L'onn 2024 han 2081 Grischunas e Grischuns retratg almain ina giada agid social economic. Quai èn 106 persunas damain che l'onn 2023. La quota d'agid social sa sbassa cun quai ad 1 pertschient ed è vinavant sut la media naziunala da 2,9 pertschient.
Sche persunas en Svizra vegnan en difficultads finanzialas, pon ellas dumandar agid social. Quest agid procura ch'ellas hajan il pli necessari per viver, sche lur agen salari ed auters agids finanzials na bastan betg u na vegnan betg pajads ad uras. L'onn 2024 han 2081 persunas en il chantun Grischun survegnì agid social. Quai èn 1 pertschient da tut la populaziun dal chantun u ditg cun auters pleds: Ina da 100 persunas en il chantun Grischun ha retratg agid social.
Per la terza giada en fila è il dumber da las persunas che survegnan agid social sa reducì. La quota d'agid social è sa reducida per 0,1 punct procentual sin 1 pertschient. En tut la Svizra è questa quota ina da las pli bassas. Il 2024 ha la quota d'agid social importà en Svizra 2,9 pertschient. Quai è 0,1 punct procentual sur la valur da l'onn precedent.
Grafica 1: Quota d'agid social en il chantun Grischun ed en Svizra, 2010 fin 2024
Gruppas socialas ch'èn periclitadas il pli fitg da depender da l'agid social
Las gruppas da la societad che dovran il pli savens agid social, na sa midan strusch. Primo èn uffants e giuvenils pertutgads bler pli savens da l'agid social che persunas creschidas. 621 respectivamain var 30 pertschient da las 2081 persunas che retiran agid social èn sut 18 onns. Uffants e giuvenils èn prest il dubel uschè savens dependents da l'agid social sco la media en il chantun – per la gruppa da vegliadetgna da 0 fin 17 onns è il ristg tar 1,9 pertschient.
Grafica 2: Quota d'agid social tenor categoria da vegliadetgna en il chantun Grischun, 2024
La segunda gruppa ch'è spezialmain periclitada èn famiglias d'in genitur cun uffants. 247 respectivamain 19,2 pertschient da las 1289 unitads che dovran sustegn èn famiglias d'in genitur. La terza gruppa èn persunas senza furmaziun professiunala. Er ellas èn surproporziunalmain savens dependentas da l'agid social. La cumpart da las persunas da 25 fin 64 onns senza furmaziun professiunala importa en l'entira populaziun 12,2 pertschient, tar las persunas che retiran agid social percunter 47,4 pertschient. Quai vul dir ch'ina scolaziun diminuescha signifitgantamain il ristg da depender da l'agid social.
Modernisaziun da la Statistica svizra da persunas che survegnan agid social SAS
La Statistica svizra da persunas che survegnan agid social SAS è ina retschertga da datas che l'Uffizi federal da statistica UST fa. La statistica sa basa sin la collavuraziun da la Confederaziun, dals chantuns e da las vischnancas. Las basas per la SAS èn vegnidas sviluppadas avant passa 20 onns. En il rom d'in project da modernisaziun èn ellas ussa vegnidas adattadas a las relaziuns actualas ed als basegns che sa midan. La modernisaziun da la SAS ha las finamiras da reducir la lavur per ils posts da retschertga, da rinforzar l'analisa sco er da scursanir il temp tranter la retschertga e la publicaziun.
Il chantun Grischun sustegna las vischnancas grischunas da far il midament. Tranter auter han las vischnancas la pussaivladad da furnir a l'UST lur datas sur il sistem per la gestiun dals cas en il sectur social «gira.gr» ch'il chantun metta a disposiziun. A las vischnancas che n'han anc betg in sistem per la gestiun dals cas, metta il chantun a disposiziun gratuitamain «gira.gr» durant la fasa da project il 2026.
Da midar sin la statistica modernisada ha consequenzas per las evaluaziuns da las datas dals onns 2024 e 2025. Durant questa fasa transitorica pon mo ils pli impurtants indicaturs e resultats vegnir mussads. Cun midar la statistica – pia cun midar il ritmus da retschertga, cun ina nova basa da datas ed optimaziuns metodicas – vegnan las datas avant il midament mo ad esser cumparegliablas en moda limitada cun quellas suenter il midament. Ultra da quai vegnan applitgadas valitaziuns per cumpensar tscherts effects durant la fasa transitorica. Ils emprims resultats da la statistica modernisada publitgescha il UST probablamain en la segunda mesadad dal 2026. Indicaziuns pli detagliadas davart il project da modernisaziun e davart la realisaziun chattais Vus tar l'Uffizi federal da statistica.
Infurmaziuns:
- Susanna Gadient, manadra da l'Uffizi dal servetsch social, tel. +41 81 257 26 51 (cuntanschibla da las 10.00 fin las 11.00), e‑mail Susanna.Gadient@soa.gr.ch
- Mathias Kaufmann, manader dal sectur spezial Servetschs socials / vicemanader da l'uffizi, tel. +41 81 257 26 68 (cuntanschibel da las 10.00 fin las 11.00), e‑mail Mathias.Kaufmann@soa.gr.ch
- Marc Dubach, schef da secziun Agid social da l'Uffizi federal da statistica UFS, tel. +41 58 463 65 78 (cuntanschibel da las 11.00 fin las 12.00), e‑mail Marc.Dubach@bfs.admin.ch
Responsabladad: Uffizi dal servetsch social