La Regenza ha prendì posiziun davart in project da consultaziun dal Departament federal da giustia e polizia en connex cun la midada planisada da la Lescha federala davart l'acquist da bains immobigliars tras persunas da l'exteriur. Tenor la Regenza n'èn las disposiziuns pli severas previsas betg adattadas per far frunt a las sfidas che resultan da l'immigraziun respectivamain da l'augment da la populaziun. Perquai refusa la Regenza las midadas. Uschia è la Regenza dal medem avis sco la Conferenza dals directurs chantunals da l'economia publica (CDE), la Conferenza da las regenzas dals chantuns alpins (CRCA) e la federaziun da branscha HotellerieSuisse.

En sia posiziun renda la Regenza attent, ch'ils problems dal martgà d'abitaziuns na possian betg vegnir mitigiads. Cunzunt ils territoris turistics en las regiuns da muntogna èn dependents d'investiziuns da l'exteriur per ils manaschis d'alloschament. La revisiun engrevgiass fermamain la branscha d'alloschament: ella na resguarda betg las realitads dal martgà, na tegna betg quint da la pratica da finanziaziun, pudess franar investiziuns e periclitar la midada structurala. Questa periclitaziun dals models da fatschenta cumprovads en il sectur turistic tutgass ed indebliss cunzunt las regiuns perifericas. Pervia da las adattaziuns dals causals da permissiun fissi ultra da quai da quintar tut en tut cun in fitg grond surpli da lavur per las autoritads chantunalas da permissiun.

Consultaziuns dal Departament federal da giustia e polizia

Infurmaziuns: Departament d'economia publica e fatgs socials

La Regenza ha approvà il project «Renovaziun da l'avertura dal guaud Mon» da la vischnanca d'Alvra ed ha deliberà ina contribuziun chantunala maximala da circa 3,2 milliuns francs per quest intent.

Il project cumpiglia la renovaziun e l'engrondiment da la via d'avertura principala da Mon fin Dartschapetta en la vischnanca d'Alvra. Questa via serva sco access als guauds sur Mon. Ils trajects parzials asfaltads èn arrivads a la fin da lur vita e lur capacitad da chargia na po betg pli ademplir las pretensiuns modernas dals transports da laina. Er la ladezza da la via e l'access a la via chantunala da colliaziun n'èn betg concepids per las dimensiuns da camiuns d'ozendi. Cun renovar e schlargiar l'avertura existenta vegnan stgaffidas las premissas per pudair tgirar e cultivar il guaud en moda persistenta ils proxims decennis. Ils custs totals per renovar l'avertura dal guaud importan circa 4,6 milliuns francs.

 

Infurmaziuns: Departament d'infrastructura, energia e mobilitad

La Regenza ha approvà la dumonda da la vischnanca da San Murezzan da dischlocar las raits chantunalas da vias e sendas (senda da viandar, via da velos tenor il Plan sectorial Velo) sin la nova punt da peduns e velos Punt da Piz a la riva nord dal Lai da San Murezzan. Tenor la stimaziun da la vischnanca custa questa punt circa 2,13 milliuns francs. A la part subvenziunabla da quai sa participescha il chantun cun 60 pertschient (maximalmain 609 412 francs).

 

© Masotti & Associati SA

Infurmaziuns: Departament d'infrastructura, energia e mobilitad

La Regenza ha approvà las revisiuns parzialas da las planisaziuns localas concludidas da las vischnancas da Flearda (ils 5 da december 2025), Urmagn (ils 11 da december 2025) e Tschappina (ils 19 da schaner 2026). Questas revisiuns parzialas han la finamira d'ennavar pli effizientamain il territori da skis Tschappina-Lüsch-Urmagn.

Il territori da skis da la Mantogna è da gronda impurtanza per la regiun e per il turissem d'enviern. Pervia da la stgaudada cuntinuanta dal clima è il territori da skis confruntà pli e pli savens cun ina mancanza da naiv, e la perioda per in'ennavada tecnica daventa pli e pli curta. Per il manaschi futur duain las axas principalas dal territori da skis pudair vegnir ennavadas pli effizientamain. Cun las revisiuns parzialas da las planisaziuns localas da las vischnancas da Flearda, Urmagn e Tschappina vegnan stgaffidas las premissas respectivas. Ils indrizs d'ennavar existents ston vegnir cumplettads, e las surfatschas ennavadas ston vegnir adattadas.

Infurmaziuns: Departament d'economia publica e fatgs socials

La Regenza ha approvà la revisiun totala da la planisaziun locala, che la vischnanca da Landquart ha concludì ils 28 d'october 2024. Il motiv decisiv per la nova planisaziun è stà quel da resguardar las prescripziuns dal dretg da planisaziun surordinà. L'emprima etappa da la revisiun dal dretg davart la planisaziun dal territori (LPT1) ha principalmain la finamira da franar l'extensiun da las zonas da construcziun en il terren cultivà e da diriger il svilup dals abitadis vers anen.

Tut en tut ha la vischnanca da Landquart engrondì sia zona d'abitar, maschadada e dal center (ZAMC) per 55 286 meters quadrat. Plinavant èn vegnidas determinadas differentas mesiras per promover il svilup da l'abitadi vers anen, sco azonaziuns, l'augment dals grads d'utilisaziun, la garanzia da spessezzas minimalas ed il relasch d'obligaziuns da far planisaziuns consecutivas. A medem temp èn vegnidas reunidas las duas leschas da construcziun da las anteriuras vischnancas da Mastrils e dad Igis. La vischnanca ha er prendì mesiras per mobilisar terren da construcziun en zonas da construcziun existentas. Ultra da quai ha ella introducì in'obligaziun da surbajegiar las zonas da construcziun existentas entaifer 8 onns. Plinavant ha la vischnanca determinà en il plan general da furmaziun surfatschas libras e lingias da furmaziun per construir. La finala è l'entir project da planisaziun vegnì accordà cun ils pli novs plans da la mesiraziun funsila e cun las prescripziuns da la digitalisaziun.

© Andrea Badrutt

Infurmaziuns: Departament d'economia publica e fatgs socials

La Regenza ha approvà ina incarica da prestaziun 2026–2027 cun la Fundaziun Pro Senectute Grischun. L'incarica entra en vigur retroactivamain per il 1. da schaner 2026 e vala fin ils 31 da december 2027.
La Fundaziun Pro Senectute Grischun è in'organisaziun spezialisada d'agid e da servetsch per persunas pli veglias en il chantun Grischun. Ella furnescha prestaziuns en ils suandants secturs: cussegliaziun sociala, cussegliaziun finanziala, furmaziun, cultura, sport e moviment, purschidas da distgargia e projects da generaziuns.

Infurmaziuns: Departament d'economia publica e fatgs socials