En la regiun Moesa vegn da nov pretendì transitoricamain in extract dal register penal per la concessiun d'ina nova permissiun L, B u G a burgaisas e burgais da la UE/AECL. L'adattaziun temporara da la pratica duai servir a la segirezza e prevenziun. La fin da l'onn vegn ella evaluada.
Questa mesira duai gidar a cumbatter la criminalitad organisada en la regiun Moesa. En il rom d'ina acziun internaziunala da polizia la fin da favrer da quest onn èn vegnidas arrestadas en tut set persunas en la Frantscha ed en l'Italia. Quatter da questas persunas estras cun in connex presumtiv cun la criminalitad organisada eran annunziadas a Roveredo.
La nova pratica da pretender in extract dal register penal vala per dumondas che vegnan inoltradas tant tar las vischnancas sco er sur il spurtegl online. Per entant è la mesira limitada fin ils 31 da december 2026. Silsuenter vegnan evaluadas l'efficacitad da la mesira sco er las consequenzas praticas per ils process administrativs da las vischnancas pertutgadas e da l'Uffizi da migraziun e da dretg civil dal Grischun (UMDC).
Integraziun pli ferma da las vischnancas
Suenter in'analisa conscienziusa ed en stretg barat cun il chantun vischin Tessin, che pretenda gia dapi in temp pli lung extracts dal register penal da burgais da la UE/AECL sco standard, è vegnida sviluppada ina pratica cumparegliabla per la regiun Moesa.
Plinavant vegnan las controllas d'abitants da las vischnancas da la regiun Moesa integradas pli fitg en il process d'examinaziun da las dumondas per ina permissiun. Lur constataziuns e lur valitaziuns vegnan resguardadas sistematicamain en l'ulteriur giudicament da las dumondas.
Il UMDC fa quint che la mesira chaschunia lavur e custs supplementars considerabels. Igl è da spetgar, che la durada da l'elavuraziun da las dumondas vegn a sa prolungar sin l'entir plaun chantunal e ch'il dumber total dals dossiers pendents vegn a s'augmentar. En vista al caracter temporar da la mesira ed a las novas enconuschientschas che resultan, paran la lavur ed ils custs supplementars respectivs dentant giustifitgabels.
Infurmaziuns:
Niculin Mosca, manader da l'Uffizi da migraziun e da dretg civil, tel. +41 81 257 25 22 (cuntanschibel da las 08.00 fin las 10.00), e‑mail Niculin.Mosca@afm.gr.ch
Responsabladad: Uffizi da migraziun e da dretg civil