L'onn da scola 2025/26 va bainbaud a fin. L'Uffizi per la scola populara ed il sport fa ina bilantscha positiva. Ils pli impurtants temas èn stads la realisaziun da novaziuns legalas, l'accumpagnament sistematic da novas direcziuns da scola sco er furmaziuns supplementaras per persunas d'instrucziun davart temas actuals. Per la fin da l'onn da scola visitan il cusseglier guvernativ Jon Domenic Parolini e la manadra da l'uffizi Chantal Marti-Müller la scola da Vaz sut.

Oz va l'onn da scola 2025/26 a fin per la gronda part da las scolas popularas en il Grischun. L'Uffizi per la scola populara ed il sport (USS) profita da questa chaschun per guardar enavos sin tscherts temas.

Novaziuns legalas
Cun il cumenzament da l'onn da scola 2025/26 è entrada en vigur la revisiun parziala da la Lescha davart las scolas popularas. La nova basa legala ha purtà intginas midadas. Tranter auter èsi da nov obligatoric da frequentar durant 2 onns la scolina e las cundiziuns d'engaschament e da lavur da las persunas d'instrucziun èn vegnidas meglieradas. Il USS constatescha, ch'ils purtaders da scola han realisà per gronda part bain las novaziuns en la pratica. Anc adina sustegna il USS las direcziuns da scola tar la realisaziun.

Introducziun per novas direcziuns da scola
Per rinforzar la funcziun impurtanta da las direcziuns da scola, ha il USS introducì l'onn da scola 2025/26 per l'emprima giada in program da sustegn. Durant lur emprim onn da servetsch èn las 17 novas direcziuns da scola sa participadas a duas occurrenzas obligatoricas. Supplementarmain èn ellas vegnidas cussegliadas individualmain per discutar dumondas actualas en moda pratica ed effizienta. Ils resuns davart il nov program èn fitg legraivels: La «introducziun per direcziuns da scola» vegn percepida sco purschida utila.

Furmaziuns supplementaras davart temas actuals
Sfidas socialas sa mussan adina er en il mintgadi da scola. Las scolas popularas grischunas tractan questas midadas cun precauziun, per exempel en connex cun la furmaziun digitala, la promoziun da la sanadad u la lavur da geniturs. Direcziuns da scola e persunas d'instrucziun duain pudair dumagnar en moda cumpetenta svilups impurtants. Per quest intent ha il USS incumbensà la Scola auta da pedagogia dal Grischun d'elavurar e realisar 13 furmaziuns supplementaras entaifer la scola, cun las qualas entirs teams da scola pon approfundar sistematicamain lur savida davart temas actuals.

Cumpetenzas fundamentalas en lingua da scola ed en matematica
Vers la fin da l'onn da scola hai dà il matg 2026 ultra da quai ina communicaziun legraivla degna da vegnir menziunada: Tant en tadlar e leger en la lingua da scola sco er en matematica ha la gronda part da las scolaras e dals scolars grischuns testads da la 2. classa dal stgalim primar cuntanschì las cumpetenzas da basa ed han terminà fitg bain il test cumpareglià cun l'entira Svizra.

Visita da la scola da Vaz sut
A chaschun da l'ultim di da scola visitan il cusseglier guvernativ Jon Domenic Parolini e la manadra da l'Uffizi per la scola populara ed il sport, Chantal Marti-Müller, la scola a Vaz sut. Ensemen cun las var 300 scolaras e scolars sco er cun lur geniturs ed il persunal d'instrucziun dastgan els assister a quest di spezial e guardar enavos sin l'onn da scola passà. L'occurrenza da finiziun vegn organisada da las scolaras e dals scolars da la 3. classa dal stgalim secundar I.

Infurmaziuns:

• Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
• Dr. Chantal Marti-Müller, manadra da l'Uffizi per la scola populara ed il sport, e‑mail Chantal.Marti@avs.gr.ch

Responsabladad: Uffizi per la scola populara ed il sport