La Regenza ha concedì a la vischnanca da Lostallo ina contribuziun chantunala da maximalmain circa 511 000 francs per restabilir infrastructuras agriculas ch'eran vegnidas donnegiadas tras las malauras da la stad 2024. Ils custs totals imputabels per restabilir las infrastructuras donnegiadas importan var 1,72 milliuns francs. La contribuziun chantunala vegn concedida sut la premissa, che la Confederaziun garanteschia ina contribuziun correspundenta da 39 pertschient dals custs totals.

Las malauras dals 21 da zercladur 2024 han fatg donns considerabels vi d'infrastructuras, vi da territoris d'abitadi e vi da l'ambient en la Mesolcina. Stadas pertutgadas èn er numerusas infrastructuras agriculas en las vischnancas da Roveredo, Grono, Cama, Lostallo, Soazza e Mesauc. Per restabilir questas infrastructuras ha la vischnanca da Lostallo surpiglià la gestiun dals pajaments per la regiun ed endrizzà in conto separà per cudeschar tut ils quints. Ella incassescha las contribuziuns e reparta ils custs restants sin las vischnancas confurm al project. Per quest motiv vegnan las contribuziuns da la Confederaziun e dal chantun pajadas en moda centrala a la vischnanca da Lostallo.

Donns a Grono / © Cassa per donns elementars CDE

Infurmaziuns: Departament d'economia publica e fatgs socials

La Regenza ha inscrit l'Ospital Engiadin'Ota SA per il 1. d'avrigl 2026 sin la glista chantunala dals ospitals acutsomatics ed ha surdà a questa societad ina incarica da prestaziun per l'Ospital d'Engiadin'Ota a Samedan.

Dapi l'onn 2018 ha la Fundaziun Provediment da sanadad Engiadin'Ota (SGO) procurà per il provediment da la sanadad en la regiun da provediment da la sanadad Engiadin'Ota. La SGO ha manà tranter auter l'Ospital d'Engiadin'Ota a Samedan. La cunvegna da prestaziun tranter la SGO e las 11 vischnancas da la regiun da provediment da la sanadad Engiadin'Ota concernent il manaschi da l'Ospital d'Engiadin'Ota era limitada fin la fin da l'onn 2025. Perquai che betg tut las 11 vischnancas n'han dà lur consentiment, n'èsi betg stà pussaivel da far ina nova cunvegna. Per pudair garantir il provediment acut sco er la tgira da lunga durada en l'Engiadin'Ota a partir dal 1. d'avrigl 2026, èsi stà necessari da refurmar il provediment da la sanadad.

Areguard il provediment medicinal acut èsi ussa cler: La nova Ospital Engiadin'Ota SA (ch'è inscritta en il register da commerzi dapi ils 27 da favrer 2026) surpiglia il manaschi da l'Ospital d'Engiadin'Ota a Samedan cun effect a partir dal 1. d'avrigl 2026. Ella vegn a cuntinuar senza interrupziun cun il manaschi da l'ospital, che vegn manà vinavant sut il medem num. L'Ospital d'Engiadin'Ota a Samedan resta pia sin la glista dals ospitals acutsomatics dal chantun Grischun, quai cun ina incarica da prestaziun levamain reducida.

Infurmaziuns: Departament da giustia, segirezza e sanadad

La Regenza ha approvà il project da las mesiras immediatas gia realisadas per survegliar il lai dal glatscher da Calderas en la vischnanca da Surses. Per quest project ha ella concedì ina contribuziun tenor la Cunvegna da program da la nova gulivaziun da finanzas (NGF) cun la Confederaziun en il sectur «Ovras da protecziun Guaud». Als custs budgetads da 35 000 francs vegn garantida ina contribuziun chantunala da maximalmain 28 000 francs.

Il zercladur 2024 hai dà ina deflussiun spontana dal lai dal glatscher da Calderas. Grazia a l'intervenziun immediata dals pumpiers han ils edifizis da Tigias sin l'Alp Flix pudì vegnir preservads per gronda part da donns. Cun analisar l‘eveniment han ins constatà, ch'in scuflà era sa furmà durant l'enviern sur il scul natiral dal lai. Quest scuflà ha stuppà il scul, uschia ch'il livel dal lai è s'auzà durant la marschauna. Il cumenzament da la stad è l'aua rutta andetgamain tras il scuflà, ed il lai è puspè sa sbassà sin ses livel oriund. Las massas d'aua ch'èn idas aval han mobilisà fitg blera glera, quai che ha chaschunà bovas da glitta e transports da glera.

Perquai ch'ina situaziun sumeglianta avess pudì sa repeter gia il proxim enviern resp. la primavaira suandanta, èn vegnidas realisadas immediatamain mesiras d'urgenza. Ins ha installà ina camera da surveglianza sco er indrizs per mesirar il livel da la naiv. Uschia pon ins ussa observar, sch'i s'accumulescha durant la marschauna extraordinariamain blera aua en il lai e quant grond ch'in eventual scuflà al scul è.

Lai dal glatscher, anc avant l'installaziun da l'indriz da surveglianza

Indriz da surveglianza / © Pascal Murbach

Infurmaziuns: Departament d'infrastructura, energia e mobilitad

La Regenza ha approvà duas revisiuns parzialas da planisaziuns localas: d'ina vart quella da Silvaplauna, ch'è vegnida concludida da la vischnanca ils 28 da november 2024 – da l'autra quella da Surses, che la vischnanca ha concludì ils 9 da december 2024. Uschia stgaffescha la Regenza las premissas da la planisaziun d'utilisaziun per realisar ina senda da mountainbike e da viandar sur il Pass dal Güglia.

Il Surses e l'Engiadin'Ota duain vegnir colliads in cun l'auter cun ina senda da mountainbike e da viandar attractiva sur il Pass dal Güglia. Uschia duain ils potenzials dal turissem da mountainbike e dal viandar lontan vegnir exaurids pli fitg da tuttas duas varts dal pass. Per quest intent vulan las vischnancas da Surses e da Silvaplauna sanar la senda da viandar existenta sur il Pass dal Güglia e construir novs trajects, nua che quai è necessari, per uschia pussibilitar tranter Beiva e Silvaplauna ina colliaziun da mountainbike e da viandar che correspunda als basegns da las utilisadras e dals utilisaders.

Infurmaziuns: Departament d'economia publica e fatgs socials

L'administraziun chantunala sa participescha il zercladur 2026 a l'acziun «bike to work» da la Pro Velo Svizra. La Regenza ha surdà l'organisaziun a l'Uffizi per la natira e l'ambient, a l'Uffizi da sanadad, a l'Uffizi da persunal ed a l'Uffizi da construcziun bassa sco post spezialisà per il traffic betg motorisà. En il rom da questa acziun vegnan las collavuraturas ed ils collavuraturs envidads da sa participar ad in'equipa da quatter e da prender il velo per ir a lavurar, e quai durant almain la mesadad dals dis da lavur d'in mais. Dapi l'emprima ediziun, l'onn 2010, è l'administraziun chantunala dal Grischun sa participada mintg'onn a questa acziun. Abstrahà dals onns ch'èn stads pertutgads directamain da la pandemia da corona, è il dumber da participantas e participants creschì quasi cuntinuadamain durant quest temp ed è oz duas giadas uschè grond sco al cumenzament. Ils onns passads hai dà ina stagnaziun. L'acziun 2026 ha perquai la finamira d'augmentar il dumber da participantas e participants sco er las distanzas da viadis.

Infurmaziuns: Departament d'infrastructura, energia e mobilitad

La Regenza ha prendì enconuschientscha dal fatg, ch'ils suandants projects federals vegnan suttamess a la votaziun dal pievel dumengia, ils 14 da zercladur 2026:

• iniziativa dal pievel «Na ad ina Svizra da 10 milliuns! (Iniziativa per la persistenza)» (Fegl uffizial federal 2026 17);
• midada dals 26 da settember 2025 da la Lescha federala davart il servetsch civil (LSCi) (Fegl uffizial federal 2025 2896).

Sin plaun chantunal n'èn previs nagins projects da votaziun ils 14 da zercladur 2026.

Infurmaziuns: Chanzlia chantunala