Il chantun Grischun metta er l'onn 2026 in cler signal cunter la violenza a chasa. En il focus dals Dis d'acziun da quest onn, che han lieu dals 25 da november fin ils 10 da december 2026, stat la violenza digitala. Il chantun appellescha la populaziun, organisaziuns ed instituziuns da participar e sustegna finanzialmain occurrenzas u acziuns. Ils 20 da matg 2026 ha lieu in'occurrenza d'infurmaziun e da contact davart ils Dis d'acziun cunter violenza a chasa.
Violenza a chasa n'enconuscha nagins cunfins geografics, culturals u socials. Ella exista en differentas furmas – corporala, sexuala, psichica ed economica – e pertutga persunas entaifer la famiglia u partenarias e partenaris (actuals ed anteriurs). Violenza a chasa n'è betg ina chaussa privata – ella è chastiabla e na vegn betg tolerada en nossa societad.
La violenza digitala ha bleras furmas
Las tecnologias digitalas èn ina part fixa da las relaziuns famigliaras e colleghialas d'ozendi. D'ina vart pon ellas pussibilitar novas vias da communicaziun e d'intimitad, da l'autra vart stgaffescha ella dentant er spazis da controlla, da surveglianza e da violenza. Sco cuntinuaziun ed amplificaziun da dinamicas da pussanza analogas na sa ferma questa furma da violenza betg davant cunfins territorials. Pervia da la cuntanschibladad permanenta èn las persunas pertutgadas exponidas da di e notg a la violenza, independentamain dal lieu. Furmas pussaivlas da questa violenza pon esser mulestas permanentas, nua che la victima vegn contactada nungiavischadamain, la surveglianza secreta da la victima cun agid da trackers da GPS u da software da stalking, ubain la violenza visuala, nua ch'i vegnan derasads cuntegns intims autentics u generads cun IA. Ils Dis d'acziun da quest onn mussan, co che spazis per violenza digitala pon sa furmar, co ch'ins po sa proteger cunter violenza digitala e tge purschidas da protecziun, d'agid e da sustegn ch'èn avant maun.
Sensibilisar, gidar, agir
Bleras victimas taschan per tema u per vargugna. Er tgi che suppona u observa violenza a chasa sa senta bleras giadas pers. Ils Dis d'acziun porschan ina plattafurma per sensibilisar e per discutar avertamain. En il chantun Grischun datti bleras purschidas d'agid per persunas pertutgadas e per confamigliars. Questas purschidas duain vegnir rendidas enconuschentas. Ulteriuras infurmaziuns èn disponiblas sut www.violenza-a-chasa.gr.ch e sut www.findhelp.gr.ch.
Ils Dis d'acziun cunter violenza a chasa vegnan accordads cun la campagna «16 dis cunter violenza envers dunnas» e cun ils «Orange Days». En il Grischun è il Post da coordinaziun Violenza a chasa responsabel per l'organisaziun. Il chantun sustegna finanzialmain occurrenzas ed acziuns davart il tema violenza a chasa sco er spezialmain davart il tema central «violenza digitala». Ultra da quai fa el attent a las occurrenzas e metta a disposiziun als organisaturs material da campagna.
Persunas ed organisaziuns interessadas pon inoltrar lur annunzias e dumondas fin ils 23 d'avust 2026. Ils formulars pon vegnir chargiads giu da la pagina d'internet dal Post da coordinaziun Violenza a chasa.
Occurrenza da contact e d'infurmaziun
Il Post da coordinaziun Violenza a chasa envida ad in'occurrenza da contact e d'infurmaziun che ha lieu mesemna, ils 20 da matg 2026, da las 16.30 fin las 18.30, en la ibW Scola spezialisada superiura da la Svizra Sidorientala a Cuira. Posts spezialisads ed organisaziuns infurmeschan en referats curts davart la violenza a chasa e la violenza digitala, las purschidas d'agid ed ils Dis d'acziun 2026. L'occurrenza sa drizza a persunas spezialisadas da differents secturs sco er a la vasta publicitad. In apero a la fin da l'occurrenza porscha l'occasiun da sa barattar e da stabilir contacts.
Persunas ed organisaziuns interessadas pon s'annunziar per e-mail u per telefon fin ils 13 da matg 2026: haeusliche.gewalt@soa.gr.ch / +41 81 257 26 11. Inditgai en l'annunzia, sche Vus duvrais assistenza u sustegn supplementar al lieu (p.ex. in interpret da lingua da segns).
Infurmaziuns:
Madlaina Baselgia, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11 (cuntanschibla da las 10.00 fin las 11.30), e‑mail Madlaina.Baselgia@soa.gr.ch
Responsabladad: Uffizi dal servetsch social