Tgi che tschertga sustegn, po da nov utilisar il catalog da tschertga online «find help» en passa 20 linguas. Da nov èn tut las trais linguas chantunalas disponiblas. Uschia chattan persunas pli simpel las purschidas socialas e da sanadad adattadas – tranter quellas er persunas che na discurran betg bler u insumma betg tudestg. Ils ultims 12 mais han var 95 000 persunas fatg diever da la purschida (incl. portal central).
«find help» gida las abitantas ed ils abitants da chattar svelt e nuncumplitgadamain las purschidas d'agid e da sustegn adattadas. L'utilisaziun è gratuita e anonima. Sin la plattafurma datti purschidas davart temas sco la sanadad psichica, famiglia, dependenzas, difficultads finanzialas u situaziuns da crisa persunalas. La plattafurma è vegnida sviluppada dal Forum da la Svizra Orientala per la sanadad psichica. Il Post spezialisà per la promoziun da la sanadad e l'Uffizi chantunal dal servetsch social han realisà communablamain «find help» en il chantun.
Leger e filtrar sistematicamain las purschidas en la lingua materna
Cun agid da las extensiuns tecnicas vegnan tant la surfatscha d'utilisaziun sco er las descripziuns da las purschidas translatadas automaticamain en la lingua selecziunada. La lingua s'adatta automaticamain a las configuraziuns dal browser d’internet utilisà. Las utilisadras ed ils utilisaders pon dentant adina sezs midar la lingua. Las datas da contact e las indicaziuns davart las instituziuns restan senza midadas en l'original.
Cunzunt pratic per la tschertga: Da nov vesan ins sin l'emprima egliada, en tge lingua ch'ina purschida vegn manada tras e sche servetschs d'interpretaziun stattan a disposiziun. Cun la tschertga dal lieu da domicil integrada vegnan mo las purschidas mussadas ch'èn disponiblas per il lieu da domicil respectiv. Per quai tanschi d'endatar il numer postal.
Plattafurma communabla per tut ils chantuns partenaris e per tut las regiuns
Cun la plurilinguitad na vegnan betg novas prestaziuns stgaffidas, mabain existentas fatgas pli accessiblas. Gist en situaziuns engrevgiantas gida l'orientaziun en l'atgna lingua a chattar pli svelt il sustegn adattà.
Ils chantuns e las regiuns participadas dovran communablamain la medema plattafurma tecnica. Uschia pon las purschidas vegnir registradas ina giada e silsuenter messas a disposiziun a pliras regiuns. Er las translaziuns vegnan fatgas automaticamain e na ston betg vegnir tgiradas separadamain.
Dapli infurmaziuns:
Fotografia:
©find help
Infurmaziuns:
Denise Rudin, manadra dal Post spezialisà per la promoziun da la sanadad, tel. +41 81 257 64 02 (cuntanschibla da las 09.00 fin las 12.00 e da las 14.00 fin las 16.00), e‑mail Denise.Rudin@san.gr.ch
Responsabladad: Uffizi da sanadad