La Regenza grischuna ha nominà Marco Tscholl sco nov manader da l'Uffizi chantunal per la valitaziun d'immobiglias. El surpiglia questa funcziun il 1. d'avust 2026.
La Regenza ha elegì Marco Tscholl, da Cuira, sco nov manader da l'Uffizi per la valitaziun d'immobiglias dal chantun Grischun.
Marco Tscholl ha in'experientscha cumprovada en il sectur dal management d'immobiglias. Dapi l'onn 2021 è el activ sco vicemanader dal post da servetsch Immobiglias ed administraziun da la citad da Cuira. Avant è el stà engaschà durant blers onns en il sectur da la communicaziun e dal marketing ed ha temporarmain lavurà en moda independenta. Marco Tscholl ha in Executive MBA en marketing strategic, ed è manader da vendita cun diplom federal, spezialist da marketing cun AQ federal sco er commerziant AFQ ed absolva actualmain in CAS en economia d'immobiglias.
L'Uffizi per la valitaziun d'immobiglias è responsabel per valitar uffizialmain ils bains immobigliars e las immobiglias en il chantun Grischun. Cun var 60 collavuraturas e collavuraturs e cun ils sis biros da valitaziun a Cuira, Tavau, Glion, Tusaun, Samedan e Scuol realisescha l'uffizi fin 20 000 valitaziuns per onn.
Fotografia agiuntada:
Infurmaziuns:
President da la Regenza Martin Bühler, schef dal Departament da finanzas e vischnancas, tel. +41 81 257 32 05 (cuntanschibel da las 12.15 fin las 13.00), e‑mail Martin.Buehler@dfg.gr.ch
Responsabladad: Regenza