Il chantun Grischun fa vinavant cun la realisaziun da la Strategia d'energia 2050. Suenter in'analisa detagliada dal potenzial metta l'Uffizi da construcziun bassa a disposiziun surfatschas adattadas vi d'infrastructuras stradalas chantunalas per projects da terzs. Oz cumenza ina procedura d'annunzia per quest intent.
La Strategia d'energia 2050 da la Svizra è in pachet da mesiras che ha l'intent da reorganisar a lunga vista il sistem d'energia en Svizra. Ella promova l'amplificaziun d'energias regenerablas per reducir la dependenza da funtaunas d'energia betg regenerablas e per augmentar l'effizienza energetica. Ina finamira centrala da la strategia è quella da cuntanscher la neutralitad climatica fin l'onn 2050. Quai vul dir: Netto na vul la Svizra emetter fin lura nagins gas cun effect da serra pli. Tranter auter duai quai vegnir cuntanschì tras l'amplificaziun da las energias regenerablas, tras mesiras d'effizienza e tras innovaziuns tecnologicas.
En la sessiun da december 2024 ha il Cussegl grond surdà a la Regenza l'incumbensa Mazzetta concernent in'offensiva solara vid las infrastructuras stradalas chantunalas. Questa incumbensa ha la finamira d'examinar e nizzegiar sistematicamain il potenzial per producir energia solara vi d'infrastructuras stradalas, sco per exempel vi da mirs da sustegn u sin autras surfatschas adattadas. Il chantun è vegnì incaricà d'analisar detagliadamain il potenzial e da metter a disposiziun ils resultats betg mo intern, mabain er a firmas privatas, per uschia promover l'installaziun d'implants fotovoltaics vi d'infrastructuras stradalas. Uschia vul il Grischun augmentar l'atgna producziun d'energia regenerabla e pussibilitar a terzs da trair a niz il potenzial cun lur implants. Il 2025 han ins analisà il potenzial ed eruì ils lieus adequats. En la proxima fasa sa tracti da chattar terzs ch'èn interessads d'utilisar quests lieus.
L'Uffizi da construcziun bassa installescha sez implants fotovoltaics
L'Uffizi da construcziun bassa (UCB) installescha sez implants fotovoltaics en lieus, nua che l'electricitad po vegnir producida en moda rentabla e duvrada directamain per proveder l'infrastructura stradala.
Projects fotovoltaics innovativs da terzs
Las surfatschas vi d'infrastructuras stradalas, ch'il UCB n'utilisescha betg per agens implants fotovoltaics, vegnan messas a disposiziun activamain a terzs. Qua tras vul il UCB promover novs implants, particularmain vi da mirs da sustegn. Uschia pon ils interessads inoltrar annunzias per installar e manar agens implants en lieus cun potenzial, premess che las prescripziuns e las premissas giuridicas e tecnicas respectivas sco er las disposiziuns da segirezza vegnian observadas.
Sa participar a la procedura d'annunzia per installar implants fotovoltaics dastgan vischnancas da las regiuns respectivas, interpresas dal provediment d'energia u autras interpresas instituziunalas. Ellas planiseschan, construeschan e mainan quests implants en atgna responsabladad durant tut il temp ch'els èn en funcziun. Il chantun na sa participescha betg als custs da planisaziun, da realisaziun e da gestiun dals implants. Plinavant ston ellas vender sezzas l'electricitad producida, vul dir chattar consumentas e consuments al lieu ubain inducir l'electricitad en la rait. Ils terzs èn er responsabels sezs per chattar puncts adattads per inducir l'electricitad en la rait. Persunas privatas u interpresas fitg pitschnas na vegnan betg admessas a la procedura d'annunzia.
Procedura d'annunzia per installar, manar e mantegnair implants fotovoltaics per lung da las vias chantunalas grischunas tras terzs
Dapi la revisiun parziala ch'è vegnida concludida da la Regenza per il 1. da zercladur 2023, prevesa l'Ordinaziun davart las vias dal chantun Grischun (OVias; DG 807.110) explicitamain, che terzs pon utilisar gratuitamain l'infrastructura stradala per edifizis e stabiliments per producir energia regenerabla.
Sin basa da quai realisescha il UCB a partir dad oz ina procedura d'annunzia per terzs interessads. Qua tras duai vegnir garantì, ch'il potenzial da fotovoltaica per lung da las vias chantunalas vegnia nizzegià il meglier pussaivel.
La procedura d'annunzia ha lieu sco suonda:
- Annunzia da l'interess per in project
- Inspecziun dals lieus cun terzs interessads
- Annunzia per ils lieus d'implants
- Communicaziun da l'attribuziun dals lieus d'implants
- Permissiun d'utilisaziun
- Permissiun da construcziun
Fotografia:
Implant fotovoltaic tar il tunnel Plattas, via da Tràn
Agiunta:
Link a la pagina d'internet cun tut ils documents
Infurmaziuns:
Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 9.30 fin las 10.30), e‑mail Reto.Knuchel@tba.gr.ch
Responsabladad: Uffizi da construcziun bassa