En l'entir Grischun sa rendan oz millis scolaras e scolars en lur stanzas da scola novas u enconuschentas. Il cusseglier guvernativ Jon Domenic Parolini e la manadra da l'Uffizi per la scola populara ed il sport, Chantal Marti-Müller, han visità la chasa da scola Barblan a Cuira. Al cumenzament da la scola vegnan preschentadas cifras actualas davart il dumber da scolaras e scolars, davart l'occupaziun da las plazzas da persunas d'instrucziun e davart las permissiuns da dar scola concedidas.
La gronda part da las scolas popularas dal Grischun cumenza oz l'onn da scola 2026/27. En la chasa da scola Barblan da la Scola da la citad da Cuira èn quai circa 250 scolaras e scolars dal stgalim da scolina e dal stgalim primar e passa 30 persunas d'instrucziun. Cunquai che la festa d'avertura uffiziala ha lieu pir damaun, èn las scolaras ed ils scolars ids – suenter la beneventaziun tras las persunas d'instrucziun da classa – directamain en las stanzas da scola. Ad els èn suandads il cusseglier guvernativ Jon Domenic Parolini e la manadra da l'Uffizi per la scola populara ed il sport, Chantal Marti-Müller, che han dastgà assister sco giasts a las emprimas lecziuns dal nov onn da scola. A chaschun da lur visitas da l'instrucziun en la scolina sco er en differentas classas primaras han els exprimì a las scolaras ed als scolars, en spezial a quellas e quels dal 1. onn da scolina respectivamain da scola, ils megliers giavischs per il cumenzament da la scola.
Cifras stabilas
L'onn da scola passà 2025/26 ha la scola populara grischuna gì var 19 300 scolaras e scolars. Da quels han 18 968 frequentà la scola regulara (incl. scolaziun speziala integrativa) e 331 ina instituziun da la scolaziun speziala. Ina classa da la scola regulara ha gì en media 15 scolaras e scolars. In pau dapli che 2400 magistras e magisters han instruì en il sectur da la scola regulara. Guardà sur tut ils stgalims è il grad d'occupaziun stà en media 68 pertschient. Questas cifras èn pli u main identicas cun quellas da l'onn precedent.
Pudì occupar las plazzas
Il cumenzament da fanadur 2026 n'eran quatter plazzas betg occupadas per il nov onn da scola 2026/27. Quai correspunda a stgars duas plazzas a temp cumplain. Per l'onn da scola 2026/27 èn vegnidas emessas fin ussa 522 permissiuns da dar scola en il sectur da la scola regulara. Avant in onn eran quai 467 permissiuns da dar scola. Questas indicaziuns mussan mintgamai la situaziun al cumenzament da fanadur. Quantas permissiuns da dar scola ch'èn vegnidas emessas tut en tut per in onn da scola, po mintgamai vegnir eruì pir pli tard. Per l'onn da scola 2025/26 èn vegnidas emessas tut en tut 622 permissiuns da dar scola. Il pensum da lavur d'ina persuna d'instrucziun cun ina permissiun da dar scola è en media circa tar 44 pertschient. Circa in quart da questas persunas d'instrucziun instruescha cun in pensum dad ina fin tschintg lecziuns. Mo 15 pertschient instrueschan cun in pensum dad 80 fin 100 pertschient.
Engraziament als mainascola ed a las persunas d'instrucziun
Il Departament d'educaziun, cultura e protecziun da l'ambient e l'Uffizi per la scola populara ed il sport (USS) engrazian cordialmain a tut las persunas d'instrucziun, a tut las manadras e manaders da scola ed a tut las autoritads da scola. Grazia a lur engaschament dastgan tut las scolaras ed ils scolars da la scola populara grischuna quintar cun ina furmaziun d'auta qualitad. Per il nov onn da scola giavischain nus bleras experientschas cuminaivlas ed instructivas. «Nossas scolas èn plain pussaivladads. Ma pir ils umans transfurman ellas en vairs spazis d'emprender e da viver», di Chantal Marti-Müller, manadra dal USS.
Infurmaziuns:
Il cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, sco er dr. Chantal Marti-Müller, manadra da l'Uffizi per la scola populara ed il sport, stattan gugent a disposiziun persunalmain ils 17 d'avust 2026, da las 09.20 fin las 09.55, en la chasa da scola Barblan a Cuira per dar infurmaziuns.
Ulteriuras dumondas da las medias vegnan coordinadas da Simon Bott, secretari general dal Departament d'educaziun, cultura e protecziun da l'ambient, tel. +41 81 257 27 11, e‑mail Simon.Bott@ekud.gr.ch
Responsabladad: Departament d'educaziun, cultura e protecziun da l'ambient