziun existentas entaifer in termin dad 8 onns. La finala è l'entir project da planisaziun vegnì accordà cun ils pli novs plans da la mesiraziun funsila e cun las prescripziuns da la digitalisaziun.

© Comet Photoshoping

Infurmaziuns: Departament d'economia publica e fatgs socials