La Regenza ha approvà in project da la vischnanca da Valragn per la correcziun dal Hüscherabach e dal Rain Posteriur ed ha garantì a la vischnanca contribuziuns tenor la Lescha davart la correcziun dals curs d'aua. Als custs budgetads dad 8,23 milliuns francs vegn garantida ina contribuziun chantunala da maximalmain 931 400 francs. Plinavant ha la Regenza garantì a la vischnanca ina contribuziun chantunala da maximalmain 1,2 miu. francs tenor la Lescha davart las vias.

Il Hüscherabach è in torrent en la vischnanca da Valragn, che maina glera e po chaschunar bovas. El nascha en il territori da l'autezza dal Pass dal Spleia tranter il Piz Suretta (3027 m s.m.) ed il Lattenhorn (2861 m s.m.). L'aual ha in intschess da var 13 kilometers quadrat e sbucca amez l'abitadi dal vitg da Spleia en il Rain Posteriur. Per motivs da la protecziun cunter aua gronda èn vegnids construids en il passà rempars sin plirs trajects da l'aual. Cun il project qua avant maun duain las capacitads da deflussiun da l'entir Hüscherabach e dal territori da sbuccada dal Rain Posteriur vegnir adattadas a las finamiras da protecziun. Quai po vegnir realisà cun rempars resp. mirs da la riva e sin tscherts trajects er cun schlargiar la geometria da l'aual. Impurtanta è er la consideraziun dals moviments da glera e da laina da grava. Al culiez dal cugn cumpiglia il project perquai la construcziun d'in nov implant «Mülena» per retegnair glera e laina cun in volumen da circa 7000 meters cubic. Quest implant da retegnida duai entrar en funcziun en cas d'eveniments gronds rars.

La Regenza ha approvà in project collectiv da differentas vischnancas cun il titel «Sanaziun d'averturas e prevenziun cunter incendis da guaud 2026». Per quest intent ha ella concedì ina contribuziun chantunala da maximalmain 15,04 milliuns francs.

Quest project cumpiglia la sanaziun da tut en tut 52,5 kilometers vias da guaud e da maschinas, ch'èn repartids sin 54 objects singuls. Set da quests objects ston puspè vegnir restabilids, suenter ch'els èn vegnids donnegiads la stad 2025 pervia da malauras. Cun quest project vegn meglierada l'avertura da circa 9000 hectaras guaud da protecziun e da circa 2500 hectaras ulteriur guaud (ordaifer il guaud da protecziun). Ultra da quai cumpiglia il project collectiv la construcziun da quatter batschigls d'aua da stizzar fieu (a Fläsch, Trimmis, Sumvitg e Val S Pieder) sco er d'in puz d'aua da stizzar fieu (a Tràn, vischnanca da Tumleastga). Plinavant èsi previs da sanar lieus da retratga d'aua a Scuol, Poschiavo e Trun sco er da cumprar material d'equipament da pumpiers per cumbatter specificamain incendis da guaud.

La Regenza ha garantì a la vischnanca da Flearda ina contribuziun chantunala da maximalmain 504 573 francs per remplazzar l'ovra idraulica d'aua da baiver Patrutg. Questa contribuziun ha ella concedì sin basa da la Lescha da meglieraziun dal chantun Grischun sco er da l'Ordinaziun davart las meglieraziuns da structura en l'agricultura. La garanzia da la contribuziun chantunala premetta ina subvenziun correspundenta da la Confederaziun. Ils custs totals da quest project èn budgetads cun var 2,44 milliuns francs.

Las vischnancas da Flearda e da Masagn retiran ina part da lur aua da baiver da las funtaunas sur Urmagn Sura. La differenza d'autezza tranter Urmagn Sura ed il reservuar Flearda importa circa 300 meters. La vischnanca da Flearda vul trair a niz energeticamain questa differenza d'autezza. Pervia da la vegliadetgna dals stabiliments exista plinavant in basegn da sanar parzialmain il sistem d'aua da baiver existent. Il project cumpiglia perquai tranter auter il remplazzament dals conducts d'affluenza da las funtaunas Patrutg e Tgiern Olt fin a Flearda. Il conduct existent, ch'è var 60 onns vegl, vegn en quest connex remplazzà tras in conduct da pressiun, e la differenza d'autezza vegn utilisada energeticamain en la nova ovra idraulica d'aua da baiver Patrutg. Per l'ovra idraulica d'aua da baiver vegn construida ina nova chasa da maschinas directamain vi dal reservuar existent Flearda. En questa chasa vegnan installads la turbina, il generatur, la regulaziun ed ils implants da current ferm. Plinavant duain vegnir renovads ils implants da funtauna Tgiern Olt, Patrutg e Bigniel, che ston vegnir sanads.

Infurmaziuns: Departament d'educaziun, cultura e protecziun da l'ambient

La Regenza ha approvà la revisiun parziala da la planisaziun locala che la vischnanca da Favugn aveva concludì ils 9 da zercladur 2024. Il motiv decisiv per la nova planisaziun è stà quel da resguardar las prescripziuns dal dretg da planisaziun surordinà. L'emprima etappa da la revisiun dal dretg davart la planisaziun dal territori (LPT1) ha principalmain la finamira da franar l'extensiun da las zonas da construcziun en il terren cultivà e da diriger il svilup dals abitadis vers anen.

Tut en tut ha la vischnanca da Favugn engrondì sia zona d'abitar, maschadada e dal center (ZAMC) per var 12 140 meters quadrat. Plinavant ha la vischnanca determinà futurs territoris d'engrondiment da l'abitadi cun agid d'ina zona per l'utilisaziun futura da construcziun (ZUFC). La revisiun da la Lescha da construcziun communala (LC) cumpiglia cunzunt mesiras per utilisar meglier las zonas da construcziun sco er per mobilisar il terren da construcziun. Uschia è vegnida introducida in'obligaziun da surbajegiar las zonas da construcziun existentas entaifer in termin dad 8 onns.

© Andrea Badrutt

Infurmaziuns: Departament d'economia publica e fatgs socials

La Regenza ha danovamain concedì a la Wüssenswerk ScRL a Seglias ina permissiun da durada limitada per manar ina scola privata ils onns da scola 2026/27 e 2027/28. La purschida da furmaziun correspunda a tala da la scola populara ed ademplescha il Plan d'instrucziun 21 Grischun.

Infurmaziuns: Departament d'educaziun, cultura e protecziun da l'ambient