La gievgia ha gì lieu in inscunter tranter represchentantas e represchentants dal Departament da giustia, segirezza e sanadad, da l'Uffizi da migraziun e da dretg civil sco er da la vischnanca burgaisa da Roveredo. A chaschun da quest inscunter èn vegnidas tematisadas las incumbensas da la vischnanca burgaisa en connex cun la procedura da natiralisaziun.

La procedura da natiralisaziun en Svizra ha plirs stgalims e cumpiglia controllas dals chantuns e da la Confederaziun. Uschia èsi garantì, che mo persunas cun ina buna reputaziun penala survegnan la naziunalitad svizra. La gievgia han l'Uffizi da migraziun e da dretg civil ed il Departament da giustia, segirezza e sanadad exprimì envers las represchentantas ed ils represchentants da la vischnanca burgaisa da Roveredo, ch'els spetgian che las proceduras da natiralisaziun a Roveredo vegnian realisadas en moda giuridicamain correcta ed entaifer ils termins previs. «Proceduras da natiralisaziun na dastgan betg vegnir retardadas pauschalmain cun l'argument dal cumbat cunter la mafia. Las vischnancas burgaisas ston garantir in'elavuraziun differenziada ed effizienta, er per betg periclitar la confidenza en il stadi da dretg. La concessiun d'ina permissiun da dimora n'ha dal rest nagin connex direct cun la procedura da natiralisaziun. Quai èn duas proceduras separadas», ha ditg il cusseglier guvernativ Peter Peyer suenter l'inscunter.

Ultra da las incumbensas da la Confederaziun, dal chantun e da las vischnancas burgaisas grischunas en connex cun la procedura da natiralisaziun è er il cumbat cunter la criminalitad organisada stà in tema da l'inscunter. A las represchentantas ed als represchentants da la vischnanca burgaisa da Roveredo èsi vegnì explitgà, tge incumbensas che las vischnancas, il chantun, la Confederaziun e la societad civila han en quest connex. A medem temp han las represchentantas ed ils represchentants dal chantun er demussà chapientscha per la preoccupaziun da la vischnanca burgaisa da Roveredo. Ellas ed els han prendì encunter propostas per garantir la segirezza cura ch'i sa tracta da dar permissiuns, n'emporta betg da tge gener. Questas propostas vegnan ussa integradas en las ulteriuras lavurs dal chantun per cumbatter la criminalitad organisada.

Infurmaziuns:

Niculin Mosca, manader da l'Uffizi da migraziun e da dretg civil, tel +41 81 257 25 22 (cuntanschibel il venderdi da las 08.00 fin las 10.00), e‑mail Niculin.Mosca@afm.gr.ch

Responsabladad: Uffizi da migraziun e da dretg civil