La Regenza ha approvà in project da las vischnancas da Lostallo, Grono e Cama per la correcziun dal Rià de la Molera. Als custs budgetads da circa 8,49 milliuns francs ha ella garantì a las vischnancas ina contribuziun chantunala da circa 1,7 milliuns francs tenor la Lescha davart la correcziun dals curs d'aua sco er ina contribuziun chantunala da 178 290 francs tenor la Lescha davart las vias.

Il Rià de la Molera furma in sistem da torrents cun in intschess da circa 4,44 kilometers quadrat. El nascha al Piz de Groven e sbucca en la Moesa. Ils onns 1920 èn vegnids construids ils emprims rempars per lung da l'aual. Il sistem da rempars existent è sa cumprovà durant in lung temp. Auas grondas pli pitschnas e mesaunas han bain chaschunà repetidamain donns. Quels èn dentant restads entaifer stretgas dimensiuns. Suenter las precipitaziuns intensivas dal zercladur 2024 en tut il Mesauc è il Rià de la Molera ì sur las rivas ora ed ha sutterrà parts dal territori d'abitadi e da las infrastructuras en la fracziun Sorte cun glitta e glera. Las chasas d'abitar en il territori èn vegnidas donnegiadas e per part schizunt destruidas dal tuttafatg. Igl ha schizunt dà morts. En il rom da l'eveniment d'aua gronda han ins evacuà las abitantas ed ils abitants restads. Ellas ed els na dastgan betg returnar en las zonas fitg periclitadas, avant che las mesiras da protecziun necessarias n'èn betg realisadas.

L'element central dal project actual è in rempar da deviaziun resp. da retenziun che duai proteger la fracziun Sorte. Las bovas vegnan franadas e manadas sut il rempar ora e lura deviadas en il letg oriund da l'aual. Il surscul vegn svià vers sid en in nov chanal da distgargia d'aua gronda separà e manà sin la pli curta via en la Moesa. Per mantegnair il curs da l'aual existent sto quel per part vegnir restabilì. En cas da gronds eveniments d'aua gronda cun bovas intensivas vegn la glera sviada vers sid. Per proteger la via chantunala da colliaziun (Via taliana H13) è previs in indriz d'alarm. Tras la construcziun dal rempar da deviaziun vegn scursanì considerablamain il traject da via periclità. Quai augmenta la segirezza per las utilisadras ed ils utilisaders da la via.