Ils 29 da december 2025 è vegnida surdada la petiziun «AutoDaPosta senza daner contant NA!» a l'AutoDaPosta a Cuira. Il chantun Grischun sco empustader dal traffic regiunal da persunas e l'AutoDaPosta SA han prendì enconuschientscha da la petiziun.
En lur petiziun pretendan las passa 8000 sutsegnadras e sutsegnaders da reintroducir la vendita da bigliets tar il persunal da transport e la pussaivladad da pajar en daner contant en ils autos da posta. Els argumenteschan, che l'aboliziun da la vendita a daner contant saja in dischavantatg per persunas che n'èn betg disadas da duvrar meds da pajament digitals meds da pajament digitals. La vendita da bigliets tar il persunal da transport saja stada sur decennis ina pratica cumprovada e duaja puspè vegnir pussibilitada.
Motivs per la digitalisaziun
Dapi l'onn 2018 pon ins observar en Svizra in svilup vers sistems da distribuziun digitals en il traffic public. Per quai datti differents motivs. Adina dapli passagieras e passagiers fan diever da meds da pajament digitals. En Svizra vegnan cumprads en il fratemp 76 pertschient dals bigliets e dals abunaments sin via digitala. Tar l'AutoDaPosta han l'onn 2025 en l'entira Svizra cumprà anc 2 pertschient da las passagieras e dals passagiers dal traffic public il bigliet tar il persunal da transport. La clientella spetga soluziuns digitalas simplas che cumpiglian er il pajament senza daner contant, las reservaziuns u il transport da velos. Sche las interpresas da traffic public mainan parallelamain a las purschidas digitalas er vinavant ils sistems analogs (p.ex. cassas en vehichels), malgrà che tals vegnan utilisads pli e pli pauc, chaschuna quai gronds custs d'investiziun e da gestiun senza porscher ina plivalur correspundenta al manaschi.
En il manaschi quotidian gida da renunziar da vender bigliets tras il persunal da transport a stabilisar il manaschi e stgaffescha reservas da temp da viadi. Fermadas pli lungas tar l'entrada en ils meds da transport, che resultan pervia da la vendita da bigliets, han in effect negativ per il temps da viadi e per la stabilitad da las colliaziuns.
En il chantun Grischun èn tut las interpresas da transport – tranter auter l'AutoDaPosta, la Viafier retica, il Bus da Cuira, il Bus d'Engiadina e las interpresas da transport da Tavau – sa decididas, ensemen cun il chantun, d'introducir il sistem da vendita da bigliets «Venda» che funcziuna senza daner contant e senza palpiri. Quest sistem pussibilitescha da cumprar bigliets sur SwissPass, cartas da credit e da debit sco er cartas da valur prepajadas. Il persunal da transport ha sistì la vendita da bigliets pass per pass e quai vegn realisà dapi il december 2025 sin l'entir territori chantunal.
Pajament en daner contant resta pussaivel cun la carta da valur
Il Departament d'infrastructura, energia e mobilitad sco er AutoDaPosta menziuneschan en lur resposta a las petiziunarias ed als petiziunaris, che l'access al traffic public saja garantì er per quellas passagieras e quels passagiers che prefereschan in pajament en daner contant, malgrà che la vendita da bigliets è sistida. La carta da valur «VendaPrepaid» porscha in'alternativa equivalenta: Cun in dabun da 10 u 20 francs po ella vegnir cumprada cun daner contant tar mintga post da vendita e tar il persunal da transport en ils vehichels. Il dabun sin la carta pussibilitescha da cumprar en moda anonima bigliets als automats da Venda.
Supplementarmain stattan a disposiziun a las passagieras ed als passagiers differents posts da vendita che acceptan daner contant. Per las passagieras ed ils passagiers ch'èn bler en gir da blers viadis èn ultra da quai cartas da plirs viadis u abunaments alternativas favuraivlas.
Chantun ed AutoDaPosta s'engaschan per in traffic public per tuts
Per il chantun Grischun e per l'AutoDaPosta SA è la digitalisaziun en il traffic public in pass necessari per garantir l'effizienza e la stabilitad sco er per tegnair quint dals basegns da la clientella che sa midan. A medem temp è il pajament en daner contant vinavant pussaivel sur la carta «VendaPrepaid» ed è in'alternativa equivalenta a la cumpra da bigliets da fin ussa.
Il Departament d'infrastructura, energia e mobilitad sco er l'AutoDaPosta SA prendan enconuschientscha da la petiziun. Els han il grond giavisch, ch'il traffic public restia accessibel da medema maniera per tut las persunas. In return a la vendita da bigliets tras il persunal da transport n'è dentant betg previs per ils motivs numnads. Il chantun Grischun sco empustader dal traffic da persunas regiunal e da l'AutoDaPosta SA vegnan a s'engaschar er en l'avegnir – ensemen cun las autras interpresas da transport en il Grischun – per ch'il traffic public tegnia quint dals basegns multifars e che sa midan da la populaziun.
Agiunta:
Resposta da la petiziun: «AutoDaPosta senza daner contant NA!»
Infurmaziuns:
- Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 15.00 fin las 15.30), e‑mail Carmelia.Maissen@diem.gr.ch
- Post da medias AutoDaPosta, tel. +41 58 338 57 00, e‑mail infomedia@postauto.ch
Responsabladad: Departament d'infrastructura, energia e mobilitad ed AutoDaPosta SA