L'Uffizi d'informatica ha constatà ina cyberattatga sin in server da SharePoint dal chantun. Tenor las emprimas enconuschientschas n'èn naginas datas vegnidas enguladas e nagins contos vegnids haccads. Actualmain vegnan fatgas lavurs d'analisa.

Ier ha l'Uffizi federal d'informatica e da telecommunicaziun (UFIT) infurmà davart ina cyberattatga sin servers da SharePoint da la Confederaziun. Ils spezialists da segirezza da l'Uffizi chantunal d'informatica (UI) han ussa constatà in incident sumegliant sin il conturn da SharePoint dal chantun, che vegn duvrà per publitgar las paginas d'internet da l'administraziun chantunala.

In'emprima analisa ha mussà, ch'i na dat nagins indizis che contos sajan vegnids haccads u datas vegnidas enguladas. Infurmaziuns confidenzialas u datas persunalas ch'èn spezialmain degnas da vegnir protegidas, n'èn en mintga cas betg pertutgadas, perquai che talas na vegnan betg arcunadas sin servers da SharePoint. Las lavurs d'analisa detagliadas cuntinueschan.

Serrar largias da segirezza
Per eliminar l'incident e per serrar largias da segirezza fa il UI questa saira a partir da las 19.00 in update extraordinari da la pagina d'internet dal chantun. A partir da quest mument na vegn la pagina d'internet per pliras uras betg ad esser cuntanschibla.

Il ePortal e tut las applicaziuns spezialisadas dal chantun Grischun n'èn betg pertutgads da la cyberattatga e restan er durant quest update online.

Infurmaziuns:

• Lorenz Tanner, manader da l'Uffizi d'informatica, tel. +41 81 257 32 52 (cuntanschibel fin las 17.00), e‑mail Lorenz.Tanner@afi.gr.ch
• Roman Rüegg, incumbensà per la segirezza da l'informatica, Uffizi d'informatica, tel. +41 81 257 89 52 (cuntanschibel fin las 17.00), e‑mail Roman.Rueegg@afi.gr.ch