La Regenza ha prendì posiziun tar in project da consultaziun dal Departament federal d'economia, furmaziun e retschertga (DEFR). La consultaziun da la Confederaziun stat en connex cun ils conclus da finanziaziun planisads dal Cussegl federal, ch'èn necessaris per cuntinuar e per sviluppar vinavant la promoziun economica. La finanziaziun dals instruments da la promoziun economica scada la fin da l'onn 2027. Per che quests instruments possian vegnir cuntinuads e sviluppads vinavant ils onns 2028 fin 2031, dovri ils conclus correspundents. I sa tracta dals suandants instruments: e-government, Innotour, Svizra Turissem, promoziun da l'export e promoziun economica.

La Regenza beneventa da princip che la promoziun economica da la Confederaziun vegn cuntinuada ils onns 2028 fin 2031. Ils instruments correspundents èn d'ina impurtanza centrala per il svilup economic e per la cumpetitivitad da las regiuns e dals chantuns. La Regenza crititgescha dentant il termin da la consultaziun. Quella è vegnida averta, cumbain ch'igl era gia cler durant las debattas parlamentaras davart il pachet da distgargia 27, che elements essenzials da la politica regiunala e turistica vegnian anc adattads. En il fratemp han las Chombras federalas confermà, che las basas centralas da la politica regiunala restan mantegnidas e che las reducziuns previsas en il sectur turistic vegnan scursanidas. Uschia stattan ussa a disposiziun dapli meds finanzials che quai ch'il Cussegl federal aveva supponì en sia missiva. Ord vista da la Regenza èsi perquai indispensabel ch'il Cussegl federal curregia la missiva al parlament. En spezial n'èsi betg chapaivel, pertge che la Confederaziun planisescha gia en il project in'eventuala sortida da la politica regiunala che vegn purtada ensemen cun ils chantuns. Quai stat en cuntradicziun cun la finamira declerada, da rinforzar il svilup economic da las regiuns. La Regenza accentuescha ultra da quai la gronda impurtanza da la promoziun economica per il Grischun. Instruments sco la Nova politica regiunala (NPR), Innotour, la promoziun da l'economia naziunala u il sustegn d'interpresas pitschnas e mesaunas han furnì contribuziuns impurtantas a favur da l'innovaziun, da la digitalisaziun e dal svilup regiunal. La collavuraziun tranter la Confederaziun ed ils chantuns è perquai in element central d'ina politica economica efficazia.

Documents da consultaziun dal Departament federal d'economia, furmaziun e retschertga (DEFR)

Infurmaziuns: Departament d'economia publica e fatgs socials

La Regenza ha prendì posiziun tar in project da consultaziun da la Cumissiun per scienza, educaziun e cultura dal Cussegl naziunal (CSEC-N) concernent alternativas als experiments cun animals. La CSEC-N ha elavurà in sboz da lescha cun la finamira d'augmentar las resursas ed ils impuls per alternativas als experiments cun animals (uschenumnada perscrutaziun 3R). En il sboz èsi tranter auter previs da stgaffir secretariats spezialisads che procuran per ina clera repartiziun da la lavur tranter las perscrutadras ed ils perscrutaders, il secretariat spezialisà e la cumissiun per experiments cun animals, quai che duess permetter da garantir la qualitad.

La Regenza sustegna las stentas incontestadas per promover alternativas als experiments cun animals. En sia resposta da consultaziun beneventa ella en spezial la promoziun pli ferma dals uschenumnads princips 3R («replace, reduce, refine») sco er la meglra transparenza da projects da perscrutaziun. La Regenza refusa dentant strictamain la creaziun d'ulteriurs secretariats spezialisads en la procedura da permissiun per experiments cun animals. Las cumissiuns chantunalas actualas per experiments cun animals èn concepidas aposta per ils basegns e per ils secturs specifics respectivs en ils chantuns. Novs secretariats spezialisads indeblissan questas structuras cumprovadas e restrenschessan la flexibilitad dals chantuns. Plinavant renda la Regenza attent al fatg, ch'il stretg barat tranter las cumissiuns chantunalas e las instituziuns petentas è in factur essenzial per garantir la qualitad e per sviluppar vinavant ils princips 3R. La repartiziun da las incumbensas previsa tranter ils secretariats spezialisads e las cumissiuns per experiments cun animals è plinavant ineffizienta e chaschuna lavur administrativa e custs supplementars, senza plivalur visibla.

Documents da consultaziun da la Cumissiun per scienza, educaziun e cultura dal Cussegl naziunal (CSEC-N)

Infurmaziuns: Departament d'economia publica e fatgs socials

Tenor il conclus da la Regenza vegn mintgamai in terz dal retgav da la collecta da la Rogaziun federala 2026 attribuì a las suandantas organisaziuns che furneschan servetschs utils a favur da la populaziun grischuna: al Clom d'urgenza per geniturs (Turitg), a jugend.gr (Cuira) per il project «Lavur activa cun giuvenils online» ed a benevol Grischun (Cuira).

Il Di da la Rogaziun federala è ils 20 da settember 2026. Quel di vegn fatga en tut las baselgias dal chantun ina collecta per intents d'utilitad publica. L'utilisaziun da tala vegn determinada da la Regenza. En il quint annual 2025 ha la collecta importà 21 000 francs. Er per l'onn 2026 vegni quintà cun ina collecta da 21 000 francs.

Il Clom d'urgenza per geniturs è in post da cussegliaziun e d'urgenza per geniturs, per persunas responsablas per l'educaziun e per persunas da referiment d'uffants, da giuvenils e da giuvens creschids. Il servetsch è cuntanschibel di e notg e sa drizza a persunas ch'èn en situaziuns da grevezza, da conflict u da crisa e che dovran sustegn professiunal a curta vista. La cussegliaziun è confidenziala, gratuita e sin giavisch anonima. Jugend.gr è la federaziun tetgala da la promoziun d'uffants e da giuvenils dal Grischun. Sco post da coordinaziun e da cumpetenza promova ella la lavur cun uffants e giuvenils ordaifer la scola e s'engascha per uffants e giuvenils. Cun il project «Lavur activa cun giuvenils online» vul jugend.gr etablir la lavur digitala cun giuvenils en il chantun Grischun. La Fundaziun benevol Grischun è in post spezialisà e d'intermediaziun per engaschaments voluntars en il chantun Grischun. A persunas che vulan s'engaschar voluntarmain vegnan intermediadas organisaziuns, instituziuns ed uniuns che lavuran cun voluntarias e voluntaris. benevol Grischun infurmescha, cusseglia ed accumpogna tant las persunas voluntaras sco er las organisaziuns respectivas en dumondas da l'activitad voluntara.

Infurmaziuns: Departament d'economia publica e fatgs socials

La Regenza ha approvà la proposta per reparter la cumpart dal retgav net da l'onn da gestiun 2025 da la Fundaziun dr. Stephan à Porta sin las instituziuns grischunas da beneficenza e d'utilitad publica. La contribuziun da 320 000 francs vegn repartida sin totalmain 23 differentas instituziuns. Las grondas cumparts van a las suandantas instituziuns: jugend.gr, la federaziun tetgala da la promoziun d'uffants e da giuvenils dal Grischun (65 000 francs), Crusch blaua dal Grischun (37 000 francs), Pro Juventute, tel. 147 (35 000 francs), Agid a sasez Grischun e Post grischun da cussegliaziun per requirentas e requirents d'asil (tuts dus 25 000 francs) sco er Il Maun offert Svizra Orientala e Principadi da Liechtenstein, tel. 143 (20 000 francs).

Ultra da quai vegnan pajads ora en il chantun Grischun tut en tut 735 481 francs or da la dieschma d'alcohol da la Confederaziun. Ils daners vegnan duvrads per mesiras d'infurmaziun e d'educaziun che duain gidar a prevegnir a problems d'alcohol sco er a l'abus da drogas, da narcotics e da medicaments. Plinavant vegnan ils meds finanzials impundids per mesiras che servan ad assister uffants e giuvenils da famiglias cun problems da dependenza sco er per programs che sa drizzan a gruppas da ristga. Ultra da quai vegnan cofinanziads posts da cussegliaziun spezialisads sco er instituziuns d'assistenza e da tractament ambulant per persunas dependentas d'alcohol, da tissis enivrants, da medicaments e da drogas. Tenor la Lescha d'alcohol survegnan ils chantuns 10 pertschient dal retgav net da l'Administraziun federala d'alcohol (dieschma d'alcohol).

Differentas organisaziuns, instituziuns, uniuns, federaziuns e fundaziuns d'utilitad publica survegnan ultra da quai ina contribuziun da totalmain 400 000 francs or dal retgav da las taxas da patenta d'alcohol. Tenor la Lescha d'ustaria vegnan in terz dal retgav net dal chantun or da la taglia sin il commerzi en detagl cun bavrondas destilladas duvrà per intents d'utilitad publica e dus terzs per la promoziun dal turissem.

Infurmaziuns: Departament d'economia publica e fatgs socials

La Regenza ha approvà la dumonda da la Fundaziun Zürcher Kinder- und Jugendheime per la fasa I da la «Nova chasa d'abitar cumplementara» a Flem. Plinavant ha ella concedì ina contribuziun chantunala da circa 3,71 milliuns francs. Questa contribuziun vegn empermessa sin basa da la Lescha d'integraziun da persunas cun impediments, da l'Ordinaziun d'integraziun da persunas cun impediments sco er da la Lescha davart las scolas popularas.

La chasa d'abitar da l'Internat da scola Flem consista actualmain da duas gruppas d'abitar cun ina chombra d'in letg e cun set chombras da dus letgs. Tenor la dumonda da l'Internat da scola Flem dovrian ins dentant bunamain mo pli chombras d'in letg. L'Internat da scola Flem ha perquai inoltrà ina dumonda da construir ina nova chasa d'abitar. L'edifizi planisà è concepì sapientivamain sco chasa independenta, senza colliaziun directa cun l'edifizi d'internat existent. Questa separaziun dat spazi per utilisaziuns alternativas. L'edifizi ha tut en tut dus plauns sur terra sco er in plaun ch'è integrà per part en la terra. Il plaunterren furma l'entrada e cumpiglia a medem temp l'emprima unitad d'abitar. La gruppa d'abitar consista dad otg chombras singulas. Per motivs acustics vegn il sectur da segiurn e da mangiar cun cuschina averta separà sapientivamain da las chombras. Cumplettada vegn l'unitad cun zonas sanitaras, cun in pitschen local da retratga intern per las collavuraturas ed ils collavuraturs d'assistenza sco er cun ina gardaroba. Areguard la divisiun e l'utilisaziun è il plaun sura organisà analogamain al plaunterren. Là sa chatta in'ulteriura gruppa d'abitar da quatter cun in program da spazi cumparegliabel. Il plaun sura è concepì uschia, ch'igl è pussaivel da midar pli tard senza gronds problems l'utilisaziun (p.ex. per l'abitar assistì, sco abitaziun da persunal u per dar en locaziun a persunas externas). En il plaun sutterran èn previs in grond local polivalent sco er in biro. Plinavant cumpiglia il plaun sutterran stanzas accessoricas e locals da tecnica, tranter auter surfatschas da deposit e locals da lavar.

© Internat da scola Flem

Infurmaziuns: Departament d'educaziun, cultura e protecziun da l'ambient

La Regenza ha approvà la dumonda da la Fundaziun «Gott hilft» per la fasa II dal project da construcziun da la Scola-dimora Scharàns sut il titel «Sanaziun exteriura dal Bärenhaus e da l'externat sco er renovaziun da la producziun d'energia». La Scola-dimora Scharans porscha plaz ad uffants e giuvenils cun basegns spezials en il sectur social e da scola.

En il senn da l'ulteriur svilup strategic da l'areal sco er en vista ad in futur persistent èsi previs da reducir il consum d'energia dals singuls edifizis sco er da realisar per l'entir areal in stgaudament neutral areguard il CO₂. Ils custs totals da quest project èn budgetads cun var 1,97 milliuns francs.

© Mattli Architekten AG

Infurmaziuns: Departament d'educaziun, cultura e protecziun da l'ambient

La Regenza ha concludì da cuntinuar definitivamain cun il chanal da WhatsApp sco chanal da communicaziun uffizial da l'administraziun chantunala. Il mars 2025 aveva la Regenza concludì da far – en il rom d'in project da pilot – in test dad 1 onn cun in chanal da WhatsApp sco chanal da communicaziun da l'administraziun chantunala. Sin quai è vegnì concepì in chanal d'infurmaziun da WhatsApp per infurmar regularmain la populaziun cun cuntegns cumpacts che correspundan als basegns da las gruppas en mira. Durant la fasa da pilot è il focus vegnì mess en spezial sin la resumaziun emnila da las pli impurtantas communicaziuns dal chantun Grischun.

Sin basa dals resuns positivs da las abunentas e dals abunents vegn il chanal da WhatsApp ussa transferì en il manaschi ordinari e manà vinavant definitivamain sco chanal da communicaziun uffizial da l'administraziun chantunala.

Chanal da WhatsApp dal chantun Grischun: www.gr.ch/WhatsApp.li

Infurmaziuns: Chanzlia chantunala