Oz glindesdi han las collavuraturas ed ils collavuraturs da las medias survegnì per l'emprima giada invista dal grond plazzal dal nov Center da scola auta spezialisada dal Grischun a Cuira. Quai en il rom d'ina visita guidada. Il nov edifizi vegn a porscher localitads ed infrastructuras modernas per studegiar e perscrutar. La retratga è planisada per mez da l'onn 2028.

Stgars in onn e mez suenter l'emprima badigliada per il nov Center da scola auta spezialisada dal Grischun ha l'Uffizi da construcziun auta envidà las elavuraturas ed ils elavuraturs da laina ch'èn participads a la construcziun, ad ina visita guidada tras il plazzal en preschientscha da la cussegliera guvernativa Carmelia Maissen, scheffa dal Departament d'infrastructura, energia e mobilitad. «Il progress rasant da las lavurs da construcziun è impressiunant – al lieu sa mussan las dimensiuns e la gronda cumplexitad dal project», ha la cussegliera guvernativa Carmelia Maissen accentuà en ses pled.

Bilantscha intermediara positiva
Il nov edifizi da la Scola auta spezialisada è in dals pli gronds projects da construcziun auta dal chantun. Il manaschi current sin il plazzal ed il grond tempo pretendan ina planisaziun prospectiva sco er ina coordinaziun precisa. «Il project progredescha tenor urari: Las etappas fixadas vegnan cuntanschidas a temp, malgrà termins stretgs, ed er ils custs sa movan en il rom da las directivas dal preventiv», ha la cussegliera guvernativa Carmelia Maissen tratg bilantscha. Tras il nov edifizi persistent vegnan l'instrucziun e la perscrutaziun unidas en l'avegnir en in nov campus per las studentas ed ils students sco er per las collavuraturas ed ils collavuraturs. Oz è la Scola auta spezialisada repartida sin tschintg lieus en nov edifizis entaifer la citad da Cuira.

Travs da lain da guauds grischuns
La laina per la structura purtanta dal palantschieu sura deriva da guauds grischuns. Il lain è vegnì pinà l'enviern 2024 e lura taglià e setgentà en differentas resgias dal chantun. Silsuenter han las interpresas da construcziun en lain elavurà las travs, per lura montar ellas sin il plazzal. «Per in project da tala dimensiun èsi organisatoricamain pretensius da procurar la laina en las regiuns: 33 vischnancas, 8 resgias ed ina cuminanza da lavur cun 4 lainarias èn participadas e ston vegnir coordinadas», ha explitgà l'architect chantunal Andreas Kohne. Il nov edifizi vegn realisà en moda persistenta: Grazia a l'utilisaziun sistematica da materialias optimalas vegnan schanegiadas resursas e spargnads custs a lunga vista. Uschia ha la construcziun dal palantschieu sura, che vegn realisà en moda ibrida cun lain e betun, bler main emissiuns da CO2 ch'ina moda da construcziun massiva. «Las vistas sut da las travs da lain massiv restan visiblas e vegnan a caracterisar ils locals dal nov edifizi», ha ditg Andreas Kohne. Quest process da l'elavuraziun da laina è vegnì documentà en in film da trais parts cun il titel «Holzwege»; la part finala cumpara quests dis.

Festa da ventschidas sco proxima etappa
Ils proxims mais cuntinueschan las lavurs da la construcziun brutta, e l'edifizi vegn a crescher auzada per auzada. L'atun 2026 vegn la construcziun brutta ad esser terminada, ed il proxim term impurtant vegn cuntanschì. Alura cumenza la montascha da la fatschada. Sche tut va tenor plan, po il nov Center da scola auta spezialisada vegnir retratg mez da l'onn 2028. Ils custs per il project general – inclusiv la renovaziun da l'immobiglia a la Pulvermühlestrasse 68 – importan 178 milliuns francs. Il Cussegl grond ha approvà il credit d'impegn da 151 milliuns francs l'october 2022, il pievel grischun ha acceptà il project il mars 2023.

Agiunta:

Flyer d'infurmaziun davart la construcziun

Dapli infurmaziuns:

Tut las infurmaziuns davart il project èn da chattar qua.

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch
• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 13.00 fin las 14.00), e‑mail Andreas.Kohne@hba.gr.ch

Responsabladad: Uffizi da construcziun auta

Cronica dal Center da scola auta spezialisada dal Grischun:

• Favrer 2015: Incumbensa dal Cussegl grond a la Regenza da far scleriments per construir in center da scola auta per la SASGR (l'anteriura Scola auta da tecnica ed economia [SATE] Cuira) e da suttametter al Cussegl grond in project cun in credit da construcziun.
• 2017–2020: En ses program 2017–2020 fixescha la Regenza da promover cun prioritad in tala construcziun.
• October 2018: Il Cussegl grond approvescha la realisaziun d'in center da scola auta a la Pulvermühlestrasse a Cuira.
• November 2020: A chaschun da la votaziun dal pievel dals 29 da november 2020 acceptan las votantas ed ils votants da Cuira la midada da zona e la cessiun da terren da la citad da Cuira.
• Settember 2020 – october 2021: Realisaziun d'ina concurrenza da projects selectiva da dus stgalims
• October 2021: La Regenza surdat l'incumbensa per il nov Center da scola auta spezialisada dal Grischun al team da planisaders generals dal project «Partenaris» sut la direcziun dal biro d'architectura Giuliani Hönger Architekten da Turitg. Els han gudagnà la concurrenza da projects da dus stgalims.
• October 2022: Il Cussegl grond approvescha il credit d'impegn da 151 milliuns francs per realisar il nov Center da scola auta spezialisada.
• Mars 2023: Il pievel grischun accepta cun passa 83 pertschient da las vuschs il project «Realisaziun dal Center da scola auta spezialisada dal Grischun». Il project cumpigliava in credit d'impegn da 151 milliuns francs. Las investiziuns totalas per il project general, inclusiv la renovaziun da l'immobiglia a la Pulvermühlestrasse 68, duain importar var 178 milliuns francs.
• Mars 2024: Il chantun, respectivamain l'Uffizi da construcziun auta cumpetent, inoltrescha la dumonda da construcziun a la citad da Cuira.
• Zercladur 2024: La citad da Cuira dat la permissiun da construcziun al chantun respectivamain a l'Uffizi da construcziun auta cumpetent.
• 28 da november 2024: Emprima badigliada per il nov Center da scola auta spezialisada (CSASGR)
• 20 da schaner 2025: cumenzament da las lavurs da construcziun