L'onn 2025 han ins tgirà 3580 hectaras guaud en il Grischun. A medem temp è la quantitad da laina donnegiada sa diminuida cleramain. Per l'onn 2026 prevesa il project collectiv Selvicultura 2026 da tgirar ulteriuras circa 3500 hectaras guaud – da quellas 2500 hectaras guaud da protecziun e 660 hectaras a favur da la promoziun da la biodiversitad forestala.

L'onn 2025 han ins tgirà tut en tut 3580 hectaras guaud en il Grischun. Quai è ina diminuziun dad 8 pertschient en cumparegliaziun cun l'onn precedent. La quantitad da laina racoltada ha cumpiglià 360 000 meters cubics ed è pia inferiura a la valur da l'onn precedent da 380 000 meters cubics. Il tagl annual en il chantun permetta ina racolta annuala media da 390 000 meters cubics. Diminuida cleramain è la quantitad da l'uschenumnada laina donnegiada – quai vul dir bostgs ch'ins ha stuì pinar pervia da stemprads, sitgira u parasits. Questa quantitad è sa reducida per 70 pertschient sin 35 000 meters cubics. Quai è pia main che 10 pertschient da tut la laina racoltada. Il bau-scorsa, ch'è vegnì promovì tras l'aura chauda e sitga, ha chaschunà circa la mesadad dals donns. Var in quart è stà laina terrada da stemprads.

Promover sistematicamain il guaud da protecziun e la biodiversitad
La Confederaziun ed il chantun han sustegnì las proprietarias ed ils proprietaris da guaud l'onn 2025 cun 16,95 milliuns francs per tgirar passa 2000 hectaras guaud da protecziun. Ulteriurs 2,82 milliuns francs èn vegnids impundids per eliminar donns da guaud. La finamira da questa mesira è da garantir a lunga vista la funcziun da protecziun dal guaud, quai cun promover la regiuvinaziun e la stabilitad dals guauds e cun evitar, sche pussaivel, donns consecutivs. En regiuns pertutgadas spezialmain èsi decisiv da reducir l'influenza da la selvaschina sin la regiuvinaziun dal guaud. La basa per quai è la strategia «Spazi da viver guaud-selvaschina» che la Regenza grischuna ha deliberà l'onn 2021. Ulteriurs projects sustegnan mesiras per promover la biodiversitad forestala. Per mantegnair la diversitad biologica èn vegnidas cultivadas var 500 hectaras guaud.

Preparar ils guauds per la midada dal clima
Grazia a mesiras supplementaras da la Confederaziun e dal chantun èn vegnids cultivads cun la crana a cabel guauds strusch accessibels ch'èn situads ordaifer il guaud da protecziun ed èn vegnidas tgiradas surfatschas da guaud giuven. La tgira da guauds giuvens ordaifer il guaud da protecziun ha cumpiglià l'onn 2025 130 hectaras. Ella procura per la stabilitad futura dals guauds e per ina cumposiziun da las spezias da bostgs adattadas al clima. S'augmentadas èn las surfatschas cultivadas cun la crana a cabel ch'èn situadas ordaifer il guaud da protecziun: Ellas èn creschidas sin 192 hectaras. Ch'ins ha tut en tut pudì tractar dapli surfatscha en ils differents programs, è cunzunt d'attribuir a la quantitad da laina donnegiada, ch'è sa diminuida cleramain. Uschia èn las resursas dals manaschis forestals publics e da las interpresas forestalas puspè stadas a disposiziun pli savens per las intervenziuns previsas. Las interpresas forestalas han surpiglià 65 pertschient da la quantitad da laina racoltada. La cumpart da las prestaziuns externas a tut las lavurs en il guaud è stada 43 pertschient.

Approvà il project collectiv Selvicultura 2026
Per l'onn 2026 han las tschintg regiuns da l'Uffizi da guaud e privels da la natira ensemen cun las circa 200 proprietarias e proprietaris da guauds publics e privats puspè elavurà projects regiunals. Quests projects cumpiglian ils programs guaud da protecziun, biodiversitad forestala, cultivaziun dal guaud ordaifer il guaud da protecziun e cuntinueschan cun las plantaziuns d'emprova da spezias da bostgs adattadas a la midada dal clima. Il project collectiv Selvicultura 2026 prevesa da tractar var 3500 hectaras guaud:

• La pli gronda part concerna la tgira da 2500 hectaras guaud da protecziun, per proteger en moda persistenta abitadis, vias da traffic ed infrastructuras cunter privels da la natira.
• Per promover la biodiversitad duain vegnir revalitads sin passa 660 hectaras tranter auter spazis da viver da la giaglina da taus, guauds da pasculaziun, chaglioms spezials, urs da guauds e guaudets da chastagners al sid da las Alps.
• Sin var 350 hectaras ordaifer il guaud da protecziun èsi previs da prender mesiras per tgirar il guaud giuven e per tgirar la stabilitad sco er da duvrar la crana a cabel per racoltar laina e da promover la regiuvinaziun dal guaud. Er questas mesiras megliereschan las relaziuns da la glisch ed han in effect positiv per il spazi da viver da las spezias d'animals e da plantas indigenas.
• La cultivaziun da las plantaziuns d'emprova tranter il 2020 ed il 2023 sin otg surfatschas cun spezias da bostgs adattadas a la midada dal clima cuntinuescha e vegn accumpagnada scientificamain da l'Institut federal per la perscrutaziun da guaud, naiv e cuntrada (WSL).

La Regenza ha approvà il project collectiv Selvicultura 2026 cun custs totals da 33,3 milliuns francs ed ha garantì a las proprietarias ed als proprietaris da guaud participads contribuziuns chantunalas da tut en tut 27,6 milliuns francs.

Fotografias:

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 01 (cuntanschibla da las 13.00 fin las 14.00), e-mail Carmelia.Maissen@diem.gr.ch
• Urban Maissen, selvicultur chantunal, Uffizi da guaud e privels da la natira, tel. +41 81 257 38 51 (cuntanschibel da las 10.00 fin las 11.00), e-mail Urban.Maissen@awn.gr.ch