La Regenza ha prendì posiziun davart in project da consultaziun dal Departament federal d'economia, furmaziun e retschertga (DEFR) en connex cun ina midada planisada da l'Ordinaziun 2 tar la Lescha da lavur. Las novas disposiziuns prevesan regulaziuns spezialas per lavurantas e lavurants d'interpresas giuvnas (start-ups), che han abilitads spezialas ed èn participads a l'interpresa.

En general sustegna la Regenza la revisiun proponida da las disposiziuns dal dretg da lavur per interpresas giuvnas. La nova regulaziun è ina proposta pragmatica per tegnair quint dals basegns specifics da start-ups per dapli flexibilitad, senza sutminar ils princips da protecziun centrals dal dretg da lavur. A medem temp renda la Regenza attent a las sfidas considerablas da la realisaziun. Per l'applicaziun da las novas disposiziuns dovri in'examinaziun pretensiusa da las premissas per mintga cas singul. Plinavant chaschuna l'applicaziun dapli lavur spezialisada ed administrativa per ils inspecturats da lavur chantunals. La Regenza na sustegna perquai betg la valitaziun da la Confederaziun, ch'i na saja betg da far quint cun custs supplementars e ch'i na dovria betg dapli persunal. Per l'ulteriur process legislativ pretenda ella, ch'i vegnia tegnì quint adequatamain da las dumondas da l'exequibladad e da las resursas necessarias.

Documents da consultaziun dal Departament federal d'economia, furmaziun e retschertga (DEFR)

Infurmaziuns: Departament d'economia publica e fatgs socials

La Regenza ha deliberà il project da pilot «KITAplus Grischun». Quest program stgaffescha las cundiziuns generalas, per che uffants cun in impediment possian frequentar las purschidas regularas da la da tgira d'uffants. «KITAplus Grischun» s'orientescha al program «KITAplus» da la Fundaziun Kifa. Quest program metta il focus sin in stretg accumpagnament dal team d'assistenza en quai che reguarda dumondas pedagogicas davart l'integraziun d'uffants cun in impediment.

La pli impurtanta finamira dal program «KITAplus Grischun» è l'execuziun da la Lescha davart la promoziun da la tgira d'uffants cumplementara a la famiglia (LTGU): Correspundentamain duai il chantun cuvrir da nov ils custs supplementars effectivs per la tgira d'uffants cun in impediment. En il focus stat qua la cumpatibilitad da la professiun cun la famiglia per geniturs d'uffants cun in impediment. En il rom dal project da pilot vegnan plinavant stgaffidas las cundiziuns generalas per pudair promover l'aspect inclusiv da las purschidas da la tgira d'uffants. Furniturs da prestaziuns che tgiran in uffant cun in impediment, survegnan in sustegn finanzial e professiunal. Uschia custan las purschidas da la tgira d'uffants cumplementara a la famiglia tuttina bler per tut las persunas responsablas per l'educaziun, independentamain dal fatg, sche lur uffant ha in impediment u betg.

Il basegn da sustegn per la tgira d'uffants cun in impediment n'è fin ussa betg vegnì eruì sistematicamain en il chantun. Correspundentamain èsi mo pussaivel da calcular approximativamain ils custs supplementars per il chantun. Sch'ins suppona che 20 uffants vegnian tgirads durant mintgamai dus dis per emna, resultan custs annuals da circa 253 000 francs.

Infurmaziuns: Departament d'economia publica e fatgs socials

La Regenza ha approvà il project d'exposiziun per la correcziun da la via da Ftan sin il traject tranter Ardez e Varansuns en la fracziun da Ftan. Ils custs totals da quest project èn budgetads cun 4,53 milliuns francs.

La via da Ftan fa part da la rait chantunala da vias da colliaziun. Ella maina d'Ardez sur Ftan a Scuol e collia la fracziun da Ftan, ch'è situada da la vart sanestra da l'Engiadina Bassa aut sur il fund da la val, cun l'ulteriura rait da vias chantunalas. En cas d'eveniments da la natira extraordinaris (auas grondas e bovas en il vallun da Tasna) ha questa via da colliaziun stuì servir durant ils ultims onns adina puspè sco sviament d'urgenza per la via d'Engiadina. Sin il perimeter da quest project ha la via existenta in allontanament d'aua manglus, per gronda part mirs da sustegn memia debels e per part er vials memia stretgs. Il traject da via è limità ad in pais maximal da 13 tonnas. Il traject Ardez – Ftan vegn perquai adattà successivamain a las pretensiuns envers ina via da colliaziun moderna.

En il rom da quest project èn previsas las suandantas mesiras: schlargiament da la via al profil traversal normal per vias da colliaziun, puncts da cruschada per il traffic pesant, auzament da la tonnascha a 32 tonnas, construcziun d'in nov allontanament da l'aua da la via, renovaziun da la surstructura da la via (fundament e cuvrida), reparaziun respectivamain construcziun da novs mirs da sustegn da la vart da la val sco er reparaziun dals mirs da sustegn da la vart da la muntogna.

La Regenza ha garantì a la vischnanca da Bravuogn Filisur ina contribuziun chantunala da 237 600 francs per renovar la via champestra Sagliaz. Questa contribuziun chantunala è vegnida deliberada sin basa d'ina contribuziun federala da maximalmain 993 600 francs. Ils custs imputabels per renovar questa via champestra agricula importan maximalmain 2,7 milliuns francs.

Ultra da quai ha la Regenza garantì a la vischnanca da Flearda ina contribuziun da 297 000 francs per cumplettar la via champestra nr. 3, Dorfstrasse – bain puril Quadra – Dim – via chantunala. Er questa contribuziun chantunala è vegnida deliberada sin basa d'ina contribuziun federala da maximalmain 734 472 francs. Ils custs imputabels per renovar questa via champestra agricula importan maximalmain 2,04 milliuns francs.

Infurmaziuns: Departament d'economia publica e fatgs socials