Suenter Pasca cumenza la stagiun da construcziun 2026: Sin la rait da vias chantunalas d'ina lunghezza da stgars 1360 kilometers planisescha l'Uffizi da construcziun bassa tut en tut 128 plazzals. Sin 67 da quests plazzals vegnan endrizzadas amplas da traffic.
Cun 128 plazzals planisescha l'Uffizi da construcziun bassa (UCB) quest onn damain plazzals che durant la stagiun da construcziun passada dal 2025 (174). Entant che l'onn passà èn vegnidas installadas tar var 60 pertschient dals plazzals amplas da traffic, è quai il cas mo tar var 52 pertschient durant questa stagiun.
En general è il dumber da plazzals sa reducì levamain ils ultims onns. La raschun è, ch'ils projects èn tendenzialmain pli gronds e pli chars, uschia ch'i vegnan mintgamai liads dapli meds finanzials e resursas persunalas al singul plazzal. Questa reducziun pertutga cunzunt las vias principalas. En connex cun las vias da colliaziun sa mova il dumber dals plazzals 2026 en in rom sumegliant sco ils onns precedents.
Las lavurs preparatoricas per il sviament da La Punt (via d'Engiadina), il cumenzament dal plazzal dal tunnel Las Ruinas (via dal Lucmagn) sco er la finiziun da la correcziun da la via «Gross Kehr – Kappelakehren» (via dal Güglia) èn trais projects che stattan spezialmain en il focus quest onn.
Fegl d'infurmaziun dal UCB: Sguard en l'avegnir – co funcziuna la planisaziun da plirs onns?
Co decida il UCB, tge vias che vegnan sanadas cura? E pertge èn gia planisads oz blers projects dals proxims onns? Il fegl d'infurmaziun dal UCB agiuntà mussa, co che la rait da vias chantunalas vegn registrada sistematicamain, co che las punts e las ovras da sustegn vegnan controlladas regularmain e co che tut las datas vegnan reunidas ad ina planisaziun prospectiva da plirs onns.
Cumportament correct en ils conturns dals plazzals
Sin tut ils plazzals ha la segirezza dal persunal dal plazzal emprima prioritad. Central en quest connex è en spezial, che las participantas ed ils participants dal traffic prendian resguard. Davos las barricadas lavuran umans cun la finamira da meglierar l'infrastructura da las vias per tuts. Cun sa cuntegnair cun respect, pussibiliteschan las participantas ed ils participants dal traffic al persunal dal plazzal da lavurar en moda segira. Per traversar il sectur dal plazzal supplitgescha il UCB perquai las participantas ed ils participants dal traffic d'adattar la sveltezza, d'augmentar l'attenziun e d'observar en mintga cas las fasas da las amplas da traffic mobilas sco er las ordinaziuns dal persunal dal plazzal e dal servetsch da traffic.
Actualisaziun permanenta sin strassen.gr.ch
Infurmaziuns davart las restricziuns en connex cun plazzals e davart las lavurs vegnan actualisadas cuntinuadamain sin la pagina d'internet strassen.gr.ch e stattan a disposiziun sco charta interactiva u sco glista da PDF.
Agiunta:
Info dal UCB dals 19 da mars 2026
Infurmaziuns:
René Simeon, schef Construcziun da vias, Uffizi da construcziun bassa, tel. +41 81 257 37 85 (cuntanschibel da las 10.00 fin las 11.30), e‑mail Rene.Simeon@tba.gr.ch
Responsabladad: Uffizi da construcziun bassa