La Regenza ha garantì a l'uniun purtadra alpinavera ina contribuziun totala da maximalmain 1,25 milliuns francs per ils onns 2027 fin 2031. Questa contribuziun vegn pajada en transchas annualas da mintgamai 250 000 francs. Ulteriuras contribuziuns vegnan prestadas dals chantuns Uri e Tessin, ch'èn participads ad alpinavera, sco er da la Confederaziun.

Alpinavera è ina da quatter organisaziuns svizras ch'èn activas sin plaun surregiunal e che promovan la vendita e l'ulteriur svilup da products regiunals cun il certificat «regio.garantie». Alpinavera cumpiglia ils chantuns Grischun, Uri e Tessin. Las autras organisaziuns èn «Das Beste der Region» per la Bassa Centrala, «Culinarium» per la Svizra Nordorientala e «regio.garantie Romandie» per la Svizra Franzosa, inclusiv il chantun Vallais.

Ils ultims onns è la dumonda per products regiunals s'augmentada vinavant. Alpinavera è creschida fermamain areguard il dumber da manaschis participads ed areguard la valur dals products certifitgads. Ella ha pudì trair a niz la tendenza a la regiunalitad a favur dals manaschis en ils chantuns participads. En il fratemp fan 579 manaschis part d'alpinavera.

Infurmaziuns: Departament d'economia publica e fatgs socials

La Regenza ha prendì enconuschientscha dal fatg, ch'ils suandants projects federals vegnan suttamess dumengia, ils 27 da settember 2026, a la votaziun dal pievel:

• Iniziativa dal pievel «Mantegnair la neutralitad svizra (Iniziativa da neutralitad)» (Fegl uffizial federal 2026 799);

• Iniziativa dal pievel «Per in'alimentaziun segira – grazia al rinforzament d'ina producziun indigena duraivla, a dapli victualias vegetalas ed ad aua da baiver netta (Iniziativa d'alimentaziun)» (Fegl uffizial federal 2026 800).
  

Sin plaun chantunal vegni votà davart la suandanta fatschenta:

• Revisiun parziala da la Constituziun dal chantun Grischun (vegliadetgna da votar 16)

Infurmaziuns: Chanzlia chantunala