La Regenza ha concedì ina contribuziun chantunala da 138 777 francs a favur dal project digital «Support your Locals Application» (SYL App) da l'uniun Marktplatz und Zentrumsort Thusis. Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Ils custs totals dal project èn calculads cun 411 193 francs.

La «SYL App» è ina plattafurma digitala per rinforzar l'economia locala e per sustegnair uniuns regiunalas. Sco prestaziun principala per il martgà pon las interpresas che sa participeschan communitgar en l'app lur purschidas, reducziuns da pretschs u contribuziuns da sponsoring. Las commembras ed ils commembers da las uniuns affiliadas da sport, da cultura e da temp liber pon lura consultar questas purschidas. Tut tenor la branscha e la marscha datti differents models pussaivels, per exempel ina contribuziun da sponsoring fixa per mintga cumpra, ina contribuziun procentuala a l'uniun ubain ina cumbinaziun cun in avantatg per la clientella.

La clientella en mira èn las uniuns regiunalas d'artisanadi e mastergn sco er autras gruppa­ziuns da manaschis. L'introducziun per unitads regiunalas pli grondas po numnadamain vegnir fatga en moda effizienta e favuraivla. Cumplementarmain pon er manaschis singuls s'affiliar a la plattafurma. Las interpresas che sa participeschan survegnan in instrument simpel, che po vegnir regulà flexiblamain, per tgirar las relaziuns cun la clientella, per activar la cumpra al lieu e per communitgar acziuns. Il model da fatschenta sa basa sin in simpel sistem d'abunament. Cun extender pass per pass la purschida sin ulteriuras regiuns ed interpresas duai sa svilup­par in manaschi persistent e solid. Cumplementarmain a la funcziun principala èsi pussaivel d'integrar sin la plattafurma servetschs sco novitads, indicaziuns da contact, diever da bons e cudeschaziuns da termins. Uschia digitalisescha e simplifitgescha il project ils process da sponsoring e da communicaziun existents, rinforza la valurisaziun regiunala e sustegna la transfurmaziun digitala en il chantun Grischun.

Ulteriuras infurmaziuns: https://grdigital.digital/

Infurmaziuns: Departament d'economia publica e fatgs socials

La Regenza ha autorisà l'Uffizi da construcziun auta da suttascriver, per incumbensa da la Polizia chantunala, in contract da locaziun per ina nova basa da polizia en la Industriestrasse a Luzein. La purschida da las localitads che duain vegnir prendidas en locaziun en in edifizi nov cumpiglia tut en tut 586 meters quadrat e sa chatta en il center dal territori d'acziun en il Partenz, en in lieu ch'è optimal areguard la strategia poliziala, directamain davant il tunnel da Küblis a Küblis Dalvazza. En quest cas van las pretensiuns dal locatari pli lunsch ch'il solit standard da biro. En spezial dovri construcziuns specificas per la polizia, sco ina cella per praschuniers, in spurtegl segirà, cabinas da durmir, in giatter en la halla da parcar ed er ulteriuras mesiras da segirezza. Per realisar questas mesiras è vegnì concludì – en il rom dal contract da locaziun – in import maximal da 300 000 francs a quint dal chantun. La nova basa da polizia Partenz vegn previsiblamain ad esser pronta l'atun 2028. La relaziun da contract vegn concludida per ina durada fixa da 10 onns. Suenter la scadenza da quest contract ha il chantun l'opziun da prolungar il contract da locaziun duas giadas per mintgamai 5 onns.

En il territori d'acziun Partenz è la Polizia chantunala actualmain preschenta cun duas basas da polizia a Schiers ed a Claustra. L'infrastructura da la basa da polizia a Schiers, ch'è en locaziun dapi il 1. da fanadur 1991, è antiquada e sto vegnir renovada. Ultra da quai è la purschida da localitads memia pitschna e na po betg vegnir engrondida. Er las surfatschas da la basa da polizia a Claustra èn limitadas e na porschan nagin potenzial d'optimaziun. Per garantir er en l'avegnir la disponibilitad da las collavuraturas e dals collavuraturs da la Polizia chantunala, èsi indispensabel d'avair ina infrastructura moderna ed actuala en ils secturs da la IT, da la mobilitad d'acziun e dal plaz da lavur.

La nova purschida da localitads a Küblis Dalvazza è circa 100 meters quadrat pli gronda che quella da las basas da polizia existentas a Schiers e Claustra. Cun il remplazzament da las basas actualas èsi pussaivel da meglierar considerablamain l'effizienza dal manaschi e la gestiun. Tras la reducziuns dal dumber d'objects e da contracts da locaziun vegn er reducida la lavur per tgirar ils edifizis sco er per gestiunar l'infrastructura dad IT, en spezial per ils secturs da l'informatica e da la telefonia.

Infurmaziuns: Departament da giustia, segirezza e sanadad

La Regenza ha approvà il project «Senda da guaud Riss Monbiel» da la vischnanca da Claustra ed ha deliberà ina contribuziun chantunala maximala da circa 3,26 milliuns francs. Ils custs totals vegnan budgetads cun 4,6 milliuns francs.

Grondas parts dal guaud sur la fracziun da Monbiel e dal Bödmerwald èn vegnidas donnegiadas ils onns 1950 tras eveniments da la natira pli gronds. Suenter quests eveniments eran las surfatschas donnegiadas vegnidas emplantadas per gronda part. Oz èn quests guauds da protecziun spess ed unifurms. Per che la stabilitad dals guauds possia vegnir mantegnida, dovri permanentamain mesiras da tgira. Perquai che las vias n'èn betg largias avunda ed han ina memia pitschna capacitad da chargia, na pon ins actualmain betg cultivar ils guauds da protecziun ed er betg transportar davent la laina en moda effizienta e segira. Ultra da quai protegian ils guauds la fracziun da Monbiel, vias chantunalas e communalas sco er manaschis industrials ed agriculs cunter lavinas, crudadas da crappa, sbuvadas ed auas grondas. Consequentamain è quest territori vegnì determinà en il rom dal Plan per il svilup dal guaud 2018+ sco territori d'avertura prioritar cun potenzial d'optimaziun.

Quest project cumenza tar il spartavias en il sectur Schwendi, suonda il Fergenweg ed il Rissweg e finescha sin il territori Schindelboden. La via che duai vegnir renovada ha ina lunghezza da 3742 meters. Perquai che la via existenta è fitg stippa, vegn fatga ina nova trassaziun sin ina lunghezza da var 800 meters. La via veglia vegn renatiralisada sin quest traject, cuvrida e semnada en. Sin ina lunghezza da stgars 900 meters vegn construida ina cuvrida d'asfalt, quai cunzunt en il territori avert e sin passaschas fitg stippas. Sin ils emprims 2,7 kilometers vegn la via schlargiada ad ina ladezza da 3,3 meters. Sin l'ultim kilometer èsi previs da schlargiar il vial a 3 meters. Per renovar la via ston vegnir construids mirs da blocs sin ina lunghezza da 1092 meters e paraids dal tip Larssen sin ina lunghezza da 330 meters. La traversada dal Fraschmardinbach, ch'è vegnida destruida il 2019, vegn restabilida cun ina nova punt.

La Regenza ha approvà in project da la vischnanca da Tavau per construir rempars per lung dal Guggerbach. La Confederaziun ed il chantun sa participeschan al project cun maximal­main 880 000 francs en il rom da la cunvegna da program da la NGF «Privels da la natira gravitativs tenor la Lescha davart la correcziun dals curs d'aua». Plinavant ha la Regenza concedì ina contribuziun chantunala da maximalmain 72 000 francs per la construcziun da vias. Ils custs totals vegnan budgetads cun 1,6 milliuns francs.

Il Guggerbach nascha en la costa sidost dal Strela e sbucca entaifer il territori d'abitadi da Tavau en la Landwasser. Il Guggerbach è in torrent che maina glera. Per franar l'activitad d'erosiun, è il curs da l'aual vegnì stabilisà avant passa 100 onns en tscherts puncts cun traversas. A chaschun da las inspecziuns periodicas ha la vischnanca da Tavau constatà, che differentas traversas da l'aual sur la Schatzalp èn donnegiadas. En il rom dal project èsi pia previs da realisar mesiras da sanaziun vi da 19 traversas. Nua ch'i mancan las liadiras da la vart, èsi necessari da restabilir las chanals traversalas tras emplenidas e da las segirar cun ina leva construcziun d'atschal. Las foppas d'erosiun per lung dals pes dals mirs èn da concepir sco batschigls natirals da calmar. Per quest intent pon vegnir construids ubain letgs da l'aual or da blocca en furma da foppas ubain traversas d'atschal prepostadas, ch'èn francadas en il terren.