La Cumissiun per furmaziun e cultura dal Cussegl grond (CFC) ha predeliberà la missiva tar la Lescha davart la furmaziun professiunala superiura e sustegna unanimamain il project.
Sut l'egida da la presidenta da la cumissiun Gabriela Menghini-Inauen ed en preschientscha dal cusseglier guvernativ Jon Domenic Parolini (schef dal Departament d'educaziun, cultura e protecziun da l'ambient) ha la CFC predeliberà ils 13 da mars 2026 la missiva da la Regenza per relaschar la Lescha davart la furmaziun professiunala superiura. Cun quest project duai la furmaziun professiunala superiura vegnir rinforzada sistematicamain ed adattada als svilups actuals da la politica da furmaziun e dal martgà da lavur (cf. communicaziun a las medias dals 28-01-2026).
Lescha impurtanta per il Grischun
Il Cussegl grond ha constatà gia avant in lung temp l'impurtanza da la furmaziun professiunala superiura per l'economia da las interpresas pitschnas e mesaunas e per l'urbarisaziun dal chantun Grischun (cf. incumbensa Heini concernent il rinforzament da la furmaziun professiunala en il Grischun ed incumbensa Müller concernent il sustegn da segundas scolaziuns e da furmaziuns supplementaras). La cumissiun è d'accord cun la Regenza, ch'il relasch d'ina atgna lescha suttastritga la gronda impurtanza da la furmaziun professiunala superiura per il chantun e che quai gida a «rinforzar» e «sustegnair» sco pretendì quest sectur da furmaziun. La CFC sustegna perquai unanimamain quest project.
Dumondas da finanziaziun cumplexas
A la sesida da predeliberaziun èn oravant tut vegnidas discutadas detagliadamain er las schanzas e las ristgas da la finanziaziun pauschala, che vegn introducida da nov per scolas spezialisadas superiuras purtadas da privats. La cumissiun è persvadida, che questa furma da finanziaziun po esser in'alternativa adequata a la finanziaziun da deficit existenta. Betg d'accord n'è la CFC sulettamain cun las contribuziuns dal chantun a las taxas da studi: Ina maioritad da la cumissiun vul fixar quellas a «20 fin 25 pertschient da las taxas da studi», entant ch'ina minoritad resta tar la missiva («maximalmain in quart da las taxas da studi»).
La fatschenta vegn tractada dal Cussegl grond en la sessiun d'avrigl 2026.
Infurmaziuns:
Presidenta da la cumissiun Gabriela Menghini-Inauen, tel. +41 79 714 40 81 (cuntanschibla a partir da las 17.00), e‑mail gabriela.menghini@bluewin.ch
Responsabladad: Cussegl grond / Cumissiun per furmaziun e cultura