La Regenza surdat il Premi grischun da cultura 2026 a l'artista Katharina Vonow. Il premi è dotà cun 30 000 francs. Enconuschenta sco fotografa e fotoreportadra, è Katharina Vonow ida gia baud ora en il mund, ha fatg ina scolaziun da guaridra, è sa perfecziunada sco artista figurativa e sco pictura ed è puspè turnada en il Grischun. Ella ha malegià, dissegnà, instruì ed ha puspè cumenzà a fotografar. Cun il Premi da cultura 2026 undrescha la Regenza la vita e la ritga ovra da l'artista.

Plinavant surdat la Regenza otg premis da renconuschientscha e tschintg premis da promoziun da mintgamai 20 000 francs.

Glista da tut las persunas premiadas da l'onn 2026

Infurmaziuns: Departament d'educaziun, cultura e protecziun da l'ambient

La Regenza ha prendì posiziun tar la consultaziun dal Departament federal da defensiun, protecziun da la populaziun e sport (DDPS) concernent il conclus federal davart il sustegn da la candidatura, da la preparaziun e da la realisaziun dals Gieus olimpics e paralimpics d'enviern 2038.

La Regenza sustegna ina candidatura naziunala decentrala per realisar gieus olimpics e paralimpics d'enviern en Svizra l'onn 2038. La candidatura svizra per ils Gieus olimpics e paralimpics d'enviern 2038 sa basa sin infrastructuras existentas e sin experientschas cun occurrenzas grondas passadas (p.ex. campiunadis mundials da biatlon 2025, da freestyle 2025 e da bob 2023). Cun Lai e cun Engiadina / San Murezzan fa il Grischun part dal concept naziunal. Sco pli grond chantun turistic da noss pajais dispona il Grischun da las cumpetenzas e da las infrastructuras per realisar occurrenzas grondas internaziunalas.

La Regenza beneventa, che la Confederaziun s'engascha finanzialmain en il rom previs a favur d'ina realisaziun en Svizra. Senza l'engaschament finanzial da la Confederaziun n'è ina candidatura naziunala betg pussaivla. Il medem vala per in engaschament da l'armada. Ils chantuns na sa participeschan betg directamain a la finanziaziun dal budget total da Switzerland 2038. Els han però acceptà da gidar a finanziar ils Gieus paralimpics d'enviern cun 60milliuns francs or dals retgavs dals gieus per daners. Dal rest n'èn els betg involvids directamain en la finanziaziun dal budget total da Switzerland 2038. Schebain il chantun Grischun vegn a prestar ina contribuziun finanziala als custs che las vischnancas grischunas da Lantsch, Vaz, Churwalden, San Murezzan, Schlarigna e Silvaplauna han da pajar a l'Uniun Switzerland 2038, vegn sclerì pli tard.

Cuntrari a projects anteriurs, ch'eran vegnids purtads dal maun public, sa tracti ussa d'in project privat. Il sustegn dal maun public (Confederaziun, chantuns, lieus da concurrenza) è mo subsidiar; ils process democratics necessaris en chaussa ston vegnir observads. Sco la Confederaziun n'è er il chantun Grischun betg pront da conceder ina garanzia da deficit als purtaders privats u al Comité internaziunal olimpic. 

Consultaziun dal Departament federal da defensiun, protecziun da la populaziun e sport (DDPS)

Infurmaziuns: Departament d'economia publica e fatgs socials

La Regenza ha prendì posiziun tar la consultaziun dal Departament federal per ambient, traffic, energia e communicaziun (DATEC) en connex cun la participaziun da la Confederaziun als custs per ils donns da malaura da la stad 2024. Las malauras da la stad 2024 han chaschunà donns considerabels vi da l'infrastructura, vi da territoris d'abitadi e vi da l'ambient. En il chantun Grischun èn stadas pertutgadas tut en tut sis vischnancas da la Mesolcina. Vegnidas tutgadas lunschor il pli fitg cumpareglià cun ils custs restants per persuna, èn las vischnancas da Lostallo e Soazza. Il project dal DATEC ha la finamira, ch'i restia a las vischnancas grischunas, tessinaisas e vallesanas ch'èn pertutgadas il pli fitg da las malauras, ina grevezza supportabla per persuna. Per la realisaziun sin plaun federal vegnan suttamess dus conclus ch'èn coordinads in cun l'auter: ina lescha federala ed in conclus da credit.

En sia posiziun engrazia la Regenza al Cussegl federal per sia prontezza da sa participar als custs restants da las vischnancas che han subì donns da malaura. La regulaziun proponida è in signal da solidaritad cun la populaziun pertutgada e renconuscha la sfidas spezialas, a las qualas las regiuns alpinas èn exponidas en cas d'auras extremas. En vista al fatg ch'ils eveniments da la natira daventan pli e pli frequents ed intensivs en consequenza da la midada dal clima, na dovri en l'avegnir però betg regulaziuns spezialas per cas singuls, mabain ina regulaziun legala duraivla che permetta da sustegnair las vischnancas pertutgadas en connex cun la superaziun d'eveniments da la natira extraordinaris. Regulaziuns spezialas èn adina er cumbinadas cun il privel d'in tractament inegual.

Consultaziun dal Departament federal per ambient, traffic, energia e communicaziun (DATEC)

Infurmaziuns: Departament d'infrastructura, energia e mobilitad

La Regenza ha respundì la petiziun «Tgira d'uffants pajabla per tuts», ch'era vegnida inoltrada ils 5 da december 2025 da la Cuminanza d'interess «Tgira d'uffants pajabla per tuts». Ils petiziunaris crititgeschan las consequenzas da la revisiun totala da la Lescha davart la promoziun da la tgira d'uffants cumplementara a la famiglia.

La Regenza ha examinà ils puncts crititgads. Ils emprims resultats ch'èn ussa avant maun mussan, che la finamira surordinada da la revisiun totala, numnadamain medemas reducziuns dals custs per famiglias cun medemas situaziuns d'entrada e da facultad, è vegnida cuntanschida. A medem temp è la dimensiun da las reducziuns dals custs da la tgira d'uffants cumplementara a la famiglia che vegnan concedidas dal maun public, creschida marcantamain l'onn 2025. Plinavant ha la Regenza identifitgà pass da realisaziun che gidan a cuntanscher las finamiras da la petiziun.

Resposta da la Regenza a la petiziun «Tgira d'uffants pajabla per tuts»

Infurmaziuns: Departament d'economia publica e fatgs socials