La Regenza ha avert la consultaziun tar la Lescha davart l'agir dal Cussegl grond e da la Regenza en situaziuns excepziunalas (lescha generala) e tar la revisiun parziala da l'Urden da gestiun dal Cussegl grond concernent l'agir dal Cussegl grond en situaziuns excepziunalas.

En la sessiun d'october 2020 ha il Cussegl grond incumbensà la Regenza da far in rapport davart la meglieraziun da l'abilitad d'agir dal Cussegl grond e da la Regenza en temps da crisa futurs, sch'i dat ina situaziun extraordinaria. Sin fundament da las enconuschientschas che resultan dal rapport, duai la Regenza proponer las adattaziuns necessarias da las basas giuridicas per meglierar l'abilitad d'agir.

Da nov èn pussaivlas sesidas virtualas
Suenter il process d'elavuraziun da la crisa stgaffescha questa revisiun las basas giuridicas necessarias per meglierar l'abilitad d'agir dal Cussegl grond e da la Regenza en situaziuns excepziunalas. Da nov pussibilitescha la lescha sut tschertas circumstanzas tranter auter, ch'il Cussegl grond, la Conferenza da las presidentas e dals presidents sco er las cumissiuns pon far sesidas virtualas. Uschia po il manaschi parlamentar er vegnir garantì, sche sesidas fisicas n'èn temporarmain betg pussaivlas. Ils detagls vegnan reglads en l'Urden da gestiun. Ulteriuras disposiziuns che megliereschan l'abilitad d'agir èn da chattar en ils documents da consultaziun.

Ils documents da consultaziun èn ussa disponibels
La consultaziun dura dals 27 d'avust 2026 fin ils 25 da november 2026. Ils documents respectivs pon vegnir consultads sin la plattafurma «e-participaziun»: https://e-mitwirkung.gr.ch

Infurmaziuns:

Daniel Spadin, chancelier, Chanzlia chantunala, tel. +41 81 257 22 21 (cuntanschibel da las 10.00 fin las 12.00), e‑mail Daniel.Spadin@staka.gr.ch