Per l'onn 2026 ha la Regenza concedì contribuziuns chantunalas da totalmain circa 755 000 francs per renovar mirs sitgs. Las contribuziuns sa cumponan da contribuziuns d'investiziun en la tgira da la cuntrada e prestaziuns da cumpensaziun per intervenziuns en cuntradas protegidas (515 000 francs) sco er da contribuziuns tenor las cunvegnas da program «cuntrada» (146 200 francs) e «protecziun da la natira» (84 800 francs) cun la Confederaziun. En connex cun las cunvegnas da program sa participescha er la Confederaziun a la finanziaziun cun sias cumparts definidas da circa 231 000 francs. Circa 1,08 milliuns francs dals custs totals da var 2,07 milliuns francs per il project vegnan finanziads tras atgnas prestaziuns e tras terzs.

L'onn 2026 duain vegnir renovads tut en tut var 2,4 kilometers mirs sitgs cun ina surfatscha visibla da var 2900 meters quadrat en las vischnancas d'Alvra, Andeer, Arosa, Avras, Bever, Bravuogn Filisur, Brusio, Calanca, Castaneda, Cuira, Grono, Landquart, Lantsch, Luzein, Muntogna da Schons, Poschiavo, Roveredo, Sagogn, Schluein, Scuol, Surses, Tujetsch, Tumleastga, Val Müstair, Valragn, Val S. Pieder, Val Stussavgia, Vaz Sut sco er Zernez.

Sco mirs da cunfin e da sustegn èn ils mirs sitgs en bleras regiuns dal Grischun perditgas impurtantas d'ina cultivaziun tradiziunala. Plinavant furman els savens spazis da viver impurtants per reptils, per mammals pitschens e per insects ed han savens ina flora interessanta (litgens, mistgels, ervas). Els n'han uschia betg mo ina gronda impurtanza per l'istorgia culturala, mabain er per l'ecologia e per la cuntrada. Sch'els na vegnan betg mantegnids, van dentant blers da quests mirs en decadenza.

La Regenza ha elegì Marc Grünenfelder da Cuira sco president dal cussegl da scola auta da la Scola auta spezialisada dal Grischun (SASGR), quai per la durada dal 1. da fanadur 2026 fin a la scadenza da la perioda d'uffizi ordinaria ils 30 da zercladur 2030. El vegn a surpigliar l'uffizi da Brigitta M. Gadient, che appartegna dapi il 1. da fanadur 2014 al cussegl da scola auta SASGR – dapi il 1. da schaner 2017 sco presidenta – e che ha communitgà sia demissiun per la fin da la perioda d'uffizi ordinaria la fin da zercladur 2026.

Plinavant ha la Regenza elegì Diego Deplazes da Rabius sco commember dal cussegl da scola dal Center da furmaziun per la sanadad ed ils fatgs socials (CFSS) per la durada dal 1. da fanadur 2026 fin a la scadenza da la perioda d'uffizi ordinaria ils 30 da zercladur 2030. El vegn a surpigliar questa represchentanza dal chantun da Tina Gartmann, che cuntanscha ils 30 da zercladur 2026 la limitaziun dal temp d'uffizi, suenter esser stada 12 onns commembra dal cussegl da scola.

Infurmaziuns: Departament d'educaziun, cultura e protecziun da l'ambient